දේශීය පද්ධතිමය වශයෙන් වැදගත්කමක් සහිත බැංකු 5ක්, විදේශීය බැංකු 4ක්, විශාල බැංකු 1ක්, මධ්‍යම හා කුඩා පරිමාණයේ බැංකු 7ක් ආවරණය කරමින් ඒකාබද්ධ අධීක්ෂණ 2ක් ඇතුළුව පූර්ණ විෂය පථය ආවරණය කරන පරීක්ෂණ 6ක්, සීමිත විෂය පථය ආවරණය කරන පරීක්ෂණ 6ක් සහ පසු විපරම් පදනම මත පරීක්ෂණ 5ක් ඇතුළුව බලපත්‍රලාභී බැංකුවලට අදාළව මෙම පරීක්ෂණ සිදුකර ඇතැයි මහ බැංකුවේ 2025 මූල්‍ය ප්‍රකාශ සහ මෙහෙයුම් වාර්තාවේ දැක්වේ.
මෙහිදී එතැන් පරීක්ෂණ 6ක් පවත්වා ඇතැයි ද මූලික බැංකු පද්ධති බිඳවැටීම්, දත්ත කඩකිරීම්, ණය පාලනය, වෙළෙඳපොල අවදානම සහ බැංකු 5ක අක්වෙරළ ණය ලබාදීම්වලට අදාළ පරීක්ෂණ ඊට අයත් වේ.
එක් එක් බලපත්‍රලාභී බැංකුවල මුදල් විශුද්ධිකරණය, ත්‍රස්තවාදයට මුදල් සැපයීම, සමූලඝාතක අවි සංගුණනය මූල්‍යනය යන අවදානම් සම්බන්ධ රෙගුලාසිවලට අනුකූලතාවය තක්සේරු කිරීම සඳහා බැංකු අධීක්ෂණ දෙපාර්තමේන්තුව ස්වාධීන පදනම මත මෙන්ම මූල්‍ය බුද්ධි ඒකකය සමග ඒකාබද්ධව අඛණ්ඩ අධීක්ෂණය සහ විතැන් පරීක්ෂණ සිදුකරන ලද බව ද එහි සඳහන් වේ.
මෙහිදී බැංකුවල ගැටලු පැවැතියේ නම් මුදල් ගනුදෙනු වාර්තා කිරීමේ පනත යටතේ සුදුසු පරිදි බලාත්මක කිරීමේ ක්‍රියාමාර්ග ආරම්භ කිරීමට ඒවා මූල්‍ය බුද්ධි ඒකකය වෙත දැනුම් දෙනු ලැබෙන බව මහ බැංකුව පවසයි.
ඒ අනුව 2025 වසරේදී බැංකු අධීක්ෂණ දෙපාර්තමේන්තුව මූල්‍ය බුද්ධි ඒකකය සමඟ ඒකාබද්ධ අධික්ෂණ 10ක් සහ මුදල් විශුද්ධිකරණය සහ ත්‍රස්තවාදයට මුදල් සැපයීම වැළැක්වීම පිළිබඳ ස්වාධීන පරීක්ෂණ 5ක් පවත්වන ලද බව ද එම වාර්තාවේ වැඩිදුරටත් සඳහන් වේ.
ගිම්හාන් ද සිල්වා
