මූල්‍ය පද්ධතියේ ස්ථාවරත්වය බිඳ වැටුණොත් සමස්ත පද්ධතියම අවදානමේ - මහ බැංකු අධිපති

“මූල්‍ය පද්ධතියේ ස්ථාවරත්වය සම්බන්ධයෙන් විශ්වාසය නැතිවුණොත් ජනතාව තමන්ගේ මුදල් මූල්‍ය පද්ධතිය තුළ තැන්පත් කිරීම සිදු කරන්නේ නෑ. එය සමස්ත පද්ධතියම කඩා වැටීමට හේතු වෙනවා.“

ඒ අනුව මහ බැංකුව ලෙස මුදල් ස්ථාවරත්වය සම්බන්ධයෙන් කටයුතු කරන අතරම මූල්‍ය පද්ධතියේ ස්ථාවරත්වය ආරක්ෂා කරගැනීමේ වගකීමක්ද තමන් සතු බව අධිපතිවරයා අවධාරණය කළේය.

“ජනතාවගේ තැන්පතු භාර ගන්නා බැංකු සහ බැංකු නොවන මූල්‍ය ආයතන නියාමනය කරන ආයතනය ලෙස මහ බැංකුව වෙත මේ තැන්පතු ආරක්ෂා කරගැනීම සම්බන්ධයෙන් වගකීමක් තිබෙනවා. ඒ වගේම එම තැන්පතු යොදා ගනිමින් මූල්‍ය ආයතන මගින් ලබා දෙන ණය පහසුකම් හරහා ආර්ථිකය වෙත වඩාත් සුමටව සහයෝගය ලබාදීමට හැකියාව ලැබෙනවා.“

පසුගියදා කොළඹදී පැවැත්වුණු ජාතික ණය සුරැකුම් ආයතනය නිල වශයෙන් එළිදැක්වීමේ අවස්ථාවේදී අදහස් දක්වමින් ඔහු මේ බව සඳහන් කළේය.

විශේෂයෙන්ම රටෙහි සුළු හා මධ්‍ය පරිමාණ ව්‍යවසාය වෙත ණය ලබාදීමේදී මෙම තැන්පතු අතිශය වැදගත් බවත් අධිපතිවරයා පැවසීය.

කෙසේ වෙතත් මෙම සුළු හා මධ්‍ය පරිමාණ ව්‍යවසාය ක්ෂේත්‍රය වෙත සිදු කරන ණය ලබාදීම තවමත් එක සමානව සිදු නොවන බවත්, එහිදී ක්‍රමවත් ණය තොරතුරු පද්ධතියක් නොමැතිවීම ඊට හේතුව බවත් ඔහු පෙන්වා දුන්නේය.

“සීමිත හෝ කිසිදු ණය ඉතිහාසයක් නොමැති පිරිස වෙත ණය ලබාදීමට මෙම ණය දෙන්නන් මැලිවෙනවා. ඒ නිසා වඩාත් විනිවිදභාවයකින් යුත් වඩාත් සරලව පිවිසිය හැකි ණය තොරතුරු පද්ධතියක අවශ්‍යතාව පවතිනවා.“ අධිපතිවරයා වැඩිදුරටත් සඳහන් කළේය.

( lankadeepa.lk | භානුක අමරසිංහ)