බුදුදහම සුරක්ෂිත කිරීම සහ පෝෂණය කිරීම රජයේ මූලික වගකීමක් ලෙස ආණ්ඩුක්‍රම ව්‍යවස්ථාවේ තහවුරු කර තිබියදී, ගලගොඩඅත්තේ ඥාණසාර හිමියන්ගේ සිවුර ඉවත් කර බන්ධනාගාර ඇඳුම ඇන්දවීමේ සිදුවීම බරපතල ආගමික හා නීතිමය ගැටලුවක් මතු කරන්නක් බව එක්සත් ජාතික පක්ෂය පෙන්වා දෙයි.
කොළඹ මල් පාර දේශපාලන කාර්යාලයේ අද පැවති මාධ්‍ය හමුවකදී අදහස් දැක්වූ එජාප සභාපති වජිර අබේවර්ධන සඳහන් කළේ, විනය පිටකයට අනුව භික්ෂූන් වහන්සේ නමකගේ චීවරය ඉවත් කිරීමේ බලය ඇත්තේ අදාළ නිකායට පමණක් බවයි. අධිකරණ අමාත්‍යාංශය හෝ බන්ධනාගාර පරිපාලනය මෙවැනි තීරණයක් ගැනීමට පෙර ත්‍රෛනිකායික මහානායක මාහිමිපාණන් වහන්සේලාගේ අනුශාසනා ලබා ගැනීමට බැඳී සිටි බව හෙතෙම අවධාරණය කළේය.
ව්‍යවස්ථාවේ 9, 10 සහ 105(4) වගන්තිවල අර්ථය
ආණ්ඩුක්‍රම ව්‍යවස්ථාවේ අධිකරණ බලතල පිළිබඳ විධිවිධාන විග්‍රහ කරමින් වජිර අබේවර්ධන පෙන්වා දෙන්නේ, භික්ෂු විනය හෝ ආගමික ආරවුල් විසඳීම සාමාන්‍ය පරිපාලන ක්‍රියාවලියකට වඩා වෙනස් මාවතක් ගන්නා බවයි.
ආණ්ඩුක්‍රම ව්‍යවස්ථාවේ 105(4) වගන්තිය අනුව භික්ෂූන් වහන්සේලාගේ විනය හා ආරවුල් සම්බන්ධයෙන් තීන්දු ගැනීමට විශේෂ අධිකරණ හෝ ආයතන පිහිටුවීමට පාර්ලිමේන්තුවට බලය පවරා ඇත. එවැනි නීතියක් සම්පාදනය වන තුරු 1931 අංක 19 දරන බෞද්ධ විහාර හා දේවාලගම් ආඥා පනතේ සම්ප්‍රදායන් හා රීතීන් ආරක්ෂා කිරීම රජයේ වගකීමක් බව දේශපාලන නිරීක්ෂකයෝ පෙන්වා දෙති.
යටත් විජිත පාලන සමයේ පවා භික්ෂූන් වහන්සේලා ඝාතනයට ලක්වුවද චීවරය අමුතුවෙන් ගැලවීමක් සිදු නොවූ බව සිහිපත් කළ හෙතෙම, මෙම පියවර රටේ බෞද්ධ ප්‍රජාව තුළ දැඩි කම්පනයක් ඇති කර තිබෙන බව ප්‍රකාශ කළේය.
ජනාධිපති සමාව සහ මහානායක හිමිවරුන්ගේ ඉල්ලීම
ඥාණසාර හිමියන් සිරගත වීම සම්බන්ධයෙන් මීට පෙර මහානායක ස්වාමීන් වහන්සේලා විසින් එවකට ජනාධිපතිවරයා වෙත යොමු කරන ලද ලිඛිත ඉල්ලීම මත පදනම්ව ජනාධිපති සමාව හිමි වූ ආකාරය මෙහිදී සිහිපත් කෙරිණි. ආණ්ඩුක්‍රම ව්‍යවස්ථාවේ 34 වැනි වගන්තිය යටතේ ජනාධිපතිවරයාට හිමි පොදු සමාව දීමේ විධායක බලය ලොව ප්‍රජාතන්ත්‍රවාදී රටවල පිළිගත් සම්මතයක් බවද ඔහු සඳහන් කළේය.
වරදකරුවෙකු සදාකල් වරදකරුවෙකු ලෙස තැබීම වෙනුවට නිවැරදිකරුවෙකු කිරීම නීතියේ මෙන්ම ආගමික දර්ශනයේ ද මූලික පදනම බව පෙන්වා දෙන එජාප සභාපතිවරයා, මෙම ප්‍රශ්නය සාමාන්‍ය නඩු කටයුත්තකට සීමා නොකර පාර්ලිමේන්තුව තුළ සාකච්ඡා මාර්ගයෙන් විසඳා ගැනීමට ආණ්ඩුවට ඉඩකඩ තිබූ බව කියා සිටියේය.
එක්සත් ජාතික පක්ෂයේ ඉදිරි පියවර
මෙම නීතිමය හා ව්‍යවස්ථාමය පසුබිම පිළිබඳව හිටපු ජනාධිපති රනිල් වික්‍රමසිංහ විදේශගතව සිට පැමිණි වහාම පාර්ලිමේන්තු මන්ත්‍රීවරුන් සමඟ සාකච්ඡා කර සවිස්තර ප්‍රකාශයක් සිදු කිරීමට නියමිත බව හෙළිදරව් විය.
ආණ්ඩුක්‍රම ව්‍යවස්ථාවේ 9 වැනි වගන්තිය ප්‍රකාරව බුදුදහම සුරැකීමට ඇති වගකීම සහ 10 වැනි වගන්තියෙන් තහවුරු කර ඇති චින්තනයේ හා ආගමික නිදහස උල්ලංඝනය වීම පිළිබඳව පාර්ලිමේන්තු මහජන නියෝජිතයන් හරහා ඉදිරියේදී සභාවේදී ප්‍රශ්න කිරීමට පියවර ගන්නා බව එක්සත් ජාතික පක්ෂය වැඩිදුරටත් කියා සිටී.