බර අඩුකරන ඖෂධ නිසා රූපලාවණ්‍ය ලෝකයේ නව පෙරළියක්

'Ozempic face' යනු ඖෂධයේ වරදක්ද?

දියවැඩියාව මෙන්ම ශරීරයේ අධික බර පාලනය වෙනුවෙන් නිර්දේශ කෙරෙන Ozempic, Wegovy සහ Zepbound වැනි GLP-1 කාණ්ඩයේ ඖෂධ මේ වන විට ගෝලීය රැල්ලක් බවට පත්ව තිබේ.

ආමාශය පිරී ඇති බවට මොළයට සංඥා කරමින් කෙටි කලකින් කුසගින්න පාලනය කිරීමට මේවා සමත් වෙයි.

මෙහි ප්‍රතිඵලයක් ලෙස මාස 4 ත් 6 ත් වැනි කෙටි කාලයක් තුළ ශරීරයේ බර විශාල වශයෙන් පහත වැටෙන අතර, මුහුණේ ස්වභාවික මේද පටක එකවර ක්ෂය වීමෙන් සම රැළි වැටී එල්ලා වැටීමේ තත්ත්වයක් හටගනී. සමාජය තුළ මෙය ‘Ozempic face’ ලෙස ප්‍රචලිත වුවද, එය ඖෂධය නිසා නොව හුදෙක් සීඝ්‍රයෙන් බර අඩුවීමේ ස්වභාවික ප්‍රතිඵලයක් බව විශේෂඥ වෛද්‍යවරු අවධාරණය කරති.

ඩොලර් බිලියන 2 ක සායනික ඉලක්කයක්

සීඝ්‍ර බර අඩුවීමත් සමඟ පාරිභෝගිකයින් මුහුණ දෙන මෙම ගැටලුව සම රැකවරණ ක්ෂේත්‍රයට අතිවිශාල වාණිජ අවස්ථාවක් විවර කර ඇති බව බොස්ටන් කන්සල්ටින් සමූහයේ (Boston Consulting Group) නවතම දත්ත පෙන්වා දෙයි.

එම වාර්තාවන්ට අනුව, ලිහිල් වූ සම තද කිරීම සහ මුහුණේ පිරුණු බව නැවත ලබාදීමේ සායනික ප්‍රතිකාරවල ආදායම ඉදිරි වසර පහ තුළ ඩොලර් මිලියන 700 සිට ඩොලර් බිලියන 2 දක්වා ඉහළ යනු ඇත.

ස්විට්සර්ලන්තයේ Galderma, ප්‍රංශයේ L'Oreal මෙන්ම බ්‍රසීලයේ Natura වැනි සමාගම් මේ වන විටත් GLP-1 ඖෂධ භාවිත කරන්නන් කේන්ද්‍ර කරගනිමින් පර්යේෂණ ආරම්භ කර තිබේ. ස්වභාවික කොලැජන් උත්තේජනය කරන Sculptra වැනි ප්‍රතිකාර සහ Hyaluronic acid අඩංගු ෆිලර්ස් (Fillers) මේ සඳහා වැඩි වශයෙන් යොමු කෙරෙමින් පවතී.

වයස්ගත වීම සහ පෝෂණ ඌනතාවේ යටිපෙළ

මෙම ඖෂධ භාවිත කරන බහුතරයක් දෙනා වයස අවුරුදු 50 ත් 64 ත් අතර පසුවන්නන් බව ඇමෙරිකානු සෞඛ්‍ය ප්‍රතිපත්ති සංවිධානය (KFF) පෙන්වා දෙයි.

ස්වභාවිකවම සිරුරේ කොලැජන් සහ ඊස්ට්‍රජන් හෝමෝන මට්ටම පහත වැටෙන මෙම වයස් කාණ්ඩයේ පිරිස් තුළ සම එල්ලා වැටීමේ අවදානම සාපේක්ෂව වැඩිය.

ඖෂධ ලබාගැනීමත් සමඟ ආහාර රුචිය අඩුවීම හේතුවෙන් සමේ පැවැත්මට අවශ්‍ය නිසි පෝෂ්‍ය පදාර්ථ නොලැබී යාම ද මුහුණේ දීප්තිය අඩුවීමට සහ කේඩෑරි පෙනුමක් එක්වීමට සෘජුවම බලපාන බව සෞඛ්‍ය ක්ෂේත්‍රයේ ප්‍රවීණයෝ පෙන්වා දෙති.

ක්‍රීම් වර්ගවලින් විසඳුම් සෙවිය හැකිද?

මුහුණේ ගැඹුරු මේද ස්ථර අහිමි වීම හුදු ආලේපන (Skin Creams) භාවිතයෙන් පමණක් යථා තත්ත්වයට පත් කළ නොහැකි බව චර්ම රෝග විශේෂඥ වෛද්‍යවරු පෙන්වා දෙති.

ආලේපන මඟින් සමේ බාහිර ස්ථරයේ නම්‍යශීලී බව තරමක් දුරට ආරක්ෂා කරගත හැකි වුවද, සම අභ්‍යන්තරයේ පිහිටි ගැඹුරු මේද පටක හෝ මුහුණේ අස්ථි-පේශි ව්‍යුහය යළි සකස් කිරීමට ඒවාට හැකියාවක් නැත.

මේ හේතුවෙන් රූපලාවණ්‍ය ක්ෂේත්‍රය හුදු ආලේපනවලින් ඔබ්බට ගොස්, සිරුර අභ්‍යන්තරයෙන් ක්‍රියාත්මක වන පෝෂණ අතිරේක (Supplements) සහ සායනික එන්නත් ඒකාබද්ධ වූ නව ප්‍රවේශයක් දෙසට සීඝ්‍රයෙන් යොමුවෙමින් පවතී. කෙසේ වෙතත්, සිරුරට කම්පනයක් ඇති නොවන පරිදි ක්‍රමවත්ව හා සෙමෙන් බර අඩුකර ගැනීම වඩාත් සෞඛ්‍යාරක්ෂිත ක්‍රමය බව වෛද්‍ය උපදෙසයි.

විශ්වාසනීය මූලාශ්‍ර සබැඳි :

Reuters: Beauty giants target 'Ozempic face' as boom in obesity drugs opens new market

Boston Consulting Group (BCG) Healthcare & Aesthetics Insights