AI තාක්ෂණය, නවීන පර්යේෂණ සහ සෞඛ්‍ය ක්ෂේත්‍රයේ නව අභියෝග හමුවේ රෝගී සත්කාරය මානුෂීය හා ඵලදායී අයුරින් නංවාලීම අරමුණු කරගනිමින් දේශීය හා විදේශීය වෛද්‍ය විශේෂඥයන් එකම වේදිකාවකට එක්වෙති.
“පුද්ගල කේන්ද්‍රීය සත්කාරය තුළින් සෞඛ්‍ය විශිෂ්ටත්වය ළඟා කර ගැනීම” යන තේමාව පෙරදැරි කරගනිමින් ලංකා කායික රෝග විශේෂඥ වෛද්‍යවරුන්ගේ විද්‍යායතනයේ (Ceylon College of Physicians) 59 වන සංවත්සර අධ්‍යයන සම්මන්ත්‍රණය 2026 සැප්තැම්බර් 16 සිට 19 දක්වා කොළඹ ෂැංග්‍රි-ලා හෝටලයේදී පැවැත්වීමට නියමිතය. ලංකා කායික රෝග විශේෂඥ වෛද්‍යවරුන්ගේ විද්‍යායතනයේ සභාපති මහාචාර්ය නාමල් විජේසිංහ සහ විද්‍යායතන කවුන්සිලය මෙම අධ්‍යයන උළෙලේ අභිමානවත් හවුල්කරුවකු වීමට වෛද්‍ය වෘත්තික ප්‍රජාවට ආරාධනා කරති.
වෛද්‍ය විද්‍යාවේ නව දැනුම හුවමාරු කර ගැනීමටත්, නවතම වෛද්‍ය ප්‍රවණතා පිළිබඳව ගැඹුරින් සාකච්ඡා කිරීමටත්, ලොව පුරා සිටින වෛද්‍ය හා සෞඛ්‍ය සේවා වෘත්තිකයන් එකම වේදිකාවකට ගෙන ඒම මෙම අධ්‍යයන සම්මන්ත්‍රණයේ ප්‍රධාන අරමුණකි.
සෑම වසරකම පැවැත්වෙන මෙම අධ්‍යයන සැසි මාලාව වෛද්‍යවරුන්ට තම දැනුම යාවත්කාලීන කර ගැනීමට සේම, නව අදහස් හඳුනා ගැනීමට, අත්දැකීම් හුවමාරු කර ගැනීමට සහ වෘත්තීය සබඳතා ශක්තිමත් කර ගැනීමටද මහඟු අවස්ථාවක් සලසා දෙයි.
පළපුරුදු වෛද්‍යවරුන්, විශ්වවිද්‍යාල ආචාර්යවරුන්, පර්යේෂකයන්, පශ්චාත් උපාධි පුහුණුව ලබන වෛද්‍යවරුන් මෙන්ම අනෙකුත් සෞඛ්‍ය සේවා වෘත්තිකයන් රැසක් මෙවර වැඩසටහනට එක්වීමට නියමිතය.
තාක්ෂණික දියුණුව හමුවේ නැගෙන සෞඛ්‍ය අභියෝග
වර්තමාන වෛද්‍ය විද්‍යාව පෙර නොවූ විරූ වේගයකින් ඉදිරියට යමින් පවතී. රෝග නිර්ණය කිරීමේ නවීන ක්‍රම, නව ප්‍රතිකාර, ඩිජිටල් සෞඛ්‍ය සේවා, වෛද්‍ය පර්යේෂණ සහ කෘත්‍රිම බුද්ධිය වැනි නව තාක්ෂණයන් සෞඛ්‍ය සේවාව ලබා දෙන ආකාරය පවා ප්‍රවර්ධනය කරමින් සිටී.
එහෙත්, මෙම ප්‍රගතිය සමඟම සෞඛ්‍ය ක්ෂේත්‍රය මුහුණ දෙන අභියෝගද වැඩි වෙමින් පවතී. බෝ නොවන රෝග, නව ආසාදිත රෝග, ප්‍රතිජීවක ඖෂධවලට එරෙහි ප්‍රතිරෝධය, දේශගුණික විපර්යාස, වයස්ගත වන ජනගහනය සහ සෞඛ්‍ය සේවා සඳහා ඉහළ යන ඉල්ලුම ඒ අතර ප්‍රධාන වේ.
මෙවැනි වේගවත් කාලීන වෙනස්කම් හමුවේ වෛද්‍යවරුන්ට තම වෘත්තීය දැනුම අඛණ්ඩව යාවත්කාලීන කර ගැනීම අත්‍යවශ්‍ය කරුණක් වී තිබේ. ඒ නිසාම අඛණ්ඩ වෘත්තීය සංවර්ධනය සහ ජීවිතාන්තය දක්වා ඉගෙනීම නූතන වෛද්‍ය වෘත්තියේ අත්‍යවශ්‍ය අංග බවට පත්ව තිබේ.
ලෝකයේ ප්‍රමුඛ වෛද්‍ය විද්‍යායතන සමග ජාත්‍යන්තර සබඳතා
මෙවර අධ්‍යයන සම්මන්ත්‍රණයේ තවත් වැදගත් අංගයක් වන්නේ ජාත්‍යන්තර වෛද්‍ය ආයතන සමඟ ඇති කරගෙන තිබෙන සහයෝගීතාවයි.
ලන්ඩනයේ රාජකීය වෛද්‍ය විද්‍යායතනය, එඩින්බරෝ රාජකීය වෛද්‍ය විද්‍යායතනය, ග්ලාස්ගෝ රාජකීය වෛද්‍ය හා ශල්‍ය වෛද්‍ය විද්‍යායතනය, යුරෝපීය කායික වෛද්‍ය විද්‍යා සම්මේලනය, මැලේසියානු වෛද්‍යවරුන්ගේ විද්‍යායතනය, ඉන්දියානු වෛද්‍යවරුන්ගේ සංගමය, පකිස්තාන කායික වෛද්‍ය විද්‍යා සංගමය, බංග්ලාදේශ කායික වෛද්‍යවරුන්ගේ සංගමය සහ නේපාල කායික වෛද්‍ය විද්‍යා සංගමය මෙම වැඩසටහන සංවිධානය කිරීම සඳහා ලංකා කායික රෝග විශේෂඥ වෛද්‍යවරුන්ගේ විද්‍යායතනය සමඟ නිල වශයෙන් එක්ව සිටී.
මෙවැනි ජාත්‍යන්තර සබඳතා හරහා විශේෂඥ දැනුම හුවමාරු කර ගැනීමටත්, ඒකාබද්ධ පර්යේෂණ සිදු කිරීමටත්, වෘත්තීය සංවර්ධනය සඳහා නව අවස්ථා සොයා ගැනීමටත් හැකි වේ. විවිධ රටවල සෞඛ්‍ය සේවා සහ වෛද්‍ය අධ්‍යාපන ක්‍රම පිළිබඳ අත්දැකීම් හුවමාරු කර ගැනීම තුළින් ශ්‍රී ලාංකික වෛද්‍යවරුන්ගේ වෘත්තීය දැක්ම තවදුරටත් පුළුල් කළ හැකිය.
එමෙන්ම, ශ්‍රී ලංකාවේ වෛද්‍යවරුන් සතු සායනික අත්දැකීම්, පර්යේෂණ දැනුම සහ විශේෂඥතාව ද ජාත්‍යන්තර වෛද්‍ය ප්‍රජාව සමඟ බෙදා ගැනීමට මෙය මාහැඟි අවස්ථාවකි.
තරුණ වෛද්‍යවරුන් සහ පර්යේෂණ ක්ෂේත්‍රයේ අනාගතය
පර්යේෂණය වෛද්‍ය විද්‍යාවේ ඉදිරි ගමන සඳහා ඉටු කරන්නේ අතිශය වැදගත් කාර්යභාරයකි. එබැවින් පර්යේෂණ ප්‍රතිඵල ඉදිරිපත් කිරීම, ඒවා පිළිබඳ විද්‍යාත්මක සාකච්ඡා පැවැත්වීම සහ නව පර්යේෂණ සහයෝගීතා ඇති කර ගැනීම සඳහාද මෙම අධ්‍යයන සැසි අවකාශ සලසා දෙයි.
විශේෂයෙන්ම තරුණ වෛද්‍යවරුන් පර්යේෂණ හා ශාස්ත්‍රීය කටයුතුවලට යොමු කිරීම වෛද්‍ය වෘත්තියේ අනාගතය වෙනුවෙන් කරන අනගි ආයෝජනයකි. නව පරපුරේ වෛද්‍යවරුන් තුළ විද්‍යාත්මක චින්තනය, පර්යේෂණ හැකියාව සහ නවෝත්පාදන පිළිබඳ උනන්දුව වර්ධනය කිරීම තුළින් අනාගත සෞඛ්‍ය සේවාව තවදුරටත් ශක්තිමත් කළ හැකිය.
තාක්ෂණය කොතෙක් දියුණු වුවත් අවසන් අරමුණ රෝගියාගේ යහපතයි
නව තාක්ෂණය, විද්‍යාත්මක සොයාගැනීම් සහ වෛද්‍ය විද්‍යාවේ වේගවත් දියුණුව කොතරම් වැදගත් වුවද, වෛද්‍ය වෘත්තියේ අවසාන අරමුණ රෝගියාගේ යහපතයි.
අධ්‍යයන හා පර්යේෂණ තුළින් ලබාගන්නා නව දැනුම අවසානයේදී රෝගියාට ලැබෙන සත්කාරය වඩාත් ආරක්ෂිත, ඵලදායී, සාධාරණ සහ මානුෂීය බවට පත් කිරීමට යොදාගත යුතුය.
ඒ අනුව, “පුද්ගල කේන්ද්‍රීය සත්කාරය තුළින් සෞඛ්‍ය විශිෂ්ටත්වය ළඟා කර ගැනීම” යන මෙවර තේමාව වෛද්‍ය විද්‍යාවේ සැබෑ අරමුණ අපට නැවත සිහිපත් කරයි. නව දැනුම සොයා යාම, එය හුවමාරු කර ගැනීම සහ සහයෝගීතාවයෙන් ඉදිරියට යාම සිදු විය යුත්තේ අවසානයේදී මිනිස් ජීවිත වඩාත් සුරක්ෂිත කිරීම සහ රෝගීන්ට වඩාත් යහපත් සත්කාරයක් ලබා දීම සඳහාය.
මෙම 59 වන සංවත්සර අධ්‍යයන සැසි යනු තවත් වාර්ෂික වෛද්‍ය සමුළුවක් පමණක් නොවේ. එය දැනුම, විශිෂ්ටත්වය, පර්යේෂණය සහ ජාත්‍යන්තර සහයෝගීතාව තුළින් අනාගත වෛද්‍ය සේවාව වඩාත් යහපත් කිරීම සඳහා වෛද්‍ය වෘත්තිය දක්වන අඛණ්ඩ කැපවීමේ සංකේතයකි.
| vinivida.lk
