ශ්‍රී ලංකා රාජ්‍යය ගොඩනැඟීමේ මූලික පාදම වූ සංස්කෘතික හා සභ්‍යත්ව සාරධර්ම ආරක්ෂා කරන අතිපූජනීය භික්ෂූන් වහන්සේලාගේ ගෞරවයට මුවා වෙමින් මෙවැනි නීතිවිරෝධී ක්‍රියාවල නිරත වීම අතිශය බැරෑරුම් තත්ත්වයක් සහ, මේ හේතුවෙන් ජාත්‍යන්තරය හමුවේ රටට මහත් අපකීර්තියක් අත්ව ඇති බැවින් මෙම සිදුවීම සම්බන්ධයෙන් තරාතිරම නොබලා නීතිය ක්‍රියාත්මක කිරීම අතිශයින් වැදගත් බව එම නිවේදනයේ දැක්වේ.
මෙවැනි ශාසනික විලෝපනයන් සිදුවන අවස්ථාවලදී සම්බුද්ධ ශාසනය ආරක්ෂා කිරීමේ වගකීම පැවරී ඇති ශාසන භාරධාරීන් මෙන්ම රාජ්‍ය බලධාරීන් ද අතීතයේ ක්‍රියා කර ඇති ආකාරය සැලකිල්ලට ගනිමින් අවශ්‍ය පියවර ගත යුතු බව කරු ජයසූරිය අවධාරණය කරයි.
වර්තමාන නීති රාමුව තුළ අධිකරණය හමුවේ දඬුවම් ලබාදීමේ හැකියාව තිබුණ ද, ශාසනික පාරිශුද්ධිය උදෙසා අත්‍යවශ්‍ය ක්‍රියාමාර්ග ගැනීමේදී මහානායක හිමිවරුන් ප්‍රමුඛ කාරක සංඝ සභාවන් හමුවේ ඇති නෛතික බාධාවන් ඉවත් කිරීම ජාතික වගකීමක් බව ඔහු පෙන්වා දෙයි.
ඒ සඳහා ශාසන හිතකාමීන්ගේ මැදිහත් වීමෙන් සහ මහානායක හිමිවරුන්ගේ ආශිර්වාදයෙන් යෝජනා කර ඇති 'ථේරවාදි භික්ෂු කතිකාවත් (ලියාපදිංචි කිරීමේ) පනත' සහ විහාර හා දේවාලගම් පනතෙහි 41 සහ 42 වගන්ති සංශෝධනය කිරීමේ අවශ්‍යතාව ඔහු නැවතත් අවධාරණය කරයි.
ථේරවාදි භික්ෂු කතිකාවත් පනත නොපමාව සම්මත කරන්න
මෙම යෝජනා මීට පෙර රජයන් කිහිපයකට මෙන්ම වර්තමාන රජයට ද ඉදිරිපත් කර ඇති බවත්, එමගින් භික්ෂූන් වහන්සේලා තමන්ට අදාළ නිකායේ ලියාපදිංචි කතිකාවතට අනුකූලව කටයුතු කිරීම සහ එය උල්ලංඝනය කරන පිරිස්වලට දඬුවම් පැමිණවීමට අවශ්‍ය විධිවිධාන සැලසීමට අපේක්ෂා කරන බවත් නිවේදනයේ සඳහන් වේ.
මේ සඳහා සකස් කරන ලද පනත් කෙටුම්පත 2015 දෙසැම්බර් 11 වන දින ගැසට් කළ ද, එය මෙතෙක් බලාත්මක කිරීමට නොහැකි වීම සමස්ත බෞද්ධ ප්‍රජාවගේම කම්පාවට හේතු විය යුතු බව නිවේදනයෙන් අවධාරණය කරයි.
මෙවැනි නෛතික බලයක් තහවුරු වන තෙක් ශාසන විලෝපිතයන් ලෙස ක්‍රියා කරන භික්ෂු ප්‍රතිරූපකයන්ට එරෙහිව පියවර ගැනීමට මහානායක හිමිවරුන් ප්‍රමුඛ කාරක සංඝ සභාවලට බලයක් හිමි නොවන බව කරු ජයසූරිය පෙන්වා දෙයි.
එබැවින් මහානායක හිමිවරුන්ගේ අනුශාසනා පරිදි ථේරවාදි භික්ෂු කතිකාවත් පනත නොපමාව සම්මත කර, විහාර හා දේවාලගම් පනත ද සංශෝධනය කරමින් ශාසනයේ චිරස්ථිතිය උදෙසා රාජ්‍යයේ වගකීම ඉටු කරන ලෙස ඔහු ජනාධිපතිවරයා ප්‍රමුඛ රජයෙන් ඉල්ලා සිටියි.
