තල් සංවර්ධන මණ්ඩලයේ සභාපති ධුරයට පසුගිය ඔක්තෝබර් 10 වැනිදා සෙල්වින් ඉරේනියස් මරියම්පිල්ලෙයි පත්කර තිබුණු අතර ඊට දින 12කට පසුව ඔක්තෝබර් 22 වැනි දින ඔහුව ඉවත්කිරීමෙන් පසු වී. සහදේවන් පත්කෙරිණි.
නමුත් එම පත්කිරීමට එරෙහිව විරෝධතා රැසක් එල්ලවූ අතර ඔහු දූෂිත පුද්ගලයකු බව සඳහන් කරමින් තල් සංවර්ධන මණ්ඩලයේ යාපනය කාර්යාලයේ සේවක සේවිකාවෝ යාපනයේදී විරෝධතාවයක ද නිරත වූහ.
ඔහුට එම තනතුර දැරීමට කිසිදු සුදුසුකමක් නොමැති බැවින් වහාම ජනාධිපතිවරයා විසින් ඔහුව තනතුරෙන් ඉවත් කළ යුතු බව පවසමින් විරෝධතාවයේ නිරත වූ සේවක සේවිකාවන් මේ සම්බන්ධයෙන් තොරතුරු සඳහන් කරමින් ජනාධිපතිවරයා වෙත ලිපියක්ද යොමුකර තිබිණ.
සභාපතිට එරෙහිව තල් සංවර්ධන මණ්ඩලයේ යාපනය කාර්යාලයේ සේවක සේවිකාවෝ යාපනයේදී විරෝධතාවයක
විෂය භාර අමාත්‍ය සමන්ත විද්‍යාරත්න විසින් ඔහුව වහාම තනතුරින් ඉවත් කිරීමට පියවර ගෙන ඇත්තේ, ඔහුට එරෙහි චෝදනා සම්බන්ධයෙන් අමාත්‍යංශය මට්ටමින් සිදුකල විමර්ශනයකින් අනතුරුවය.
තල් සංවර්ධන මණ්ඩලයේ සභාපති විනයාගමූර්ති සහදේවන් ගේ අවිධිමත් පරිපාලනය සම්බන්ධයෙන් ඇමැතිවරයා විසින් මීට පෙරද ඔහුට තරයේ අවවාද කර තිබිණි.
මණ්ඩලයේ දූෂණ වංචාවලට සම්බන්ධ පුද්ගලයන් නැවත සේවයේ පිහිටුවීම, අධ්‍යක්ෂ මණ්ඩලයේ උපදෙස් නොතකා කටයුතු කිරීම සහ වාර්ෂික වාර්තා බාරදීමට කටයුතු නොකිරීම ආදී චෝදනා රැසක් සභාපතිවරයාට එල්ලවී ඇතැයි අමාත්‍යාංශ ආරංචි මාර්ග සඳහන් කළේය.
තවද දූෂණ චෝදනා සහිත සේවකයන් සම්බන්ධව කොළඹ ප්‍රධාන කාර්යාලයේ තිබෙන ලිපි ගොනු යාපනය කාර්යාලයට රැගෙන යාමට එම සේවකයන්ම යෙදවීමට මෙම සභාපතිවරයා කටයුතු කර ඇති බවට තොරතුරු ලැබී ඇතැයි ද වාර්තා වේ.
