දරුවන් විකුණා ලයික් සොයන දෙමව්පියන්ට ඇමති සරෝජාගෙන් දැඩි නීති

ඩිජිටල් තිරය ඉදිරිපිට තම දරුවන් අනතුරුදායක අභියෝග, නුසුදුසු හැසිරීම් හෝ අසභ්‍ය වදන් භාවිතයට යොමුකරමින් 'වීව්ස්' (Views) සහ මුදල් ඉපැයීමේ ප්‍රවණතාව කඩිනමින් නැවැත්විය යුතු බව අමාත්‍යවරිය අවධාරණය කරයි.

ළමුන් වාණිජ භාණ්ඩයක් බවට පත්කරන මෙවැනි අන්තර්ජාල සංස්කෘතීන් පාලනය කිරීම උදෙසා තම අමාත්‍යාංශය නව නීති සකස් කරමින් සිටින බව ඇය සඳහන් කළාය.

දෙමාපියන්ට අසීමිත අයිතියක් නෑ

අන්තර්ජාල අවධානය උදෙසා දරුවන් අනතුරුදායක ස්ථානවලට ගෙනයාම, වැඩිහිටියන්ට පමණක් සුදුසු දෑවලට ඈඳාගැනීම මෙන්ම ලිංගික මුහුණුවරක් සහිත අන්තර්ගතයන්ට නිරාවරණය කිරීමේ බරපතළ අවදානමක් පවතින බව අමාත්‍යවරිය පෙන්වා දෙයි.

දරුවෙකුගේ පෞද්ගලිකත්වය ප්‍රසිද්ධියේ වෙන්දේසි කිරීමට දෙමව්පියන්ට වුවද කිසිදු අසීමිත අයිතියක් නොමැති බව ඇයගේ ස්ථාවරයයි.

ප්‍රසිද්ධිය හෝ ප්‍රචාරණය තෝරාගැනීමේ පූර්ණ නිදහස තිබිය යුත්තේ අදාළ දරුවා පරිණතභාවයට පත්වූ පසුව බවත්, එය වැඩිහිටියන්ගේ බලහත්කාරී තීරණයක් නොවිය යුතු බවත් ඇය අවධාරණය කළාය.

භාරකාරීත්වය අහිමිවීමේ අවදානමක්

මුදල් සහ ජනප්‍රියත්වය උදෙසා දරුවන් දිගින් දිගටම අවදානමට ලක්කරන දෙමාපියන් සම්බන්ධයෙන් නීතිය ක්‍රියාත්මක කිරීමට පසුබට නොවන බව අමාත්‍යවරිය අනතුරු අඟවයි.

එවැනි ක්‍රියා මඟින් මූලික දෙමාපිය වගකීම් පැහැරහැර ඇති බව තහවුරු වුවහොත්, අදාළ දරුවන් 'ආරක්ෂාව අවශ්‍ය ළමුන්' (Children requiring protection) ලෙස නම් කිරීමට පියවර ගැනේ.

එපමණක් නොව, දරුවාගේ උපරිම යහපත හා ආරක්ෂාව වෙනුවෙන් අවශ්‍ය වුවහොත් නෛතික භාරකාරීත්ව ක්‍රමවේද (Protective guardianship) ක්‍රියාත්මක කිරීමට සිදුවන බව ඇය පැහැදිලි කරයි.

ජාතික ළමාරක්ෂක අධිකාරියෙන් නව මාර්ගෝපදේශ

ළමා හිතකාමී මාධ්‍ය සංස්කෘතියක් බිහිකිරීම සඳහා වන මාර්ගෝපදේශ මාලාවක් ජාතික ළමාරක්ෂක අධිකාරිය (NCPA) සහ විශේෂඥ මණ්ඩලයක් එක්ව මේ වන විට අවසන් අදියරට ගෙනැවිත් තිබේ.

ළමුන් සමාජ මාධ්‍ය තුළ වාණිජකරණය වීම හෙවත් 'Kidfluencing' වැළැක්වීමට ප්‍රංශය සහ අමෙරිකාවේ කැලිෆෝනියා ප්‍රාන්තය වැනි රටවල්ද දැනටමත් මෙවැනි දැඩි නීති පනවා ඇත.

දෙමාපියන්ගේ පෞද්ගලික ආශාවන්ට වඩා දරුවාගේ සුභසාධනය හා අනාගත ආරක්ෂාව පෙරට තබන ශක්තිමත් නීතිමය රාමුවක් මෙරට ක්‍රියාත්මක කිරීම රජයේ මූලික අරමුණයි.