වධහිංසා වැළැක්වීම පිළිබඳ එක්සත් ජාතීන්ගේ අනුකමිටුවේ (SPT) විශේෂ නියෝජිත පිරිසක් ලබන ජූනි 15 වැනිදා සිට 24 වැනිදා දක්වා ශ්‍රී ලංකාවේ නිල සංචාරයක නිරත වීමට නියමිතය.
විදේශ කටයුතු අමාත්‍යාංශය නිවේදනය කරන පරිදි, මෙය ඔවුන්ගේ දෙවැනි ලංකා සංචාරයයි. ලංකාව 2017 වසරේදී වධහිංසාවට එරෙහි සම්මුතියේ විකල්ප ප්‍රොටෝකෝලයට (OPCAT) ඇතුළත් වීමෙන් පසු පළමු සංචාරය සිදුකළේ 2019 අප්‍රේල් මාසයේදීය.
හිරගෙවල් සහ රැඳවුම් මධ්‍යස්ථාන සෘජු පරීක්ෂාවට
අයිෂා ෂුජූන් මුහම්මද් මහත්මියගේ ප්‍රධානත්වයෙන් යුත් සිව්දෙනෙකුගෙන් සමන්විත මෙම ජාත්‍යන්තර නියෝජිත පිරිස ලංකාවේ බන්ධනාගාර සහ පොලිස් සිරමැදිරි නිරීක්ෂණය කිරීමට නියමිතය.
මීට අමතරව ඔවුන් රජයේ අමාත්‍යවරුන්, ජ්‍යෙෂ්ඨ නිලධාරීන්, සිවිල් සංවිධාන සහ ජාතික වධහිංසා වැළැක්වීමේ යාන්ත්‍රණය (NPM) ලෙස ක්‍රියා කරන ශ්‍රී ලංකා මානව හිමිකම් කොමිෂන් සභාව (HRCSL) සමඟ ද සාකච්ඡා පවත්වනු ඇත.
ආණ්ඩුවේ ජාත්‍යන්තර බැඳීම් සහ භූමිය පරීක්ෂා කිරීමේ අභියෝගය
විදේශ අමාත්‍යාංශය පවසන්නේ වත්මන් රජය එක්සත් ජාතීන්ගේ සංවිධානය සමඟ විවෘත සහ විනිවිද පෙනෙන ප්‍රතිපත්තියක් අනුගමනය කරන බවයි.
කෙසේ වෙතත්, ලංකාවේ පොලිස් අත්අඩංගුවේදී සිදුවන මරණ, වධහිංසා පැමිණවීම් සහ ත්‍රස්තවාදය වැළැක්වීමේ පනත (PTA) අවභාවිත වීම් පිළිබඳව දේශීය හා ජාත්‍යන්තර මානව හිමිකම් සංවිධාන දිගින් දිගටම චෝදනා නඟයි. එබැවින් මෙම සංචාරය රජය ජාත්‍යන්තරයට දෙන ප්‍රතිරූපය සහ භූමියේ පවතින සැබෑ තත්ත්වය උරගා බලන කදිම පරීක්ෂණයක් වනු ඇත.
ජාත්‍යන්තර ප්‍රමිතීන්ට ගරු කිරීම ශිෂ්ට රාජ්‍යයක වගකීමකි
ලංකාව ආර්ථික සහ දේශපාලන වශයෙන් ස්ථාවර වීමට උත්සාහ කරන මෙවැනි වටපිටාවක, මෙවැනි ජාත්‍යන්තර අධීක්ෂණ ආයතන සමඟ සහයෝගයෙන් කටයුතු කිරීම අතිශය වැදගත්ය. ශිෂ්ට සම්පන්න රාජ්‍යයක් ලෙස ඉදිරියට යාමට නම් ආණ්ඩුක්‍රම ව්‍යවස්ථාව මඟින් සහතික කර ඇති පුරවැසියාගේ මූලික අයිතිවාසිකම් සහ මානුෂීය ගෞරවය රැකීමට රජය ප්‍රායෝගිකව කැපවිය යුතුය.
(වාර්තාව | හර්ෂ ගුරුගේ)
