ශාන්ත සන්නස්ගල යන අයට එක් අයකුට රුපියල් 50,000 බැගින් වූ ශරීර ඇපයක් මත මුදා හැරීමට කොළඹ ප්‍රධාන මහේස්ත්‍රාත් නන්දන අමරසිංහ ඊයේ (මැයි 20) නියෝග කළේ ය.
මෙම සිද්ධියට අදාළව තවදුරටත් විමර්ශන පවත්වා නීතිපති උපදෙස් ලබා ගැනීමෙන් අනතුරුව ඉදිරි දින අධිකරණයට වාර්තාවක් ඉදිරිපත් කරන ලෙසට ද මෙහිදී මහේස්ත්‍රාත්වරයා අපරාධ බුද්ධි විශ්ලේෂණ හා නිවාරණ කොට්ඨාසය වෙත නියෝග කළේ ය.
මෙම සිද්ධිය සම්බන්ධයෙන් අධිකරණයේ පෙනී සිටින ලෙසට ඉකුත් අප්‍රේල් මස 29 වන දින නිකුත් කරන ලද නොතීසියකට අනුව සැකකරුවන් දෙදෙනා ඊයේ දින අධිකරණය හමුවේ පෙනී සිටි අවස්ථාවේදී මෙම නියෝගය නිකුත් කෙරිණි.
කරුණු සැලකිල්ලට ගත් මහේස්ත්‍රාත්වරයා මෙම නඩුව ලබන සැප්තැම්බර් මස 9 වන දින දක්‌වා කල් තැබීමට නියම කළේ ය.
‘බුදුන්ගේ රස්තියාදුව’ නම් ග්‍රන්ථය රචනා කර මුද්‍රණය කර බෙදා හැරීමේ කටයුතු කළැයි මෙම දෙදෙනා නඩුවේ සැකකරුවන් ලෙසට නම් කරන ලෙසට නීතිපතිවරයා උපදෙස් ලබා දී ඇති බවත් ඒ අනුව මෙම සැකකරුවන් දෙදෙනා අධිකරණය හමුවට ඉදිරිපත් වීමට නොතීසි නිකුත් කරන ලෙසත් ඉල්ලමින් අපරාධ බුද්ධි විශ්ලේෂණ හා නිවාරණ කොට්ඨාසය ඉකුත් අප්‍රේල් මස 29 වන දා අධිකරණයට කරුණු වාර්තා කර තිබිණි.
මෙම පොත මුද්‍රණය කර බෙදා හැරීම මගින් බුදු දහමට අපකීර්තියක් හා බුදුන්ගේ ශ්‍රේෂ්ඨ නාමයට අපකීර්තියක් සිදුවී ඇති බවත් එහි අන්තර්ගතය තුළ ඉතා පහත් සහ නිහීන ලෙස බුදුන් වහන්සේට නින්දා හා අපහාස කර ඇති බව ත් සඳහන් කරමින් 2018 අගෝස්තු මස 20 වන දින එවකට සංස්කෘතික කටයුතු අමාත්‍ය විජයදාස රාජපක්ෂ විසින් කරනු ලැබූ පැමිණිල්ලකට අනුව මෙම විමර්ශන ආරම්භ කළ බව අපරාධ බුද්ධි විශ්ලේෂණ හා නිවාරණ කොට්ඨාසය පසුගිය දින අධිකරණය හමුවේ වාර්තා කර තිබිණි.
