කච්චතිව් ගිවිසුම වෙනස් කරන්නේ නෑ: ඉන්දියාව කියයි

ඉන්දු-ශ්‍රී ලංකා සබඳතාවල සංවේදීම සාධකයක් වන කච්චතිව් දූපත සහ දෙරටේ සමුද්‍රීය සීමා සම්බන්ධයෙන් නවදිල්ලියේ නිල ස්ථාවරය යළිත් වරක් තහවුරු වී තිබේ. ශ්‍රී ලංකාව සමග 1974 සහ 1976 වසරවල අත්සන් තැබූ ද්විපාර්ශ්වික ගිවිසුම් යළි විවෘත කිරීමේ කිසිදු සූදානමක් නොමැති බව ඉන්දීය මධ්‍යම රජය එරට ශ්‍රේෂ්ඨාධිකරණය හමුවේ පැහැදිලි කළේය.

කච්චතිව් දූපත ශ්‍රී ලංකාවට පැවරීම සහ ඉන්දීය ධීවරයන්ගේ අයිතීන් සීමා කිරීම අභියෝගයට ලක්කරමින් ගොනු කර ඇති පෙත්සම් සලකා බැලූ අවස්ථාවේදී නීතිපති ආර්. වෙන්කටරමණි මෙම ස්ථාවරය ප්‍රකාශ කළේය. විනිසුරු සංජේ කුමාර් සහ විනිසුරු සංජීව් සච්දේවා හමුවේ මෙම නඩු විභාගය පැවැත්විණි.  

සීමාව පනින්න එපා: ධීවරයින්ට දැනුවත් කිරීමක්  

ශ්‍රී ලංකා නාවික හමුදාව අතින් ඉන්දීය ධීවරයන් දිගින් දිගටම අත්අඩංගුවට පත්වීම වැළැක්වීමට නම්, ඔවුන් ජාත්‍යන්තර මුහුදු සීමාව ඉක්මවා නොයන පරිදි දැනුවත් කිරීමේ වගකීම මධ්‍යම සහ තමිල්නාඩු රජයන් සතු බව අධිකරණය පෙන්වා දුන්නේය.

ඉන්දීය වෙරළ ආසන්නයේ මත්ස්‍ය සම්පත සීඝ්‍රයෙන් ක්ෂය වීම නිසා ධීවරයන් අවදානම නොතකා දේශසීමා ඉක්මවා යන බව නීතිපතිවරයා පිළිගත්තේය. කෙසේ වෙතත්, කොළඹ පාලනය සමග පවතින මිත්‍රශීලී රාජ්‍යතාන්ත්‍රික සබඳතාවලට හානි වන අන්දමේ කිසිදු පියවරක් නොගන්නා බවත්, ඉන්දියාවේ ස්ථාවරයන් පිළිගන්නා ලෙස ශ්‍රී ලංකාවට බලපෑම් කළ නොහැකි බවත් ඔහු අවධාරණය කළේය.

විනිසුරුවරයා සිහිපත් කළ ලංකාවේ පුරවැසි විනය  

පෙත්සම සලකා බලන අතරතුර විනිසුරු සංජේ කුමාර් ශ්‍රී ලංකාවේ සිදුකළ පෞද්ගලික සංචාරයක අත්දැකීම්ද සංසන්දනාත්මකව සිහිපත් කළේය.

ශ්‍රී ලංකාවේ මහමඟ හෝ නගරවල ජනතාව හිතුමතේ කුණු කසළ නොදමන අයුරු දුටු බව පැවසූ විනිසුරුවරයා, එවැනි පුරවැසි විනයක් පවතින රටක ජනතාව මුහුදට කසළ එකතු නොකරන බව පෙන්වා දුන්නේය. ශ්‍රී ලංකා මුහුදු කලාපයේ මත්ස්‍ය ගහනය නොනැසී පැවතීමට සහ මසුන් එදෙසට ආකර්ෂණය වීමට මෙම පරිසර හිතකාමී ප්‍රවේශයද හේතු විය හැකි බව ඔහු වාචිකව නිරීක්ෂණය කළේය.

නීතිමය පසුබිම සහ ඉදිරි පියවර  

1974 ගිවිසුම මගින් භූමියක් පැවරීමක් සිදුව ඇති බැවින් එය ඉන්දීය ආණ්ඩුක්‍රම ව්‍යවස්ථාවේ පළමු උපලේඛනයට පටහැනි බව පෙත්සම්කරුවන් වෙනුවෙන් පෙනී සිටි ජ්‍යෙෂ්ඨ නීතිඥ පී. විල්සන් තර්ක කළේය.  

කෙසේ වෙතත්, අදාළ ගිවිසුම්වල ව්‍යවස්ථාපිත වලංගුභාවය සම්බන්ධයෙන් කිසිදු අවසන් තීරණයක් ප්‍රකාශයට පත් නොකළ ශ්‍රේෂ්ඨාධිකරණය, වැඩිදුර විභාගය 2027 පෙබරවාරි දක්වා කල් තැබීය. රාජ්‍යතාන්ත්‍රික විශ්ලේෂකයන් පෙන්වා දෙන්නේ, තමිල්නාඩු දේශපාලනය තුළ කච්චතිව් මාතෘකාව නිතර උණුසුම් වුවද, දෙරට අතර අත්සන් තැබූ ජාත්‍යන්තර සම්මුතීන් වෙනස් නොකිරීමට නවදිල්ලිය ගෙන ඇති තීරණය කලාපීය ස්ථාවරත්වයට වැදගත් සාධකයක් වන බවයි.