ගෝලීය අභියෝග හමුවේ ආර්ථිකය ස්ථාවර කිරීමට රජයෙන් පුළුල් වැඩපිළිවෙළක් ! - උත්සව සමයේ බාධාවකින් තොරව සේවා සැපයීමටද පියවර

ඇමැති අනිල් ජයන්ත ප්‍රනාන්දු කියයි.

එළඹෙන අප්‍රේල් උත්සව සමයේදී ජනතාවට කිසිදු ඉන්ධන හෝ විදුලි හිඟයකින් තොරව කටයුතු කිරීමට අවශ්‍ය සැලසුම් සකස් කර තිබේදැයි අප කළ විමසුමකට පිළිතුරු ලබා දෙමින් ඇමැතිවරයා එසේ කීය.

 QR කේත ක්‍රමය යටතේ අවශ්‍ය ඉන්ධන ලබාදීමට කටයුතු කරන අතර, පොදු ප්‍රවාහන සේවාවල කාර්යක්ෂමතාව ඉහළ නැංවීමට අතිරේක බස් රථ යෙදවීමට ද පියවර ගෙන ඇති බව අමැතිවරයා පැවසීය.

වර්තමානයේ ලෝක දේශපාලනික සහ ආර්ථික ක්ෂේත්‍රයේ සිදුවන වෙනස්වීම් හමුවේ වුවද, මෙරට ආර්ථිකය ස්ථාවරව පවත්වාගෙන යාමට සහ ජනතාවට සහන සැලසීමට රජය විධිමත් කළමනාකරණ වැඩපිළිවෙළක් දියත් කර තිබේ. මෙහිදී ප්‍රධාන වශයෙන් බාහිර සාධක මත සිදුවන මිල ඉහළ යාම් පාලනය කරමින් රටේ ඉදිරි සංවර්ධන ඉලක්ක සපුරා ගැනීම කෙරෙහි අවධානය යොමු කර ඇතැයිද ඇමැතිවරයා කියා සිටියේය.

ලෝක වෙළඳපොළේ තෙල් මිල ඉහළ යාම හේතුවෙන් භාණ්ඩ හා සේවා මිල ගණන් ඉහළ යාමේ අවදානමක් පවතින නමුත්, රජය මැදිහත් වී එම බරින් කොටසක් දරා ගනිමින් පාරිභෝගිකයා සුරැකීමට පියවර ගෙන ඇති බවද ඇමැතිවරයා පැවසීය.

දැනට පවතින දේශීය සංචිත සහ ලබාගෙන ඇති ආර්ථික ස්ථාවරත්වය නිසා විදේශ විනිමය අනුපාතය අසාමාන්‍ය ලෙස ඉහළ යාම වළක්වා ගැනීමට රජයට හැකි වී ඇත. මේ හරහා ආර්ථිකයට එල්ල විය හැකිව තිබූ දැඩි උද්ධමනකාරී බලපෑම යම් මට්ටමකට පාලනය කිරීමට හැකි වී ඇතැයිද ඇමැතිවරයා පෙන්වා දුන්නේය.

ගෝලීය යුද තත්ත්වයන් හේතුවෙන් සංචාරක කර්මාන්තයට සහ අපනයන වෙළඳාමට යම් බලපෑමක් එල්ල වී ඇති අතර, සංචාරක පැමිණීම් යම් ප්‍රමාණයකින් පහළ ගොස් ඇත.

මේ තත්ත්වය කළමනාකරණය කිරීමට විකල්ප ගුවන් සේවා හා නව උපාය මාර්ග කෙරෙහි අවධානය යොමු කර ඇති අතර, විදේශීය ආයෝජන වැඩි කර ගැනීමට ද සාකච්ඡා පවත්වමින් සිටියි. විශේෂයෙන්ම නාවික ප්‍රවාහන රක්‍ෂණ ගාස්තු 0.2% සිට 3% දක්වා ඉහළ යාම වැනි බාහිර අභියෝග හමුවේ වුවද, රටේ ආර්ථිකය ඉදිරියට ගෙන යාමට අවශ්‍ය පියවර ගනිමින් පවතින බව රජය අවධාරණය කරයි.

රටේ නිෂ්පාදන ක්‍රියාවලිය පුළුල් කිරීම සඳහා ඩිජිටල් ආර්ථිකය ප්‍රවර්ධනය කිරීම, බලශක්ති ආර්ථිකය (Energy Economic) ශක්තිමත් කිරීම සහ සෘජු විදේශීය ආයෝජන ආකර්ෂණය කර ගැනීම රජයේ මූලික උපාය මාර්ගයකි. ආයෝජකයින්ට පහසුවෙන් වැඩ කළ හැකි පරිසරයක් නිර්මාණය කිරීම සඳහා 'ජාතික වෙළඳ කවුළුව' වැනි පහසුකම් මේ වසරේ සිට ක්‍රියාත්මක කිරීමට නියමිතය.

එසේම, රුපියල් බිලියන 95.6 ක ආයෝජනයකින් යුත් සංවර්ධන යෝජනාවලියක් හරහා ග්‍රාමීය මට්ටමින් ජනතාව සවිබල ගැන්වීමටත්, සමාජ සංවර්ධන සභා (Community Development Councils) හරහා කාන්තා ශ්‍රමය දායක කර ගැනීමටත් රජය සැලසුම් කර ඇත. මෙම සියලු ප්‍රයත්නයන් හරහා මධ්‍යකාලීනව 7% කට වඩා වැඩි ආර්ථික වර්ධනයක් සහ සියලු දෙනා සම්බන්ධ වන තිරසර ආර්ථික වර්ධනයක් අත්පත් කර ගැනීම රජයේ අපේක්ෂාව බවද ඇමැතිවරයා වැඩිදුරටත් පැවසීය.

(සටහන | ජේ.මුණසිංහ)