භික්ෂූන් වහන්සේලා පිරිසක් සමඟ වොෂින්ටන් සාම පා ගමනට එක්වූ ආලෝකාට මොකද වුණේ?

සැතපුම් දහස් ගණනක් පුරා සාම පාගමනේ නිරත බෞද්ධ භික්ෂූන් වහන්සේලා සමගින් ගමනේ යන ලොවක් ආදරය කරන ‘ආලෝක’ට සිදුකළ පාදයේ සැත්කම සාර්ථක වී තිබේ.

මේ වනවිටත් සාම පාගමනේ දින ගණනාවක් පසුකර ආ ආලෝකගේ පාදයේ සැත්කම කර තිබුණේ පෙරේදා (12) දිනයේදීය.

මෙම සැත්කම සඳහා මුලින් පැය 2ක් හෝ 3ක් ගතවනු ඇතැයි අනුමාන කර තිබු නමුත් එය පැයක් වැනි කෙටි කාලයකින් අවසන් කිරීමට වෛද්‍ය කණ්ඩායම සමත් වී ඇත. මේ වන විට අලෝක දැඩි වෛද්‍ය අවධානය යටතේ විවේක ගනිමින් සුවය ලබමින් සිටින බව වාර්තාවේ.

සැත්කමට පෙර, ඉතා දක්ෂ පශු වෛද්‍ය කණ්ඩායමක් විසින් අලෝකව ප්‍රවේශමෙන් සූදානම් කර තිබිණ. ඒ අනුව සැත්කම සිදුකිරීමේදී ඔහුට කිසිදු වේදනාවක් නොදැනෙන සේ සුවදායී ගැඹුරු නින්දකට (නිර්වින්දනය) පත්කිරීමට ඔවුන් කටයුතු කර ඇත.

අලෝකගේ පාදය සුව කිරීම සඳහා විශේෂඥයන් කටයුතු කරන අතරතුර ඔහු ඉතා සන්සුන්ව සිටීම සැමට විශාල සහනයක් වී ඇත.

Charleston Veterinary Referral Center (CVRC) හි වෛද්‍ය කණ්ඩායම දැක්වූ කරුණාව සහ කැපවීම භික්ෂූන්වහන්සේලා මෙහිදී විශේෂයෙන් අගය කර තිබේ. මෙහි ඇති විශේෂම කරුණ නම්, මෙම වෛද්‍ය කණ්ඩායම සිය වෘත්තීය සේවාවන් සම්පූර්ණයෙන්ම නොමිලේ ලබාදීමයි. මෙම කණ්ඩායමට ශල්‍ය වෛද්‍ය පැට්‍රීෂියා සූරා හෘද රෝග විශේෂඥ සහ වෛද්‍ය අධ්‍යක්ෂ සොෆී ජෙස්ටි, නිර්වින්දන වෛද්‍ය එමෙට් ස්වන්ටන් සහ බේට්ස්බර්ග්-ලීස්විල් සත්ව රෝහලේ ප්‍රධාන වෛද්‍ය ඒමි වැග්නර් ඇතුළත්වේ. මීට අමතරව, ප්‍රවාහන සම්බන්ධීකාරක රොන්ඩා හොලිමන්, භාරකරු ලුවී හායි තායි ශල්‍ය හෙදිය ටිෆනි සහ සහායිකා ලෝරන් ද ඊට දායක වී ඇත.

අලෝක මේ වන විට ඉතා හොඳින් සුවය ලබමින් සිටින අතර, හැකි ඉක්මනින් ඔහු නැවතත් භික්ෂූන් වහන්සේලා වෙත යොමු කිරීමට නියමිතය.

ඉන්දියාවේ වීදියක අසරණව සිටි සුනඛයෙකු වූ ආලෝක මීට පෙර මෙම භික්ෂූන් වහන්සේලා සිදුකළ දීර්ඝ පාගමනකදී හමුවී උන්වහන්සේලා සමඟම සිටියේය.

හ්ඔන්ග් ඩාඕ විපස්සනා භාවනා මධ්‍යස්ථානය විසින් සංවිධාන කළ, ඇමරිකාවේ ප්‍රාන්ත 10ක් හරහා කිලෝමීටර් 3,700ක් පමණ දුරක් ආවරණය කරන මෙම 'සාමය උදෙසා පාගමනට’ අරමුණ වන්නේ ඇමරිකාව සහ මුළු ලෝකය පුරාම සාමය, කරුණාව සහ මෛත්‍රිය පිළිබඳ දැනුවත්භාවය පැතිරවීමයි.

පසුගිය ඔක්තෝබර් 10 වනදා ටෙක්සාස්හි ෆෝර්ට් වර්ත් නගරයෙන් ආරම්භ වූ මෙම පාගමනට වොෂින්ටන් ඩී.සී. වෙත ළඟා වීමට දින 120ක් ගත වන බවට මීට පෙර අනුමාන කර තිබිණ.

මෙම ගමන පුරාවට ආලෝක ද භික්ෂූන් වහන්සේලා සමගින් පාගමනේ යෙදුනේය. 'Aloka -The Peace Dog' ලෙස හඳුන්වන ඔහුට මේ වනවිට 244,000ක අනුගාමිකයින් පිරිසක් සිටින ඉන්ස්ටග්‍රෑම් ගිණුමක් සහ ලක්ෂ 6ක් සිටින ෆේස්බුක් ගිණුමක් පවා තිබේ.

| Hirunews

මුලාශ්‍ර :

What happened to Aloka? Monks' companion undergoes surgery. What we know

Dog accompanying monks on peace walk recovering after surgery

සබැඳි ලිපි :

සාම සඟ පෙරහැර සමඟ 'ආලෝක' වොෂිංටනයට !

මිනිස් ශිෂ්ටාචාරයට නව ආලෝකයක් උදා කරන ආලෝකා