Universal Woman සාර්ථක නිමාවෙන් පසු සිදු වූ හදිසි වියෝව ගැන පූර්ණ පරීක්ෂණයක් ඉල්ලා මවගෙන් පැමිණිල්ලක්
ශ්‍රී ලාංකේය විලාසිතා සහ නිරූපණ ක්ෂේත්‍රයේ ප්‍රමුඛ සලකුණක් වූ ප්‍රවීණ නිරූපණ ශිල්පිනී, රංගන ශිල්පිනී සහ මෝස්තර නිරූපණ උපදේශිකා චූලා පද්මේන්ද්‍ර කුමාරපතිරණ මහත්මියගේ හදිසි අභාවය පිළිබඳ පශ්චාත් මරණ පරීක්ෂණය අවසන් වීමෙන් පසු, දේහය භූමදානය සඳහා අධිකරණ වෛද්‍ය අනුමැතිය හිමිව තිබේ. ඒ අනුව ඇයගේ අවසන් කටයුතු හෙට (සැප්තැම්බර් 02) පස්වරු 5:00ට බොරැල්ල පොදු සුසාන භූමියේදී සිදුකිරීමට නියමිත බව පවුලේ ඥාතීහු තහවුරු කරති.
දේහය හෙට පෙරවරු 10:00 සිට බොරැල්ල ජයරත්න ‘රෙස්පෙක්ට්’ (Jayaratne VIP Respect Home) ශාලාවේදී මහජන ගෞරවය සඳහා තැන්පත් කර තැබීමට සියලු කටයුතු සූදානම් කර ඇත.
ජයග්‍රාහී රාත්‍රියකින් පසු සිදු වූ අනපේක්ෂිත වියෝව
කාන්තා නායකත්වය සහ පෞරුෂය ඇගයීමට ලක්කෙරෙන ‘Universal Woman Sri Lanka 2026’ ජාතික තරගාවලියේ ජාතික අධ්‍යක්ෂවරිය මෙන්ම ප්‍රධාන පුහුණු උපදේශිකාව ලෙස කටයුතු කරනු ලැබුවේ චූලා පද්මේන්ද්‍ර විසිනි. බත්තරමුල්ල වෝටර්ස් එජ් හෝටල් පරිශ්‍රයේදී පැවැති එම අතිඋත්කර්ෂවත් අවසන් මහා තරගය අගෝස්තු 30 වැනිදා රාත්‍රියේ සාර්ථකව නිමා විය.
එම උත්සවයෙන් අනතුරුව ඇය සිය සමීපතම හිතවතකු වන ප්‍රකට ඇඟලුම් සන්නාම හිමිකරුවකුගේ පිළියන්දල, වෑවල, ගංගාරාම පාරේ පිහිටි නිවස වෙත පැමිණ තිබේ. පසුදා (අගෝස්තු 31) උදෑසන ඇය නින්දෙන් අවදි නොවීම සහ කොට්ටය මත ලේ පැල්ලම් දක්නට ලැබීම හේතුවෙන් 1990 ‘සුව සැරිය’ ගිලන් රථ සේවය අමතා පරීක්ෂා කිරීමේදී ඇය ඒ වන විටත් ජීවිතක්ෂයට පත්ව සිටි බව අනාවරණය වී ඇත. මියයන විට ඇය 46 වන වියේ පසුවූවාය.
පූර්ණ විමර්ශනයක් ඉල්ලා මවගෙන් පොලිස් පැමිණිල්ලක්
මෙම හදිසි අභාවය සම්බන්ධයෙන් පිළියන්දල පොලිසිය මූලික විමර්ශන ආරම්භ කර ඇති අතර, සිද්ධිය පිටුපස කිසියම් සැකකටයුතු තත්ත්වයක් පවතින්නේද යන්න පිළිබඳව අපක්ෂපාතී හා පුළුල් පරීක්ෂණයක් පවත්වන ලෙස ඉල්ලමින් ඇයගේ මව විසින් පිළියන්දල පොලිස් ස්ථානය වෙත විධිමත් පැමිණිල්ලක් ඉදිරිපත් කර තිබේ.
ජාත්‍යන්තරය දිනූ නිරූපණ දිවිය සහ සිනමා සම්ප්‍රාප්තිය
වසර විස්සකට අධික කාලයක් මෙරට විලාසිතා ක්ෂේත්‍රයේ දැවැන්ත භූමිකාවක් නිරූපණය කළ චූලා පද්මේන්ද්‍ර, 2005 වසරේදී ‘Miss Intercontinental Sri Lanka’ කිරුළ දිනාගනිමින් ජාත්‍යන්තර තලයට පිවිසියාය. අනතුරුව 2006 වසරේ ටැන්සානියාවේ පැවති ‘Miss Tourism Model of the World’ තරගාවලියේ මාධ්‍ය සම්මානය (Media Award) දිනාගත් ඇය, ජර්මනියේ පැවති ‘Top Model of the World’ මෙන්ම ඉන්දියාව, සිංගප්පූරුව, ඩුබායි ඇතුළු රටවල් ගණනාවක ප්‍රමුඛ පෙළේ විලාසිතා සති (Fashion Weeks) නියෝජනය කරමින් ශ්‍රී ලංකා නාමය ඉදිරියට ගෙන ගියාය.
කලා ක්ෂේත්‍රය තුළ ‘වහින්න මුතු වැස්සක්’ ටෙලි නාට්‍යයෙන් ජනප්‍රියත්වයට පත් ඇය, ප්‍රවීණ කලාකරු ජැක්සන් ඇන්තනීගේ ‘ඇඩ්‍රස් නෑ’ චිත්‍රපටයේ ‘කාපිරි කමලා’ චරිතය හරහා සිනමා විචාරක පැසසුමට ලක්වූවාය. මීට අමතරව ‘ස්වර’, ‘Sweet Angel’, ‘ගින්දරී 2’ වැනි නිර්මාණ ඔස්සේද ඇය සිය රංගන කුසලතාව ප්‍රකට කළාය.
නව පරපුරට මඟපෙන්වූ දැවැන්ත සෙවණැල්ල
හුදෙක් නිරූපිකාවක පමණක් නොව ‘Chulpadmendra Catwalk Studio’ ඔස්සේ නවක පරපුරට Catwalk සහ වේදිකා පෞරුෂය පුහුණු කළ ප්‍රවීණ උපදේශිකාවක වූ ඇය, හිටපු ලෝක විවාහක රූ රැජින කැරොලින් ජූරි ඇතුළු වෘත්තිකයින් රැසකගේ ගුරුහරුකම් ලබාදුන් ප්‍රධාන චරිතයක් විය.
සිය පාසල් වියේ සිට සමීපතම මිතුරියක වූ ප්‍රවීණ නිරූපණ ශිල්පිනී රොසෑන් ඩයස් මාධ්‍ය වෙත අදහස් දක්වමින් සඳහන් කර සිටියේ, "චූලා කියන්නේ තමන් ක්ෂේත්‍රයෙන් ලබාගත් දේ නොමසුරුව පෙරළා නව පරපුරට සහ රටට දායාද කළ, අසාධාරණය හමුවේ සෘජුව පෙනී සිටි ඉතාම ආදරණීය මවක් සහ මානව හිතවාදී කාන්තාවක්" බවයි.
