ජාත්‍යාන්තර මූල්‍ය අරමුදලේද (IMF) විශේෂ අවධානය යොමුව ඇතැයි වාර්තාවේ.
සිද්ධිය සම්බන්ධයෙන් මුදල් අමාත්‍යාංශයේ ලේකම්වරයා කළ ප්‍රකාශය මෙන්ම ඒ කාරණය පිළිබඳව පැවැත්වෙන විමර්ශන පිළිබඳවද එම අරමුදල අවධානයෙන් පසුවන බව ආරංචි මාර්ග සඳහන් කළේය.
ජාත්‍යන්තර මූල්‍ය අරමුදල ශ්‍රී ලංකාව 2022 වසරේදී අත්විඳි ආර්ථික අර්බුදයෙන් ගොඩ ඒම සඳහා අඛණ්ඩව මූල්‍ය ආධාර සපයයි.
මෙම මුදල් සොරකම සම්බන්ධයෙන් අපරාධ පරීක්ෂණ දෙපාර්තමේන්තුව මෙන්ම මුදල් අමාත්‍යාංශයද වෙන වෙනම පරීක්ෂණ ආරම්භ කර ඇත.
සිද්ධිය සම්බන්ධයෙන් විපක්ෂයෙන් ආණ්ඩුවට දිගින් දිගටම චෝදනා එල්ල වෙමින් පවතී. විපක්ෂය ඉදිරි පාර්ලිමේන්තු රැස්වීම්වලදීද මේ පිළිබඳව ප්‍රශ්න කිරීමට නියමිතව ඇතැයි ආරංචි මාර්ග සඳහන් කළේය.
මුදල් සොරාගැනීම පිළිබඳ සම්පූර්ණ වාර්තාවක් පාර්ලිමේන්තුවට දුන්නා - භාණ්ඩාගාර ලේකම්
මේ අතර භාණ්ඩාගාර ලේකම්, ආචාර්ය හර්ෂණ සූරියප්පෙරුම පවසන්නේ, මුදල් අමාත්‍යාංශයේ විදේශ සම්පත් දෙපාර්තමේන්තුවේ පරිගණක පද්ධතියට ඇතුළු වූ සයිබර් අපරාධකරුවන් පිළිබඳ විමර්ශන අන්තර්ජාතික විශේෂඥයන්ගේ සහය ඇතිව සිදු කරන බවයි.
ඒ මුදල් නැවත අය කර ගැනීමට කළ හැකි සියල්ල සිදු කර ඇති බව ඔහු සඳහන්ත් කළේය.
අමාත්‍යාංශ ලේකම්වරයා ප්‍රකාශ කළේ ශ්‍රී ලංකාව විදේශයන්ට ගෙවිය යුතු ණය ප්‍රතිව්‍යූහගත කිරීමේ ක්‍රියාවලියට තාක්ෂණික සහ නීතිමය වශයෙන් උපදෙස් ගැනීමට පත් කර ගනු ලැබූ අන්තර්ජාතික විශේෂඥයන්ගේ සහයද මේ සඳහා ලබා ගැනීමට අපේක්ෂා කරන බවයි.
“මේ සොරකම සම්බන්ධයෙන් අමාත්‍යාංශය විසින් නීතිය බලාත්මක කරන ආයතන සහ අදාළ අනෙකුත් අංශ දැනුවත් කිරීමට පියවර ගෙන තියනවා. මහා භාණ්ඩාගාරයේ නියෝජ්‍ය ලේකම්වරුන් දෙදෙනකු ඇතුළු නිලධාරි කමිටුවක් පත් කර, සිද්ධිය සම්බන්ධයෙන් අභ්‍යන්තර පරීක්ෂණයක් සිදු කොට, හඳුනාගත් අයට නීත්‍යනුකූලව විනය පියවර ගෙන තියෙනවා.''
'' සයිබර් අපරාධය සම්බන්ධයෙන් මුදල් අමාත්‍යාංශය සකස් කළ විශේෂ වාර්තාවක් පාර්ලිමේන්තුවට භාර දුන්නා” යයි ද භාණ්ඩාගාර ලේකම් ආචාර්ය හර්ෂණ සූරියප්පෙරුම වැඩි දුරටත් පැවසීය.
