පාස්කු ඉරුදින ත්‍රස්ත ප්‍රහාරය සම්බන්ධ පුළුල් විමර්ශනය යටතේ රඳවාගෙන ප්‍රශ්න කරනු ලබන රාජ්‍ය බුද්ධි සේවයේ හිටපු අධ්‍යක්ෂ සුරේෂ් සලේට එරෙහි නඩුව ලබන මස 25 වනදා යළි කැඳවීමට කොළඹ කොටුව මහේස්ත්‍රාත් පසන් අමරසේන අද (21) නියෝග කළේය.
සිද්ධියේ පළමු සහ දෙවන සැකකරුවන් ලබන මස 4 වනදා තෙක් යළි රක්ෂිත බන්ධනාගාරගත කෙරිණි. සුරේෂ් සලේ ඇතුළු සැකකරුවන් තිදෙනා අධිකරණයට ඉදිරිපත් කෙරුණේ සූම් (Zoom) තාක්ෂණය ඔස්සේය.
දින 120කට පසු හෙළිවූ ප්‍රගතිය
විමර්ශන ප්‍රගතිය දක්වමින් අතිරේක සොලිසිටර් ජනරාල් දිලිප පීරිස් අධිකරණයට දැනුම් දුන්නේ, දින 120කට පසු සැකකරු පෙරට වඩා යහපත් සෞඛ්‍ය තත්ත්වයෙන් පසුවන බවයි.
පසුගිය 16 වනදා මාධ්‍යවේදී ප්‍රගීත් එක්නැලිගොඩ අතුරුදන් කිරීමේ නඩුවේ සාක්ෂි විභාගයටද ඉදිරිපත්ව කරුණු දැක්වූ බවත්, ප්‍රමාද වී හෝ මේ වන විට විමර්ශන නිසි මඟකට ගෙන ඇති බවත් රජයේ නීතිඥවරයා අවධාරණය කළේය.
දේශපාලන සබඳතා සහ අසාද් මවුලානා
මෙම විමර්ශනයේදී හිටපු අමාත්‍ය ඩග්ලස් දේවානන්දගෙන් ප්‍රකාශයක් ලබාගත් බව නීතිපති පාර්ශ්වය සටහන් කළේය.
අසාද් මවුලානාව කරුණා අම්මාන් සහ පිල්ලෙයාන් වෙත හඳුන්වා දී ඇත්තේ ඩග්ලස් දේවානන්ද බව විමර්ශනවලදී අනාවරණය වී තිබේ.
හිටපු අමාත්‍යවරයා එම චෝදනාව ප්‍රතික්ෂේප කරමින් ප්‍රකාශය ලබාදුන් විගස මාධ්‍ය හමුවක් පැවැත්වීම විමර්ශනවලට බාධාවක් බව නීතිපති පාර්ශ්වය පෙන්වා දුන්නේය.
ඩග්ලස් දේවානන්දගේ දේශපාලන අංශයේ හිටපු ප්‍රධානියෙකු වන 'ශංකර්' ලබාදුන් සාක්ෂියද මෙහිදී ඉදිරිපත් කෙරුණු අතර, අසාද් මවුලානා සහ කරුණා කණ්ඩායම සම්බන්ධ කිරීමේ පසුබිම ඔහු සනාථ කර ඇත.
සාරා ජස්මින් සහ මඟහැරුණු ඔත්තුව
ප්‍රහාරයට පෙර යුද හමුදාවට තොරතුරු සපයන 'රාජන්' නමැති ඔත්තුකරු ලබාදුන් තීරණාත්මක බුද්ධි තොරතුරක් මෙහිදී අනාවරණය විය.
මරාගෙන මැරෙන බෝම්බකරු ඉන්සාෆ් අහමඩ්ගේ ඥාති නිවසට ගිය අවස්ථාවේදී, මඩකලපුවට ආවේණික දෙමළ උච්චාරණයකින් කතා කළ බුර්කාව පැළඳි කාන්තාවක නිරීක්ෂණය කළ බව ඔහු හමුදා කෝප්‍රල් සුරංග වෙත දැනුම් දී තිබේ. ප්‍රහාරයෙන් පසු ප්‍රචාරය වූ ඡායාරූප ඔස්සේ ඇය 'සාරා ජස්මින්' හෙවත් පුලස්තිනී මහේන්ද්‍රන් බව හඳුනාගෙන දැනුම් දුන්නද, "එය අමතක කර දමන ලෙස" හමුදා කෝප්‍රල්වරයා පැවසූ බව අධිකරණයේදී හෙළි විය.
සුරේෂ් සලේගේ අනුදැනුම මත එම තොරතුරු විමර්ශනය වීම හිතාමතා වළක්වා ඇති බවට නීතිපති දෙපාර්තමේන්තුව සෘජුව චෝදනා කළේය.
ව්‍යාජ ගමන් බලපත්‍ර සහ ලන්ඩන් මෙහෙයුම
කරුණා අම්මාන් හට රාජතාන්ත්‍රික විදේශ ගමන් බලපත්‍රයක් ලබාදී එංගලන්තයට යැවීමට සුරේෂ් සලේ ඇතුළු බුද්ධි නිලධාරීන් කටයුතු කළ බවට රජයේ නීතිඥවරයා කරුණු දැක්වීය.
එම ගමන් බලපත්‍රය පරිසර අමාත්‍යාංශයේ හිටපු ලේකම්වරයෙකු ලෙස දැක්වෙන "දුෂ්මන්ත ගුණවර්ධන" නමැති ව්‍යාජ අනන්‍යතාවකින් සකසා ඇති අතර, එවැනි පුද්ගලයෙකු සැබවින්ම නොසිටි බව අනාවරණය වී තිබේ. සලේ සතුවද ගමන් බලපත්‍ර කිහිපයක් තිබී ඇති බවත්, ඒ පිළිබඳ විදේශ කටයුතු අමාත්‍යාංශය හරහා පරීක්ෂණ කරන බවත් ප්‍රකාශ විය.
විත්තියේ ස්ථාවරය සහ ගෝඨාභයගේ මෝසම
තුන්වන සැකකරු වෙනුවෙන් පෙනී සිටි ජනාධිපති නීතීඥ ශාවින්ද්‍ර ප්‍රනාන්දු විමර්ශන වාර්තාවල අන්තර්ගතය ප්‍රතික්ෂේප කළේය. මෙතෙක් ලබාගෙන ඇත්තේ එක් ප්‍රකාශයක් පමණක් බවත්, සාක්ෂි නොමැතිව මාධ්‍ය මඟින් චරිත ඝාතනය කිරීමට මෙවැනි කරුණු ප්‍රසිද්ධ නොකළ යුතු බවත් ඔහු තර්ක කළේය.
පාස්කු මහාධිකරණ තීන්දුවෙන් පසු විත්තිකරුවන් කළ හෙළිදරව් සම්බන්ධයෙන් සොයා බැලීමට නිලධාරීන් 8 දෙනෙකුගේ කණ්ඩායමක් පත්කර ඇති පසුබිමක, මෙම නඩුව ලබන මස 25 වනදා යළි විභාගයට ගැනේ.