ශ්‍රී ලංකා මහ බැංකුව විසින් නිකුත් කරන ලද නවතම වාර්තා අනුව, 2026 පෙබරවාරි මාසයේදී මෙරට ඉදිකිරීම් ක්ෂේත්‍රයේ ක්‍රියාකාරකම්වල අඛණ්ඩ වර්ධනයක් පෙන්නුම් කර තිබේ. ඉදිකිරීම් කටයුතු සඳහා වන ශ්‍රී ලංකා ගැනුම් කළමනාකරුවන්ගේ දර්ශකය (PMI) පෙබරවාරි මාසයේදී දර්ශකාංක 70.3ක අගයක් වාර්තා කර ඇත.
පසුගිය ජනවාරි මාසයේ වාර්තා වූ දර්ශකාංක 75.0ක ඉහළ අගයට සාපේක්ෂව පෙබරවාරි මාසයේදී වර්ධන වේගය මඳක් අඩු වී තිබුණද, ක්ෂේත්‍රයේ ප්‍රගතිය අඛණ්ඩව සිදුවන බව මහ බැංකුව පෙන්වා දෙයි. අඛණ්ඩව නව ඉදිකිරීම් ව්‍යාපෘති ලැබීම සහ පවතින යහපත් කාලගුණික තත්ත්වය මෙම වර්ධනයට මූලික වශයෙන් හේතු වී තිබේ. සමීක්ෂණයට ප්‍රතිචාර දැක්වූ බොහෝ ඉදිකිරීම් සමාගම් තමන්ට විවිධ නව ව්‍යාපෘති ලැබී ඇති බව තහවුරු කර ඇත.
නව ව්‍යාපෘති පිළිබඳ පවතින සුබවාදී අපේක්ෂාවන් හේතුවෙන් ඉදිකිරීම් අංශයේ සේවා නියුක්ති දර්ශකය වේගයෙන් වර්ධනය වී ඇති අතර, එය ජනවාරි මාසයේ පැවති 54.2 සිට පෙබරවාරි මාසයේදී 56.8 දක්වා ඉහළ ගොස් තිබේ. කෙසේ වෙතත්, ඉදිකිරීම් ක්ෂේත්‍රයේ ඉහළ ඉල්ලුම සහ චීන අලුත් අවුරුදු සැමරුම් හේතුවෙන් සිදු වූ ආනයන ප්‍රමාදයන් නිසා ඇණවුම් සැපයීමට සැපයුම්කරුවන්ට ගතවන කාලය තවදුරටත් වැඩි වී ඇත.
ඉදිකිරීම් ක්ෂේත්‍රයේ අනාගතය පිළිබඳව තවදුරටත් ඉහළ විශ්වාසයක් පවතින නමුත්, ඇතැම් ගෝලීය තත්ත්වයන් කෙරෙහි ක්ෂේත්‍රයේ අවධානය යොමු වී තිබේ. විශේෂයෙන්ම මැදපෙරදිග පවතින ගැටුම්කාරී තත්ත්වය හේතුවෙන් ඉදිරියේදී අමුද්‍රව්‍ය පිරිවැය ඉහළ යාමට සහ සැපයුම් සීමා වීමට ඇති ඉඩකඩ පිළිබඳව ව්‍යාපාරිකයෝ අවධානයෙන් සිටිති.
මෙම සමීක්ෂණය ඉදිකිරීම් කර්මාන්ත සංවර්ධන අධිකාරියේ (CIDA) ලියාපදිංචි ඉහළම ශ්‍රේණිගත දේශීය ඉදිකිරීම් සමාගම් 35ක් පමණ ඉලක්ක කරගනිමින් සිදුකරන ලද්දකි.
- ජේ.මුණසිංහ
