අභිචෝදක කාර්යාල යෝජනාවට විරුද්ධ වෙන්නැයි ගම්මන්පිල ජනතාවගෙන් ඉල්ලයි

ම අභිචෝදක කාර්යාල යෝජනාවට විරුද්ධ වෙන ලෙස ඉල්ලා සිටින්නේ යැයි පිවිතුරු හෙළ උරුමය පක්ෂ නායක උදය ගම්මන්පිල පැවසී ය.

ඔහු මෙම අදහස් පළ කළේ එම පක්ෂය අද (17) කැඳවා තිබූ මාධ්‍ය හමුවේ දී ය.

එම මාධ්‍ය හමුවේ දී වැඩි දුරටත් අදහස් දැක්වූ උදය ගම්මන්පිල...

අභිචෝදක කාර්යාලය යනු කුමක් ද...?

''ස්වාධීන අභිචෝදක කාර්යාලයක් පිහිටුවීමේ ආණ්ඩුවේ වෑයමට නිල වශයෙන් සිය විරෝධය පළ කරන්න නීතිපති දෙපාර්තමේන්තුවේ නීති නිලධාරින්ගේ සංගමය තීරණය කරලා.  ඒ අභීත තීන්දුවට අපි නීති නිලධාරින්ගේ සංගමයට හිස නමා ආචාරය පුද කරනවා.  යුක්තිය පසඳලීමේ ක්‍රියාවලියේ ස්වාධීනත්වය රැක ගන්න අපිට මතක ඉතිහාසයේ ප්‍රථම වතාවට තමයි නීති නිලධාරින්ගේ සංගමය මැදිහත් වෙන්නේ. ඒක ඉතාම හොඳ ප්‍රවණතාවයක්.

මොකක්ද මේ අභිචෝදක කාර්යාලයක් කියන්නේ? නීතිපති දෙපාර්තමේන්තුව දැනට ප්‍රධාන රාජකාරි දෙකක් කරනවා. එකක් තමයි ආණ්ඩුවේ නීතිඥයා ලෙස කටයුතු කිරීම. දෙවැනි එක තමයි අපරාධ නඩු වලදී අධිකරණයේ දී චෝදනා ගොනු කිරීමේ අභිචෝදක ලෙස කටයුතු කිරීම. මෙන්න මේ වගකීම නීතිපති දෙපාර්තමේන්තුවෙන් ගලවලා අලුත් ම ආයතනයකට භාර දෙන්න තමයි ආණ්ඩුව උත්සාහ කරන්නේ.

බෙදුම්වාදින් ගේ උත්සාහය

කොටි ත්‍රස්තවාදය පරාජය කරලා අපේ රටට සාමය උදා කරපු රණවිරුවන් සමග බෙදුම්වාදි බලවේග ඉන්නේ දැවැන්ත වෛරයකින්.  ඒ නිසා තමන්ගේ සිහින බොඳ කරපු රණවිරුවන්ගෙන් පළි ගැනීමට ඔවුන්ට විරුද්ධව අපරාධ නඩු පැවරීමේ වෑයමක බෙදුම්වාදින් යෙදී ඉන්නේ යුද පරාජය අත් වුණු දවසේ ඉඳන්ම යි. නමුත් කෙතරම් මුදල් වැය කලත් කෙතරම් බලපෑම් කලත් නීතිපති දෙපාර්තමේන්තුව රණවිරු දඩයමට නම්මා ගැනීමට ඔවුන්ට බැරි වුණා.  නිලධාරින් කිහිපදෙනෙක් රණවිරු දඩයමට බෙදුම්වාදින්ගේ පැත්තේ හිට ගත්තත් දෙපාර්තමේන්තුවක් විධියට සමස්තයත් විශේෂයෙන් ම නීතිපතිවරුත් යුක්තිය පැත්තේ හිට ගත්තා. විශේෂයෙන්ම වර්තමාන නීතිපතිතුමා කොන්ද කෙළින් තියා ගෙන බොරු අත්අඩංගුවට ගැනීම් බොරු නඩු පැවරීම් අවස්ථා ගණනාවක දී ප්‍රතික්ෂේප කරපු බව අපි දන්නවා.  ජනාධිපතිතුමා නීතිපතිතුමාව තමන් ගාවට ගෙන්නා ගෙන නඩු පිළිබඳ ප්‍රශ්න කළා කියලත් මාධ්‍යවල වාර්තා වුණා නෙ...  

ඒ නිසා නීතිපති දෙපාර්තමේන්තුව හරහා රණවිරු දඩයම කරන්න බෑ කියලා බෙදුම්වාදින් තේරුම් අරගෙන ඉන්නේ. අන්න ඒ නිසා තමයි අභිචෝදක කාර්යාලයක් පිහිටුවීම හරහා අපරාධ නඩු පැවරීම නීතිපති දෙපාර්තමේන්තුවෙන් ගලවලා ඉවතට ගන්න බෙදුම්වාදින් හදන්නේ.

වයින් බෝතලයක් තනියම බිව්ව ජපන් ජෙප්පා

බෙදුම්වාදි බලවේග එක පැත්තකින් තමන්ට නටවන්න පුළුවන් ලංකාවේ දේශපාලන බලවේගවල මැතිවරණ ප්‍රකාශන ඇතුළට ඔය අභිචෝදක කාර්යාලය පිහිටුවීම දානවා.  අනිත් පැත්තෙන් මානව හිමිකම් සභාවේ ලංකාවට එරෙහිව ඉදිරිපත් කරන යෝජනාවලට බටහිර බලවතුන් හරහා මේ යෝජනාව දානවා.  2015 සිට ම ලංකාවට එරෙහිව ගෙනා යෝජනාවල මේ අභිචෝදක කාර්යාලය පිහිටුවීම දකින්න පුළුවන්.

නීතිපති දෙපාර්තමේන්තුවේ නිලධාරින් වරදක් නොකළොත් ජ්‍යෙෂ්ඨත්වය මත උසස්වීම් ලබනවා.  ඒ නිසා දේශපාලන මැදිහත්වීම් කරන්න අවස්ථාව අඩුයි.  නමුත් අලුතින් අභිචෝදක කාර්යාලයක් පිහිටුවීමේ දී නීතිපති බෑ කියන දේශපාලන නඩු වගේ ම රණවිරු නඩු පවරන්න කැමැති වෙන පක්ෂයේ හෙංචයියන් ඒකට පත් කර ගන්න පුළුවන්.   වයින් බෝතලයක් තනියම බිව්ව ජපන් ජෙප්පා වගේ අයව නඩු දාලා සතුටු කරන්න එතකොට ආණ්ඩුවට පුළුවන්.

21දා නුගේගොඩ රැස්වීමේ ප්‍රචාරක කටයුතු ජනාධිපතිතුමා ඇතුළු මාලිමාව භාර අරගෙන

අපි 21වෙනි දා නුගේගොඩ පවත්වන රැස්වීමේ ප්‍රචාරක කටයුතු ජනාධිපතිතුමා ඇතුළු මාලිමාව භාර ගැනීම අපට ලොකු සහනයක්.  ජනාධිපතිතුමා අයවැය ප්‍රකාශයට පත් කරන්න පාර්ලිමේන්තු ගියාම කතා කරන්නෙත් නුගේගොඩ රැස්වීම ගැන.  ඉල්විරු සැමරුමට ගියාම කතා කරන්නෙත් නුගේගොඩ රැස්වීම ගැන.  එතුමන්ලාට පින් සිද්ධ වෙන්න දැන් මේ රැස්වීම ගැන නොදන්නා කෙනෙක් නෑ. හොරු අල්ලනවාට බයේ කරන රැස්වීමක් කියලා ජනාධිපතිතුමා නුගේගොඩ රැස්වීම ගැන චෝදනා කළා.  අපි අතර හොරු ඉන්නවා නම් කරුණාකර අත්අඩංගුවට ගන්න.  ඒකට අපෙන් කිසිම බාධාවක් නෑ.  

අපි රැස්වීමක් කළා කියලා හොරු ඇල්ලීමට ඒකෙන් බාධාවක් වෙන්නේ කොහොමද කියන එක අපට නම් ප්‍රහේලිකාවක්. විශේෂයෙන් ම නුගේගොඩ රැස්වීම හොරු නඩුවලින් මිදෙන්න කරන උත්සහයක් ලෙස ජනාධිපතිවරයා ඇතුළු ආණ්ඩුවේ මැතිඇමතිවරු සඳහන් කිරිම අධිකරණයට කරන අපහාසයක් විදියටයි අපි දකින්නේ. ඇයි නුගේගොඩ අපි ලොකු රැස්වීමක් කරලා සෙනඟ පෙන්නුවාම අපෙ වරදක් කරපු අයෙක් ඉඳලා නිදහස් වෙන්න පුළුවන් නම් මොකක්ද ඒකෙන් කියන්නේ නඩුකාරතුමන්ලා නඩුවල තීන්දු දෙන්නේ උසාවියේ ඉදිරිපත් වන කරණු අනුව නෙමෙයි; රැස්වීම්වල ඉන්න සෙනඟ අනුව කියලා.

සමන්ත ඇමතිට ඩිමෙන්ෂියා...?

ඉල් විරු සමරුවට ගිය සමන්ත විද්‍යාරත්න ඇමතිතුමා කියනවා 21වෙනි දා නුගේගොඩ රැස්වීමට 5,000ක් එන්නේ නෑ කියලා.  එතුමන්ලා හිතා ගෙන ඉන්නේ මේ ආණ්ඩුව තවමත් හරිම ජනප්‍රියයි කියලා.  පාර්ලිමේන්තු මැතිවරණයයි පළාත් පාලන මැතිවරණයයි අතර ගත වුණු මාස හයට 34%ක්ම ඡන්ද අඩු වුණා කියන එක මේ අයට අමතක වෙලා.  ඩේසි ආච්චිට ඩිමෙන්ෂියා හැදුණේ අවුරුදු 98 දී වුණත් සමන්ත ඇමතිතුමාට හැට වෙන්නත් කලින් ඩිමෙන්ෂියා හැදිලා කියලයි පේන්නේ.

මේ ආණ්ඩුව බලයට පත් වෙලා දැන් මාස 14ක්. පෝය 16ක්.  මේ රටේ ජනතාව මාලිමාවට ඡන්දය දුන්නේ අවුරුදු පහ පුරාවටම “ඔබයි දිනුම්” චිත්‍රපටිය තිරගත කරාවි කියන බලාපොරොත්තුවෙන් හැබැයි බලයට පත් වුණු දවසේ ඉඳන් අද වන තුරු තිරගත කරන්නේ “කඩවුණු පොරොන්දුව” විතරයි.  ඒ නිසා අපේක්ෂා භංගත්වයට පත් වුණු ජනතාව දුන් පොරොන්දු ඉටු කරනු කියලා ආණ්ඩුවට බල කරන්න 21වෙනි දා නුගේගොඩට ඇවිත් නුගේගොඩ එකම හිස් ගොඩක් කරාවි කියලා අපි බලාපොරොත්තු වෙනවා.

ජනතාව 21 නුගේගොඩට එන හේතු

පළමු අයවැයෙන් ම පාසල් උපකරණවලට, වෛද්‍ය පරීක්ෂණවලට, ආහාර ද්‍රව්‍යවලට, තිබෙන වැට් බද්ද ඉවත් කරනවා කියලා පොරොන්දු වුණා.  පළමු අයවැයෙන් නොවේ දෙවන අයවැයෙන්වත් ඒක කලේ නෑ.  විදුලි බිලෙන් තුනෙන් එකක් අඩු කළෙත් නෑ.  පෙට්‍රල් සහ ඩීසල් රු150ට දුන්නෙත් නෑ.  ඒ නිසා ජීවන වියදමින් මිරිකී ඉන්න ජනතාව දුන් පොරොන්දු ඉටු කරනු කියන්න නුගේගොඩට ඒවි.

ඒ වගේම ගොවියාට දුන් පොරොන්දු ඉටු කරලත් නෑ.  වී ගොවියාට අද පොහොර ටික වෙලාවට ලැබෙන්නේ නෑ.  පොරොන්දු වුණු සහතික මිල දුන්නෙත් නෑ.  අල සහ ලූණු ගොවියාට සාධාරණ මිලක් දුන්නෙත් නෑ.  ඒ නිසා දුන් පොරොන්දු ඉටු කරනු කියන්න ගොවි ජනතාව රංචු ගැහිලා නුගේගොඩට ඒවි කියලා අපි බලාපොරොත්තු වෙනවා.

රැකියා විරහිත උපාධිධාරින්ට රැකියා වරම් දුන්නෙත් නෑ.  වසර හයක් පුරාවට ගුරු සේවයේ යෙදුණු සංවර්ධන නිලධාරින්ට ගුරු පත්වීම් දුන්නෙත් නෑ.  ගුරුවරුන්ගේ වැටුප් විෂමතා දුරු කළෙත් නෑ.  ආණ්ඩුවේ සේවකයින්ට මාස හයෙන් හයට පඩි වැඩි කිරීම් දුන්නෙත් නෑ.  ඒ නිසා ඒ පිරිසත් දුන් පොරොන්දු ඉටු කරනු කියන්න නුගේගොඩට ඒවි කියලා අපි බලාපොරොත්තු වෙනවා.

හොරු අල්ලන පොරොන්දුව ඉටු කරනු!

මාලිමාවට බලය දෙන්න ප්‍රධානතම හේතුව වුණේ දේශපාලනයේ ඉන්න හොරු අල්ලනවා කියලා පොරොන්දු වීමයි.  මහජන මුදලින් රොකට් එකක් යැව්වාට හොරකම් කරපු සල්ලිවලින් පවුම් 90ක රත්තරන් මාලයක් බල්ලාට අරන් දුන්නාට, සොරකම් කළ මුදලින් පෙම්වතියට එංගලන්තයෙන් රත්තරන් අශ්වයෙකු අරන් දුන්නාට, චිචී නැතිනම් රෝහිත රාජපක්ෂ අත්අඩංගුවට ගනීවි කියලා අපි හිතුවේ.  ඒ වගේම හොරකම් කරපු මුදල් වලින් 2012.12.12 දා ලැම්බෝගිනි කාර් 19ක් ම මිල දී ගත්තාට නාමල් රාජපක්ෂ මන්ත්‍රිතුමාව අත්අඩංගුවට ගනීවි කියලා ජනතාව හිතුවේ.  උගන්ඩාවේ ඩොලර් බිලියන 15ක් හැංගුවාට මහින්ද රාජපක්ෂ මැතිතුමාව අත්අඩංගුවට ගනීවි කියලා අපි හිතුවේ.  එක්කෝ මේ පොරොන්දු ඉටු කරන්න ඕනි.  නැතිනම් බොරු කියලා සමස්ත ජාතියම රැවටීම ගැන සමාව ගන්න ඕනි.  ඒ නිසා හොරු ඇල්ලීම ගැන දුන් පොරොන්දු ඉටු කරනු කියන්න විශාල පිරිසක් නුගේගොඩට ඒවි.

රටම එකට මත්ද්‍රව්‍ය විරෝධි රැස්වීම් මාලාව මාලිමාවේ ජාවාරමක් ;
'ඉවත් වෙනු' මුදල් නාස්තියක්...?