සති අන්තයේදී ඇමෙරිකාව සහ ඉරානය එකිනෙකාට එරෙහිව නැව්වලට ප්‍රහාර එල්ල කරමින් සටන් විරාම ගිවිසුම උල්ලංඝනය කළ බවට කළ ප්‍රකාශයන් සමඟ හෝමූස් සමුද්‍ර සන්ධිය යළි වැසී යාම හේතුවෙන්, සඳුදා දිනයේ බොරතෙල් මිල 6% කට වඩා වැඩි අගයකින් ඉහළ ගොස් ඇත.
පසුගිය සිකුරාදා බොරතෙල් මිල 9% කට වඩා පහත වැටී තිබුණද, මෙම නවතම තත්ත්වය හමුවේ බ්‍රෙන්ට් (Brent) බොරතෙල් මිල බැරලයක මිල ඩොලර් 6.11 කින් (6.76%) ඉහළ ගොස් ඩොලර් 96.49 ක් ලෙස සටහන්ව තිබේ.
ඇමෙරිකානු වෙස්ට් ටෙක්සාස් ඉන්ටර්මීඩියට් (WTI) බොරතෙල් මිල ඩොලර් 6.53 කින් (7.79%) ඉහළ ගොස් බැරලයක් ඩොලර් 90.38 ක් දක්වා ඉහළ ගොස් ඇති බව විදෙස් මාධ්‍ය වාර්තා කරයි.
තම වරාය අවහිරතා නොතකා යාත්‍රා කිරීමට උත්සාහ කළ ඉරාන භාණ්ඩ ප්‍රවාහන නෞකාවක් ඇමෙරිකානු හමුදාව විසින් අත්අඩංගුවට ගත් බව ජනාධිපති ඩොනල්ඩ් ඊයේ පවසා සිටියේය.
දෙවන වටයේ සාම සාකච්ඡා සඳහා සහභාගී නොවන බව ඉරානය ප්‍රකාශ කරයි
මේ අතර, ට්‍රම්ප් විසින් යළිත් ගුවන් ප්‍රහාර එල්ල කරන බවට තර්ජනය කර තිබියදීත්, දෙවන වටයේ සාම සාකච්ඡා සඳහා සහභාගී නොවන බව ඉරානය ප්‍රකාශ කර ඇත.
යුද්ධය ආරම්භ වීමට පෙර ලෝක තෙල් සැපයුමෙන් පහෙන් එකක් පමණ හුවමාරු වූ හෝමූස් සමුද්‍ර සන්ධිය සඳහා පනවා තිබූ අවහිරතා ඉරානය විසින් ඉවත් කර පසුව නැවත පැනවීමට පියවර ගෙන තිබේ.
මේ අතර ඇමෙරිකාව තවදුරටත් ඉරාන වරායන් වටලා සම්බාධක ක්‍රියාත්මක කරනු ලබයි.
''සමාජ මාධ්‍ය හරහා සිදුකරන විවිධ ප්‍රකාශ මත තෙල් මිල උච්චාවචනය වෙමින් පවති''
MST Marquee හි පර්යේෂණ ප්‍රධානී සෝල් කැවොනික්
MST Marquee හි පර්යේෂණ ප්‍රධානී සෝල් කැවොනික් පවසන්නේ, "තෙල් වෙළඳපොළ යථා තත්ත්වයට පත්වීමේ සැබෑ තත්ත්වය මත නොව, ඇමෙරිකාව සහ ඉරානය සමාජ මාධ්‍ය හරහා සිදුකරන විවිධ ප්‍රකාශ මත තෙල් මිල උච්චාවචනය වෙමින් පවතින" බවයි.
හෝමූස් සමුද්‍ර සන්ධිය විවෘත බවට ඉරානය කළ ප්‍රකාශය සහ එය නැවත කිසිදා වසා නොදමන බවට ඉරානය එකඟ වූ බවට ට්‍රම්ප් කළ ප්‍රකාශය හමුවේ පසුගිය සිකුරාදා තෙල් මිල වාර්තාගත ලෙස පහත වැටිණ.
එහෙත් එම ප්‍රකාශය "කල් පූර්ව වැඩි" එකක් බව කැවොනික් පෙන්වා දෙයි.
නෞකා හිමියන් මෙම මාර්ගයේ ගමන් කිරීමට පෙර එහි ආරක්ෂාව පිළිබඳව දැඩි අවිශ්වාසයකින් පසුවන බවද ඔහු වැඩිදුරටත් පවසා සිටියි.
| hirunews
මුලාශ්‍ර :
Oil prices rise after Trump says Iranian ship seized
Oil prices surge amid mixed signals on US-Iran peace talks
Oil prices climbing again amid US-Iran standoff in Strait of Hormuz
