කොළඹ 07, විද්‍යා මාවත හි ඊයේ (21) පැවැති විශේෂ මාධ්‍ය හමුවට එක්වෙමින් ඇය මේ බව කීවාය.
''ජනාධිපතිවරණයත් ඊට පසු පාර්ලිමේන්තු මැතිවරණයටත් ජනතාවක් ලෙස අප ඡන්දය ලබාදුන්නා. නව රජය බලයට පත්වීමෙන් පසු පළාත් පාලන මැතිවරණයටත් මුහුණ දුන්නා. දැන් මැතිවරණ අවසන්. තාමත් ව්‍යාවසායකයින්ගේ ගැටළු වලට හරියාකාර විසඳුම් ලැබීමක් සිදුවී නැහැ. ඒ නිසා වහාම අපගේ ගැටළු වලට විසඳුම් ලබා දීමට රජය කටයුතු කළ යුතුයි.'' යයි ඇය එම මාධ්‍ය හමුවේදී පැවසුවාය.
ව්‍යාපාරිකයින්ගේ සංසදයේ සාමාජික මහේන්ද්‍ර ජයසේකර,
''නව ජාතික ආර්ථික ප්‍රතිපත්තියක් රටේ තාමත් බිහිවී නැහැ. දේශීය නිෂ්පාදන කර්මාන්ත බල ගැන්වෙන ජාතික ආර්ථික ප්‍රතිපත්තියක් නව රජය හෝ සකස් කොට ක්‍රියාවට නැංවිය යුතුයි. සුළු හා මධ්‍ය පරිමාණ ව්‍යවසායක කර්මාන්ත නැංවීමට එය මූලිකත්වය දිය යුතුයි.''
ලාංකීය එක්සත් ව්‍යාපාරිකයින්ගේ සංසදයේ උප සභාපති ලක්මාල් පෙරේරා,
''මේ වන විට ශ්‍රී ලංකා ආර්ථිකයේ ක්‍රියාකාරීත්වය පිළිබඳව දේශපාලන වශයෙන් නියෝජිතයින් සහභාගීවන විවිධ රූපවාහිනී ගුවන්විදුලි වැඩසටහන් තිබෙනවා. වාද විවාද පවත්වනවා. නමුත් එහි සැබෑ ක්‍රියාකාරීන්වන ව්‍යවසායකයින් වන අප සහභාගී කරවාගෙන මාධ්‍ය වැඩසටහන් ක්‍රියාත්මක වන්නේ නැහැ. ඒ නිසා අප වහාම ව්‍යවසායකයින් ලෙස අපගේ අදහස් මාධ්‍ය හරහා රටටම කියන්නට වැඩසටහන් සකස් කරන්න යැයි මාධ්‍ය ආයතන වලින් ඉල්ලා සිටිනවා.''
ලාංකීය එක්සත් ව්‍යාපාරිකයින්ගේ සංසදයේ රෙදි පිළි අංශයේ විශේෂ නියෝජිත සරත් බී.හෙට්ටිගේ,
''අද රටේ සෑම කර්මාන්තයකටම ඉදිරි දැක්මක් නොමැතිව කරන්නන් වාලේ කරන ස්වරූපයක් දක්නට ලැබෙනවා. අපට එසේ සෑමදාම සිටීමට බැහැ. කඩා වැටීමකින් තොරව ඉදිරියට යාමට දේශීය කර්මාන්ත රැක ගන්නා වැඩපිළිවෙලක් ආරම්භ කළ යුතුයි.'''
ලාංකීය එක්සත් ව්‍යාපාරිකයින්ගේ සංසදයේ සාමාජික තරුණ ව්‍යාපාරික ටයිටස් පෙරේරා,
''ගෝලීය තරගකාරීත්වය සමග තොරතුරු තාක්ෂණ ක්ෂේත්‍රයේ නව රැකියා කරන පිරිසගෙන් බදු අයකර ගැනීමට රජය අලුතින් පැනවූ 15%ක බද්ද නිසා බොහෝ පිරිස් එම සේවා සැපයීමෙන් ඉවත්වී තිබෙනවා. එය මේ කර්මාන්තයේ දියුණුවට මෙන්ම රැකියා අවස්ථා පුළුල් කිරීමට බාධාවක්. ඒ නිසා මේ වන විට රැකියා නැතිවී තිබෙනවා. ''
ලාංකීය එක්සත් ව්‍යාපාරිකයින්ගේ සංසදයේ සාමාජික ඒ.එම්.ජේ.බී ජවුෆර්,
''අලුත් කර්මාන්ත ඇතිවීමට අවශ්‍ය පරිසරය රටේ තවම නිර්මාණය වී නැහැ. නව රජයේ වගකීම වහාම එවැනි පරිසරයක් සැකසීමයි. ඉදිරියේදී දැඩි ආර්ථික අභියෝග වලට රටක් ලෙස, සමාජයක් ලෙස අපට මුහුණ දීමට සිදු වේවි. ඉන් මිදීමට කළ හැක්කේ. වහාම අපනයන නංවන කර්මාන්ත කරණයකට පිවිසීමයි. ''
(සටහන | ජේ . මුණසිංහ)