කොළඹ කොටුව මහේස්ත්‍රාත් ඉසුරු නෙත්තිකුමාරගේ හමුවේ කරුණු වාර්තා කරමින් අපරාධ පරීක්ෂණ දෙපාර්තමේන්තුව දන්වා සිටියේ, ලද පැමිණිල්ලකට අනුව පොදු දේපළ පනත, පරිගණක අපරාධ පනත සහ දණ්ඩ නීති සංග්‍රහය යටතේ මේ සම්බන්ධයෙන් පුළුල් විමර්ශනයක් ආරම්භ කර ඇති බව ය.
මෙම සිද්ධියට සම්බන්ධයෙන් කටයුතු කළ මූල්‍ය දෙපාර්තමේන්තුවේ නිලධාරීන් පස් දෙනෙකුගේ විදේශ ගමන් වහාම ක්‍රියාත්මක වන පරිදි තහනම් කිරීමට මහේස්ත්‍රාත්වරයා මෙහිදී නියෝග කළේ ය.
එසේ ම, අදාළ නිලධාරීන් පස් දෙනාගේ බැංකු ගිණුම් පරීක්ෂා කිරීමට ද අධිකරණයෙන් විමර්ශන නිලධාරීන්ට අවසර ලබා දුන්නේ ය.
මෙම සූක්ෂම වංචාව සම්බන්ධයෙන් තාක්ෂණික විමර්ශන සිදු කිරීම සඳහා රජයේ රස පරීක්ෂකවරයා, පරිගණක හදිසි ප්‍රතිචාර ආයතනයේ (CERT) ප්‍රධානියා සහ කොළඹ විශ්වවිද්‍යාලයේ පරිගණක පීඨයේ පීඨාධිපතිවරයා නියෝජනය වන පරිදි විශේෂඥ කමිටුවක් පත් කිරීමටද අධිකරණය අවසර ලබා දුන්නේ ය.
විමර්ශනවල සංවේදී හා සූක්ෂමභාවය සැලකිල්ලට ගනිමින්, නඩු ගොනුව අධිකරණයේ සේප්පුවක බහා තබන ලෙසට ද මෙහිදී මහේස්ත්‍රාත්වරයා නියෝග කළේ ය.
මෙවැනි අපරාධයක් සිදුව ඇත්නම් ඊට වගකිවයුත්තන් කවුරුන්ද යන්න කඩිනමින් අධිකරණයට වාර්තා කරන ලෙස අපරාධ පරීක්ෂණ දෙපාර්තමේන්තුවට නියෝග කළේ ය.
මේ සම්බන්ධයෙන් අපරාධ පරික්ෂණ දෙපාර්තමේන්තුව කළ ඉල්ලීම් සලකා බැලූ අධිකරණයෙන් මෙලෙස නියෝග නිකුත් කළේ ය.
මෙම සිද්ධිය සම්බන්ධයෙන් විමර්ශන කර අපරාධමය වරද සම්බන්ධයෙන් විමර්ශන කරන ලෙසත් අපරාධයක් වී ඇත්නම් එය සිදු කර ඇත්තේ කවුරුන් ද යන්න සම්බන්ධයෙන් අධිකරණයට කරුණු වාර්තා කරන ලෙස නියෝග කළ මහේස්ත්‍රාත්වරයා මින් ඉදිරියට මෙවැනි වැරදි සිදුවීම වළක්වාලීමට වහාම කෙටි පියවර ගන්නා ලෙස මහ බැංකුවට නියෝග කළේ ය.
( mawbima | Kumudu Upul Shantha)
