‘හැකර්’ කතා මුලාවක් - පික්පොකට් න්‍යායෙන් වැඩ වරදින හැටි නාමල් කියයි

 
ලෝකයේ කිසිදු රටක හැකර්වරයෙකු කෝල් කර තමන් ගිණුම හැක් කරන්නට යන බව පවසා අදාළ ලිපිවලට අත්සන් ලබා නොගන්නා බවත්, මෙය පැහැදිලිවම අත්සන් ලබාගෙන සිදු කළ වංචාවක් බවත් ඔහු පෙන්වා දුන්නේය.

 
හැකර් හැංගේවි යැයි පවසමින් මාස අටක් තිස්සේ පරීක්ෂණ නොකර සිටීම තුළින්ම මෙහි ඇති සැකසහිත බව තහවුරු වන බවත්, මුදල් අමාත්‍යවරයා ලෙස ජනාධිපතිවරයා සහ මුදල් ලේකම්වරයා මීට වගකිව යුතු බවත් හෙතෙම අවධාරණය කළේය.

තමන්ගේ හොරකම වසා ගැනීමට අන් අයට හොරා යැයි කෑගසන 'පික්පොකට්' න්‍යාය දැන් ආණ්ඩුවට වැරදී ඇති බව පවසන රාජපක්ෂ, වරායෙන් කන්ටේනර් 323ක් අතුරුදන් වීම, ලෝකයේ වැඩිම මිලට තෙල් සහ බාල ගල් අඟුරු ගෙන්වීම හරහා ආණ්ඩුව දැවැන්ත කොමිස් මුදල් ලබාගෙන ඇති බවට චෝදනා කළේය. 

 

මාස ගණනාවක් තිස්සේ ගෙවීම් නොකළ ආයතන තිබියදී ඇතැම් හිතවත් කොන්ත්‍රාත් සමාගම්වලට මාර්ග සංවර්ධන අධිකාරිය (RDA) හරහා දෙවතාවක් ගෙවීම් කර ඇති බව ද ඔහු අනාවරණය කළේය.

විදේශගත ශ්‍රී ලාංකිකයන් එවන විනිමය මෙන්ම ජනතාවගේ බදු මුදල් ආරක්ෂා කිරීමට ආණ්ඩුව අසමත් වී ඇති බවත්, සැබෑ හොරුන් සිටින්නේ ආණ්ඩුව ඇතුළේම බවත් ඔහු වැඩිදුරටත් පැවසීය.

එමෙන්ම සංවිධානාත්මක අපරාධකරුවන් මැඬලීමට පත් කළ 'මාලිමාවේ' ඇතැම් උසස් පොලිස් නිලධාරීන්ම අපරාධකරුවන් සමඟ ගනුදෙනු කරන බව හෙළි වී ඇති බවත්, ඔවුන්ට විදේශගත වීම පවා තහනම් කර ඇති බවත් මන්ත්‍රීවරයා මෙහිදී පෙන්වා දුන්නේය. පොලිස්පතිවරයා ද ආණ්ඩුවට අවශ්‍ය පරිදි කටයුතු කරමින් අපරාධකරුවන් ආරක්ෂා කරන තත්ත්වයක් තුළ, රටේ මුදල් වංචා කිරීම පිටුපස සිටින්නේ ද ආණ්ඩුවම බව නාමල් රාජපක්ෂ වැඩිදුරටත් අවධාරණය කර සිටියේය.