2021 වර්ෂය සඳහා ශ්‍රී ලංකා රාජ්‍ය ඖෂධ නීතිගත සංස්ථාවේ වාර්ෂික වාර්තාවේ, විගණකාධිපති වාර්තාවෙහි මේ බව සඳහන් වේ.
එහි වැඩිදුරටත් මෙසේ සඳහන්ව ඇත.
ඉකුත් වර්ෂය තුළ ලාභ ලබා තිබුණු රත්නපුර, ශ්‍රී ජයවර්ධනපුර රෝහල, බණ්ඩාරගම හා මොනරාගල ස්ථාපිත ඔසුසල් 04 සමාලෝචිත වර්ෂයේ දී අලාභ ලබා තිබුණි. ඔසුසල් 09ක ඉකුත් වර්ෂයේ දී ලැබී තිබුණු ලාභය සමඟ සැසඳීමේ දී සමාලෝචිත වර්ෂයේ දී ලැබී තිබුණු ලාභය සියයට 5.7 සිට සියයට 7,411 දක්වා පරාසයකින් අඩු වී තිබුණු බවද නිරීක්ෂණය විය. Covid 19 වසංගත තත්ත්වය මීට හේතු වූ බව සභාපතිවරයා විසින් දන්වා තිබුණි.
සමාලෝචිත වර්ෂයේ දී රු. 5,902,985 ක වැඩිම අලාභයක් ලබා තිබුණු දඹුල්ල ඔසුසලේ ඉකුත් වර්ෂයේ අලාභය රු. 4,896,404 ක් විය.
2020 හා 2021 වර්ෂවල දී පිළිවෙලින් රු. 3,460,998 ක හා රු. 4,412, 492 ක වෛද්‍ය සැපයුම් හානිවීම හෝ කල් ඉකුත්වීම එවැනි අලාභයක් ඇතිවීමට ප්‍රධාන වශයෙන් හේතු වී තිබුණි. ඖෂධවල විකුණුම් පුරෝකථනයන් මඟින් වාර්ෂික අවශ්‍යතාවය නිවැරදිව හඳුනාගෙන නොතිබීම හා අඩු අලෙවි ප්‍රතිශතයක් ඇති ඖෂධවල ඉහළ තොග මට්ටම් පිළිබඳ අවධානය යොමු කර ඒවා වැඩියෙන් අලෙවි වන ඔසුසල් වෙත මාරු නොකිරීම මේ තත්ත්වය ඇතිවීමට හේතුවී තිබුණි.
ඉකුත් වර්ෂයට සාපේක්ෂව සමාලෝචිත වර්ෂයේ දී ඔසුසල් කාර්ය මණ්ඩලයේ කිසිදු සංඛ්‍යාත්මක වෙනසක් සිදුවී නොතිබුණු නමුත් ඔසුසල් 32ක කාර්ය මණ්ඩල වියදම් සියයට 10 සිට සියයට 32 දක්වා පරාසයකින් වැඩි වී තිබුණි. ඉන් ඔසුසල් 12ක්ම සමාලෝචිත වර්ෂය තුළ දී අලාභ ලබා තිබුණු ඔසුසල් විය.
එමෙන්ම ශ්‍රී ජයවර්ධනපුර රෝහල් ඔසුසලේ කාර්ය මණ්ඩල වියදම් ඉකුත් වර්ෂයට සාපේක්ෂව සමාලෝචිත වර්ෂයේ දී රු. 4,760,913 කින් ඉහළ ගොස් තිබුණු අතර එය එම ඔස්සලේ අලාභය කෙරෙහි සෘජුව බලපා තිබුණි. සාමූහික ගිවිසුමට අනුව සමාලෝචිත වර්ෂය තුළ දී කාර්ය මණ්ඩල වැටුප් වැඩිවීම හා Covid 19 වසංගත තත්ත්වය නිසා ආදායම අඩුවීම මීට හේතු වූ බව සභාපතිවරයා විසින් දන්වා තිබුණි.
(adaderana.lk)
