තිබෙනවා.
ජාතික කණ්ඩායමට තෝරා ගෙන නැති මේ ක්‍රීඩකයන් වන්නේ Rapid Vienna පාපන්දු සමාජ කණ්ඩායමේ නායක Guido Burgstaller, Marco Grull හා Niklas Hedl යන ක්‍රීඩකයන්.
පෙබරවාරියේ පැවති තරගයකදී ප්‍රතිවාදී Austria Vienna කණ්ඩායම පරාජය කිරීමෙන් පසුව පැවති සතුට සැමරීමේදී මේ ක්‍රීඩකයන් තිදෙනා නරඹන්නන් කොටසක් සමග එක්ව සමලිංගික විරෝධී සටන් පාඨ කෑගසමින් සිටින අයුරු දිස්වන වීඩියෝවක් එළියට ඒමෙන් පසුව ඔවුන් ජාතික කණ්ඩායමෙන් ඉවත් කර තිබෙනවා.
සිද්ධිය පිළිබඳ වීඩියෝව තමා සහ පුහුණු කාර්ය මණ්ඩලය විසින් නැරඹීමෙන් පසුව මේ ක්‍රීඩකයන් තිදෙනා ස්ලොවේකියාව හා තුර්කිය සමග ඉදිරියේදී පැවැත්වෙන තරග සඳහා වන ඔස්ට්‍රියා කණ්ඩායමට ඇතුළත් නොකිරීමට තමා තීරණය කළ බව ඔස්ට්‍රියා ජාතික පාපන්දු කණ්ඩායමේ කළමනාකරු Ralf Rangnick ප්‍රකාශ කළා.
මේ ක්‍රීඩකයන් තමන්ගෙන් සමාව ඉල්ලා සිටි බවත් එහෙත් මිනිසුන්ට මේ ආකාරයෙන් ප්‍රසිද්ධියේ අවමන් කරමින් වෙනස්කම් කරන විට ඒ අයට දැනෙන වේදනාව ගැන තමාගේ ක්‍රීඩකයන් ඉතාමත් බරපතළ අන්දමින් සිතා බලනු දැකීමට තමාට උවමනා බව කළමනාකරු කියා සිටියා. “මගේ කණ්ඩායමේ මේ වගේ ක්‍රියාවන්ට මම ඉඩ දෙන්නේ නැහැ” යැයි ඔහු පැවසුවා.
Ralf Rangnick
‘මැන්චෙස්ට යුනයිටඩ්’ කණ්ඩායමේ හිටපු අන්තර් කළමනාකරු ද වූ Rangnick කීවේ තමා ගත් මේ තීරණය ස්ථිර එකක් නොවන බව. නමුත් මේ ක්‍රීඩකයන් ඔවුන් සිදුකළ ඒ ක්‍රියාවෙන් පාඩමක් ඉගෙන ගත් බව ඔප්පු කළ යුතුව තිබෙනවා.
“තමන් කළ මේ ක්‍රියාවෙන් කොතරම් ලොකු දෝංකාරයක් ඇතිවුනාද කියා ඔවුන් දැන් තේරුම් ගෙන සිටින නිසා කට තියෙන පළියට ඔහේ ‘සමාවෙන්න’ කියලා වැඩක් නැහැ” යැයි කළමනාකරු කියා සිටියා. “කෙනෙකුට කියන්න පුළුවන් මොනවාද කියන එක වැදගත් නැහැ. ඔබට ඕන දෙයක් කියන්න පුළුවන්. නමුත් තීරණාත්මක සාධකය වන්නේ ඔබේ හැසිරීමෙන් පෙන්නුම් කරන දෙයයි.”
Burgstaller
නිසැකව ම සිදුවූ මේ වැරදි හැසිරීම සම්බන්ධයෙන් Rapid Vienna සමාජයේ නායක Burgstaller මාර්ග ගතව සමාව ඉල්ලා සිටියා.
“සිදුවූ දේ ගැන සම්පූර්ණ වගකීම අපි බාර ගන්නවා. මේ ක්‍රියාව ගැන අපි ඉතාමත් කනගාටු වෙනවා. සමලිංගිකත්වයට කිසිම ආකාරයක වෙනස්කම් කිරීමකින් අපි සියළු දෙනා ඈත්වෙනවා. අපි මේ කාරණාව ගැන ක්‍රීඩා සමාජය තුළ අභ්‍යන්තරව කටයුතු කරනවා” යනුවෙන් ඔහු පැවසුවා.
Grull ද නිවේදනයක් නිකුත් කරමින් ඉදිරියේදී එන විපාක භාර ගන්නා බවත් ඇත්තෙන්ම ඒ පිළිබඳව සමාව ඉල්ලන බවත් ප්‍රකාශ කර තිබෙනවා.
Marco Grull
“මගේ සහෝදර ක්‍රීඩකයන් මෙන් මමත් මේ ක්‍රියාවන්ගෙන් හොඳට ම ඈත්වෙනවා. සමලිංගිකත්වයට එරෙහි වීමකට අපේ සමාජයේ තැනක් තියෙන්න බැහැ” යනුවෙන් ඔහු පවසා තිබෙනවා.
තරග ජයග්‍රහණයට පසු දිනයේ ම නිවේදනයක් නිකුත් කරමින් එම ක්‍රීඩා සමාජය මෙසේ ප්‍රකාශ කළා.
“අනවශ්‍ය හා අපහාසාත්මක පාඨ කියමින් කෑගසන අයුරු ඔබට ඇසෙන්න ඇති. දකින්නත් ඇති. ඒවා එහෙම නොවිය යුතුව තිබුනා. ඒ නිසා මුළු SK Rapid ක්‍රීඩා සමාජය ට ම කරන්න පුළුවන් එක ම දේ සමාව දෙන ලෙසට ඉල්ලා සිටීම පමණ යි.”
ඔස්ට්‍රියානු පාපන්දු ලීගය මේ ක්‍රීඩකයන් තිදෙනාට අමතරව සිද්ධියට සම්බන්ධ වූ ඔවුන්ගේ තවත් කණ්ඩායම් සගයන් දෙදෙනෙකු වන Thorsten Schick හා Maximilian Hofmann ද තාවකාලිකව තරග බිමෙන් ඉවත් කර තිබෙනවා.
ක්‍රීඩා සමාජයේ කළමනාකාර අධ්‍යක්ෂ Steffen Hofmann හා සහකාර පුහුණුකරු Stefan Kulovits ට ද ලීගය විනයානුකූල දඬුවම් පනවා තිබෙනවා.
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
