සාම පාගමන මාධ්‍ය ආවරණ කටයුතුවලදී ජනාධිපති මාධ්‍ය ඒකකයේ උපදේශකයෙකු වන චන්දන සූරියබණ්ඩාරගෙන් හිංසනයට ලක්වී යැයි කියන සිදුවීම පාදක කරගෙන ප්‍රවෘත්ති අධ්‍යක්ෂ ජනරාල් හර්ෂ බණ්ඩාරගෙන් ඔහු මෙම ඉල්ලීම කර ඇත.
රජයේ ප්‍රවෘත්ති දෙපාර්තමේන්තුවෙන් ලද ආරාධනය අනුව තමා ඊට සහභාගී වූ බවත් ප්‍රවෘත්ති අධ්‍යක්ෂ ජනරාල්වරයාගේ අස්සනින් යුතුව මාධ්‍යවේදීන්ට නිකුත් කරන හැදුනුම්පත එම අවස්ථාවේ පැළඳ සිටි බවත් 'සන්ඩේ ඔබ්සර්වර්' මාධ්‍යවේදියා තම ලිපියේ සඳහන් කර ඇත.
එහෙත් චන්දන සූරියබණ්ඩාර සාම පා ගමන තමාට ආවරණය කළ නොහැකි බවත් එය සිරස ටීවී ආයතනය වෙත පවරා ඇති බවත් කියමින් රාජකාරියට බාධා කළේ යැයි බුවනෙක පෙරේරා එම ලිපියේ සඳහන් කර ඇත.
පොදුවේ මහා මාර්ගයක රාජ්‍ය අනුග්‍රහයද සහිතව පැවැත්වෙන කටයුත්තක් ආවරණය කිරීමට මාධ්‍යවේදියෙකු වශයෙන් තමාට අයිති ඇති බව කී විට චන්දන සූරියබණ්ඩාර "මම ජනාධිපතිගේ මාධ්‍ය උපදේශකයා. මම කියන දේ අහලා මෙතනින් යන්න” යනුවෙන් තමාට තර්ජනය කළ බවත් මාධ්‍යවේදියා පවසයි.
රජයේ මාධ්‍ය ආයතනයක සේවය කරන තමා මෙවැනි සැලකිල්ලකට ලක්වේ නම් පෞද්ගලික මාධ්‍ය ආයතනවල සේවය කරන මාධ්‍යවේදීන් කවරාකාරයේ අපහසු තාවකට පත්වනු ඇතිදැයි බුවනෙක පෙරේරා ප්‍රශ්න කරයි.
ජනාධිපති මාධ්‍ය උපදේශකයෙකු වැනි රාජ්‍ය නිලධාරියෙකු විසින්, තමාගේ පෙර සේවය කළ පුද්ගලික මාධ්‍ය ජාලයක වාසිය වෙනුවෙන්, රජයට අයත් මාධ්‍යවේදියෙකුගේ කටයුතු මෙසේ නවතා දැමීමට උත්සාහ කිරීම දැඩි ලෙස කනස්සල්ලට ලක්විය යුතු කරුණක් යැයිද එම ලිපියේ සඳහන්වේ.
තමා මෙම සිදුවීම ගැන පොලිස් පැමිණිල්ලක් කළ නමුත් ජාතික හා අන්තර්ජාතික සංවිධාන ශ්‍රී ලංකාවේ භාෂණය හා ප්‍රකාශනයේ නිදහස සම්බන්ධයෙන් මෙම සිදුවීම අරභයා මතුකර ඇති අදහස් සැලකිල්ලට ගෙන ප්‍රවෘත්ති අධ්‍යක්ෂ ජනරාල්වරයාගේ මැදිහත්වීම අපේක්ෂා කරන බවද මාධ්‍යවේදී බුවනෙක එස්. පෙරේරා තම ලිපියේ වැඩිදුරටත් සඳහන් කර ඇත.
(සටහන | ගිම්හාන් ද සිල්වා)
