වසර හයකින් පසු අධිකරණය හමුවට
ශ්‍රී ලංකා මහ බැංකුව තහනම් කළ පිරමිඩාකාර මූල්‍ය යෝජනාක්‍රමයක් ක්‍රියාත්මක කරමින් වසර හයකට අධික කාලයක් අධිකරණය මගහැර සිටි ප්‍රධාන සැකකරුවෙකු ලබන 11 වනදා තෙක් රක්ෂිත බන්ධනාගාර ගත කිරීමට කොටුව මහේස්ත්‍රාත් පසන් අමරසේන මහතා අද (02) නියෝග කළේය.
මෙලෙස බන්ධනාගාර ගත කෙරුණේ ෆ්‍රැන්සිස් හෙට්ටිගේ අනිල් නමැත්තෙකි. සැකකරු හෝමාගම ප්‍රදේශයේදී අත්අඩංගුවට පත්වන්නේ මත්ද්‍රව්‍ය ග්‍රෑම් 10කට අධික ප්‍රමාණයක්ද සන්තකයේ තබාගෙන සිටියදීය.
තරු හෝටල් කාමර මුවාවෙන් කළ වංචාව
කොළඹ ප්‍රමුඛ පෙළේ තරු පන්තියේ හෝටල් කාමර පහසුකම් ලබාදෙන බව පවසමින් මහජනතාවගෙන් මුදල් එක්රැස් කිරීම මෙම ජාවාරමේ ප්‍රධාන උපක්‍රමය වී තිබේ.
සැකකරු කොළඹ ෂැංග්‍රිලා වැනි සුපිරි හෝටල්වල පෞද්ගලිකව නවාතැන් ගනිමින් මෙම පිරමීඩ ජාලය මෙහෙයවා ඇති අතර, විශ්වාසය දිනාගැනීම සඳහා අනුගමනය කර ඇත්තේ විස්මිත කූඨ ලේඛන උපක්‍රමයකි.
රුපියල් 250 රිසිට්පත ලක්ෂ දෙකහමාරක් වූ හැටි
පැමිණිලිකරුවෙකුගේ ගිණුමට රුපියල් 250,000ක මුදලක් තැන්පත් කළ බව පෙන්වීම සඳහා සැකකරු බැංකු ගත කර ඇත්තේ රුපියල් 250ක් පමණි. අනතුරුව එම බැංකු රිසිට්පත පරිගණක මඟින් ව්‍යාජ ලෙස සකස් කර රුපියල් ලක්ෂ දෙකහමාරක මුදලක් තැන්පත් කළ බව පෙන්වා මුදල් වංචා කර ඇති බව පොලිසිය අධිකරණයට වාර්තා කළේය.
මෙම සූක්ෂ්ම ක්‍රමවේදය ඔස්සේ සැකකරු තවත් පුද්ගලයින් රැසකගෙන් ලක්ෂ ගණනින් මුදල් ලබාගෙන ඇති බවට සැකකෙරේ.
මත්ද්‍රව්‍ය සහ බහුවිවාහ වරෙන්තු
අත්අඩංගුවට පත්වීමෙන් පසු දින 7ක රැඳවුම් නියෝග මත ප්‍රශ්න කළ සැකකරුට එරෙහිව බහුවිවාහ චෝදනාවක් මත මාරවිල මහේස්ත්‍රාත් අධිකරණයෙන්ද විවෘත වරෙන්තුවක් නිකුත් කර තිබූ අයෙකි.
මෙම ජාවාරමට ආධාර අනුබල දුන් බවට සැකකෙරෙන සැකකරුගේ අනියම් බිරිඳ, ඇගේ සහෝදරයා සහ තවත් කාන්තාවක් පිළිබඳවද පොලිසිය පුළුල් විමර්ශනයක් අරඹා තිබේ.
අධිකරණ නියෝගය
ඉදිරිපත් වූ කරුණු සලකා බැලූ මහේස්ත්‍රාත්වරයා, සැකකරු ලබන 11 වනදා දක්වා රක්ෂිත බන්ධනාගාර ගත කිරීමට නියෝග කළ අතර, මත්ද්‍රව්‍ය නඩුව සඳහා ලබන 09 වනදා ඔහු හෝමාගම මහේස්ත්‍රාත් අධිකරණයට ඉදිරිපත් කරන ලෙස නියම කළේය.