දැනට මූලික රෝහල සඳහා අක්කර පහක භූමියක් පවතින නමුත් එය දිස්ත්‍රික් රෝහලක් බවට පත් කිරීමේදී ඉඩකඩ ප්‍රමාණවත් නොවන බැවින් රංගිරි දඹුලු මහා විහාරයේ අධිපති හිමියන් සමඟ මේ ගැන සාකච්ඡා කළ බව ඇමතිවරයා පැවසීය.
දඹුල්ල මූලික රෝහල සෞඛ්‍ය අමාත්‍යාංශයට පවරා ගැනීමේදී එහි ප්‍රවේශ පහසුකම් ඇතුළු අනෙකුත් කටයුතු ගැන කැබිනට් මාධ්‍ය හමුවේදී මාධ්‍යවේදීන් කළ විමසීමේදී ඔහු මෙම අදහස් පළ කළේය.
එහිදී මාධ්‍යවේදීන් යොමු කළ ප්‍රශ්නය හා ඊට ඇමතිවරයා දුන් පිළිතුර මෙසේය.
ප්‍රශ්නය :
දඹුල්ල මූලික රෝහල සංවර්ධනය සහ වැඩිදියුණු කිරීම සඳහා සෞඛ්‍ය හා ජනමාධ්‍ය අමාත්‍යාංශය යටතට පවරා ගන්නවා. මෙතෙක් තිබුණේ ඒ 9 මාර්ගයේ. අලුතින් පිහිටුවන්නෙත් එවැනි ප්‍රවේශ පහසුමකමක් සහිතවද? සංවර්ධනය කරන්නෙත් ඒ ශ්‍රේණියේ මූලික රෝහලක් විදියටද?
පිළිතුර :
රෝහල දැන් තිබෙන්නේ නගර මධ්‍යයේ. නගර සංවර්ධන සැලැස්මේදී රෝහල ඉවත්කිරීමට යෝජනාවක් ලැබී තිබුණා. නව භූමිය කි.මී 2.5ක් දුරින් තිබෙන්නේ. ඒ 9 හා ඒ 6 මාර්ග දෙක සම්බන්ධ කරන මාර්ගයක පවතින්නේ. රෝහලේ කටයුතුවලට ඒ ස්ථානය බාධාවක් නෑ. රංගිරි දඹුලු විහාරයෙන් මේ ඉඩම පරිත්‍යාග කළේ. දිස්ත්‍රික් මහ රෝහලක් විදියට සංවර්ධනය කරද්දී අක්කර 5 ප්‍රමාණවත් වන එකක් නෑ. අපි නායක හාමුදුරුවන් එක්ක කතා කළා. ඉඩම තව ටිකක් වැඩිකරගන්න. සංවර්ධන සැලැස්මේ කොටසක් හැටියට පවතින මාර්ගය කිමී 5ක් අඩි 50ක් දක්වා පුළුල් වෙනවා. ඝන අපද්‍රව්‍ය කළමනාකරණ පහසුකම් හදනවා. නව විදුලි සම්ප්‍රේෂණ පද්ධතියක්. ඇස්තමේන්තුව බිලියන 7ක්. මේ වසරේ මිලියන 500ක්. දිස්ත්‍රික් මහ රෝහලක් කරන්නමයි බිලියන 7ක් වෙන්කළේ. ජාතික සෞඛ්‍ය සැලැස්මේ කොටසක් හැටියට මේක කරන්නේ.
(සටහන | ගිම්හාන් ද සිල්වා)
