ශ්‍රේෂ්ඨාධිකරණ ලේකම්වරයා වෙත යොමු කළ RTI ඉල්ලීමට මාසයකට වැඩි කාලයක් තිස්සේ පිළිතුරු නෑ
X-Press Pearl ව්‍යසනය සම්බන්ධ පංච-පුද්ගල විනිසුරු මඩුල්ලේ තීන්දුව ක්‍රියාත්මක වීමට ඉඩ නොදී කිසියම් ක්‍රියාමාර්ගයක් ගත් සියලුම රාජ්‍ය නිළධාරීන් අධිකරණයට අපහාස කොට ඇති බව, ආචාර්ය රවීන්ද්‍රනාත් දාබරේ පවසයි.
පරිසර යුක්ති කේන්ද්‍රයේ සම නිර්මාතෘවරයෙකු වන ආචාර්ය දාබරේ, නෞකා ව්‍යසනයට එරෙහිව අධිකරණය හමුවට ගිය පළමු පෙත්සම්කරුවා වන අතර, මීපා ආයතනය විසින් පත්කරන ලද expert කමිටුවේ පිටු 6000කට අධික වාර්තාව විශ්ලේෂණය කොට අධිකරණය ඉදිරියේ දීර්ඝ පැහැදිලි කිරීමක්ද කළේය.
වසර 200කට අධික ශ්‍රී ලංකා අධිකරණ ඉතිහාසයේ මින් පෙර කිසි දිනෙක සිදු නොවූ අයුරින්, හිටපු අගවිනිසුරු මුර්දු ප්‍රනාන්දු විශ්‍රාම යාමෙන් අනතුරුව, පංච-පුද්ගල විනිසුරු මඩුල්ලේ තීරණය ත්‍රි-පුද්ගල විනිසුරු මඩුල්ලක් විසින් වෙනස් කර තිබේ. නීති විශාරදයින් පෙන්වා දෙන ආකාරයට එය අධිකරණයට අපහාස කිරීමක් පමණක් නොව, මුල් නියෝගය වෙනස් කරමින් ත්‍රි-පුද්ගල විනිසුරු මඩුල්ල පසුගිය ජනවාරි 26 වෙනි දින ලබා දුන් තීන්දුව නීතිය ඉදිරියේ වලංගු නියෝගයක් ද නොවේ.
නඩු විභාගය සඳහා දිගටම පංච-පුද්ගල විනිසුරු මඩුල්ලක් පත් කළ යුතු බවට ශ්‍රේෂ්ඨාධිකරණය පැහැදිලි නියෝගයක් දී තිබියදී, එය වෙනස් කිරීමට නියෝග කළේ කවරෙක්ද යන්න විමසමින් ශ්‍රේෂ්ඨාධිකරණ Registrar වරයා වෙත පසුගිය ජුනි 15 වෙනි දින තොරතුරු දැනගැනීමේ පනත යටතේ යොමු කළ ඉල්ලුම්පත්‍රයට මේ දක්වා කිසිම පිළිතුරක් ලැබී නැත.
(සටහන | සරෝජ් පතිරණ)
බීබීසී හිටපු ජ්‍යෙෂ්ඨ සම්පාදක
sarojpathi@gmail.com
(Saroj Pathirana ෆේස්බුක් පිටුවෙන්...)
2026 ජුලි 31
