මෙම නව විශේෂාංගය ලොව පුරා සිටින බිලියන 3කට අධික WhatsApp පරිශීලකයන් වෙත ක්‍රමානුකූලව නිකුත් කෙරෙනු ඇත.
WhatsApp සඳහන් කරන්නේ මෙය අනිවාර්ය විශේෂාංගයක් නොවන බවයි. කැමති පරිශීලකයන්ට පමණක් තමන් කැමති Username එකක් වෙන් කරවා ගත හැකි අතර, එය ඕනෑම අවස්ථාවක වෙනස් කිරීමට හෝ ඉවත් කිරීමට ද හැකියාව ලැබේ.
නව නීති අනුව Username එකක් අක්ෂර 3ත් 35ත් අතර දිගකින් යුක්ත විය යුතුය. එමෙන්ම ප්‍රසිද්ධ පුද්ගලයන්, රාජ්‍ය ආයතන, සංවිධාන සහ ජනප්‍රිය සන්නාමවල නම් ව්‍යාජ ලෙස භාවිත කිරීම වැළැක්වීම සඳහා WhatsApp විසින් විශේෂ ආරක්ෂණ ක්‍රමවේද ද හඳුන්වා දී තිබේ.
WhatsApp ගිණුමක් ආරම්භ කිරීම සඳහා තවදුරටත් දුරකථන අංකයක් අනිවාර්ය වන නමුත්, Username විශේෂාංගය සක්‍රීය කළ පසු නව පුද්ගලයන් සමඟ කතාබහ ආරම්භ කිරීමේදී ඔබගේ දුරකථන අංකය වෙනුවට Username එක පමණක් පෙන්වනු ඇත. මෙය විශේෂයෙන්ම Group Chatවල සිටින නොදන්නා පුද්ගලයන් සමඟ සම්බන්ධ වන විට පෞද්ගලිකත්වය ආරක්ෂා කිරීමට උපකාරී වනු ඇත.
WhatsApp හි නිෂ්පාදන උප සභාපති Alice Newton-Rex පවසන්නේ, "මෙය WhatsApp හි මූලික පෞද්ගලිකත්ව විශේෂාංගයක් ලෙස නිර්මාණය කර ඇති අතර, ඔබගේ දුරකථන අංකය මුලින්ම දැකිය යුත්තේ කවුරුන්ද යන්න පිළිබඳ පාලනය ඔබට ලබාදීම එහි අරමුණයි" යනුවෙනි.
මීට අමතරව, WhatsApp විසින් Username Key නමින් අමතර ආරක්ෂණ විකල්පයක් ද හඳුන්වා දෙයි. එය සක්‍රීය කළහොත්, ඔබගේ Username එක දැන සිටීම පමණක් ප්‍රමාණවත් නොවන අතර, පළමු වරට ඔබට පණිවිඩයක් යැවීමට එම ආරක්ෂණ යතුර ද අවශ්‍ය වනු ඇත.
එමෙන්ම WhatsApp තුළ Username සෙවීම සඳහා පොදු නාමාවලියක් (Directory) නොතිබෙන අතර, වෙනත් පරිශීලකයෙකුට ඔබව සම්බන්ධ කර ගැනීමට ඔබගේ නිවැරදි Username දැන සිටිය යුතු බව ද සමාගම අවධාරණය කරයි.
මෙම විශේෂාංගය මඟින් WhatsApp, දැනටමත් Username පහසුකම ලබාදෙන Signal සහ Telegram වැනි පණිවිඩ හුවමාරු යෙදුම්වලට සමීප වන අතර, පරිශීලක පෞද්ගලිකත්වය තවදුරටත් ශක්තිමත් කිරීම එහි ප්‍රධාන අරමුණ බව විචාරකයෝ පෙන්වා දෙති.
