මෙම සිදුවීම හුදෙක් මුදල් සොරකමක් පමණක් නොව, එය රටේ ජාතික ආරක්ෂාවට එල්ල වූ සෘජු තර්ජනයක් ලෙසද සැළකිය යුතු බව මන්ත්‍රී මුස්තාෆා පෙන්වා දෙයි.
ලෝකයේ ඉහළම ආරක්ෂාවක් සහිත ඇමරිකානු 'වයිට් හවුස්' (White House) පද්ධති පවා හැකර්වරුන්ගේ ගොදුරු බවට පත්වූ පසුබිමක, ශ්‍රී ලංකාවේ සයිබර් ආරක්ෂණ පද්ධතිවල පවතින දුර්වලතා පිළිබඳව බුද්ධිමය දෘෂ්ටිකෝණයකින් (Intellectual Perspective) බැලිය යුතු කාලය එළඹ තිබේ.
තාක්ෂණික විශේෂඥභාවය සහ වගවීම නොසළකමින් මෙම වංචාවට සම්බන්ධ පුද්ගලයන්ගේ දේශපාලන පක්ෂය තරාතිරම නොබලා වහාම ඔවුන් නීතිය හමුවට පැමිණවිය යුතු බව මන්ත්‍රීවරයා ප්‍රකාශ කරයි.
ඒ සඳහා ජාත්‍යන්තර මට්ටමේ සබඳතා සහිත සහ ඉහළ තාක්ෂණික දැනුමක් ඇති විශේෂඥයන්ගේ සහාය ලබා ගැනීම අත්‍යවශ්‍ය වේ.
විශේෂයෙන්ම රටේ භාණ්ඩාගාරය වැනි ඉහළම මූල්‍ය ආයතනයක ආරක්ෂාව සම්බන්ධයෙන් පැන නැගී ඇති මෙම තත්ත්වය හමුවේ, අහිමි වූ මුදල් නැවත ලබා ගැනීමට (Recovery) විපක්ෂයේ සහාය ද ලබා ගත යුතු බව ඔහු යෝජනා කරයි.
පද්ධති නවීකරණය සහ ජනාධිපති කමිටුවක් ශ්‍රී ලංකාවේ බැංකු පද්ධතිය සහ දේශීය ආදායම් දෙපාර්තමේන්තුව වැනි මර්මස්ථාන ඩිජිටල්කරණය වෙමින් පවතින මොහොතක, අප දැනට භාවිතා කරන තාක්ෂණික ආරක්ෂණ ක්‍රමවේදයන් යල්පැන ගොස් ඇත්දැයි වහාම පරීක්ෂා කළ යුතුයි. තාක්ෂණය හරහා සිදුවන මූල්‍ය ගනුදෙනුවල සුරක්ෂිතභාවය සහතික කිරීම සඳහා ආචාර්ය හාන්ස් විජේසුරිය වැනි විෂය පිළිබඳ විශේෂඥ දැනුමක් ඇති පුද්ගලයන් සම්බන්ධ කර ගනිමින් වහාම 'ජනාධිපති විශේෂ විමර්ශන කමිටුවක්' පත් කරන ලෙස මන්ත්‍රීවරයා රජයෙන් ඉල්ලා සිටියි.
ආර්ථිකයට එල්ල වන බලපෑම, සයිබර් ආරක්ෂණය සම්බන්ධයෙන් පවතින ගැටලු සහ තාක්ෂණික දුර්වලතා (Technical side) පිළිබඳව නිසි අධ්‍යයනයක් සිදු කොට ශක්තිමත් 'ෆයර්වෝල්' (Firewalls) හෝ වෙනත් එවැනි නවීන ආරක්ෂණ ක්‍රම යෙදීමට කටයුතු නොකළහොත්, එය ජාතික ආර්ථිකයට දැඩි බලපෑමක් එල්ල කරනු ඇති බවටද ඔහු අනතුරු අඟවයි.
මෙම අනාවරණය හුදෙක් පුවතක් ලෙස පමණක් නොව, රටේ මූල්‍ය ස්වෛරීභාවය රැක ගැනීමේ අනතුරු ඇඟවීමක් ලෙස සළකා කටයුතු කළ යුතු බව ෆයිසර් මුස්තාෆා වැඩිදුරටත් සඳහන් කර සිටියි.
