තරුණයන්11 දෙනෙකු අතුරුදහන් කිරීම: හිටපු නාවික හමුදාපති ගැන අධිකරණය දුන් නියෝගය

ඒ අනුව ඔහු නැවත නඩුකරයට චුදිතයකු ලෙස ඇතුළත් කර චෝදනා පත්‍ර ගොනු කරන ලෙස කොටුව මහේස්ත්‍රාත් ඉසුරු නෙත්තිකුමාර අපරාධ පරීක්ෂණ දෙපාර්තමේන්තුවට නියෝග කර ඇත.

මෙම නඩුවට අදාළව මීට පෙර කරුණු විමසීමේදී නීතිපති ලබා දුන් උපදෙස් මත හිටපු මහේස්ත්‍රාත් විසින් රවින්ද්‍ර විජේගුණරත්නව නිදහස් කිරීමට පියවර ගෙන තිබිණි.

කෙසේ වෙතත්, එම නිදහස් කිරීමට එරෙහිව අගතියට පත් පාර්ශවය කළ දීර්ඝ කරුණු දැක්වීම් සලකා බැලූ මහේස්ත්‍රාත් ඉසුරු නෙත්තිකුමාර තීන්දු කර ඇත්තේ හිටපු මහේස්ත්‍රාත් ලබා දී ඇති එම නියෝගය දෝෂ සහගත බැවින් රවින්ද්‍ර විජේගුණරත්න යළිත් චුදිතයකු ලෙස නඩුවට ඇතුළත් කරන ලෙසය.

එමෙන්ම යුක්තිය ඉටු කිරීම සඳහා මැදිහත් වීමට නීතිපතිවරයාට ඇති වගකීම පිළිබඳව ද මහේස්ත්‍රාත්වරයා මෙහිදී දීර්ඝ වශයෙන් කරුණු අවධාරණය කර ඇත.

හිටපු නාවික හමුදාපති සහ හිටපු ත්‍රිවිධ හමුදා මාණ්ඩලික ප්‍රධානි අද්මිරාල් රවින්ද්‍ර විජේගුණරත්න එරෙහිව ඇති ප්‍රධාන චෝදනා වන්නේ තරුණයින් 11 දෙනෙකු පැහැරගෙන යාමේ සිද්ධියට අදාළව අධිකරණය මඟහරිමින් සිටි ලුතිනන් කමාන්ඩර් චන්දන ප්‍රසාද් හෙට්ටිආරච්චි නමැති සැකකරුට නාවික හමුදා නිවස්නය තුළ ආරක්ෂාව සැලසීම, අදාළ සැකකරුට නීතියෙන් බේරී රටින් පලායාමට අවශ්‍ය කටයුතු සූදානම් කර දීම යන චෝදනාය.

( lankatruth)