ඕස්ට්‍රේලියාවට ණය වශයෙන් ගෙවීමට තිබූ ඇමෙරිකානු ඩොලර් ලක්ෂ 25ක මුදලක් වංචනිකයන් අතට පත්වීමේ සිද්ධිය සම්බන්ධයෙන් සම්පූර්ණ වාර්තාවක් මාසයකදී බාර දෙන ලෙස රජයේ මුදල් පිළිබඳ පාර්ලිමේන්තු කාරක සභාව භාණ්ඩාගාර ලේකම්වරයාට නියෝග කළේය
එම වාර්තාව ලැබුණු පසු සුදුසු ක්‍රියාමාර්ග ගන්නා බව මුදල් කාරක සභාවේ සභාපති ආචාර්ය හර්ෂද සිල්වා පැවසීය.
මුදල් අමාත්‍යාංශයේ ණය ගෙවීම් වැඩ පිළිවෙළ තුළ දැවැන්ත හිඩැස් තිබී ඇති බව භාණ්ඩාගාර ලේකම්වරයා ඇතුළු නිලධාරීන්ගෙන් ප්‍රශ්න කිරීමේදී තොරතුරු අනාවරණයවී යැයිද ඔහු ප්‍රකාශ කළේය.
මේ දැවැන්ත හිඩැස් අතරින් හොරුන්ට රිංගා යෑමට හැකිවුණ බවද හෙතෙම සඳහන් කළේය.
ඔහු මෙසේ පැවසුවේ ඕස්ට්‍රේලියාවට ගෙවීමට තිබූ ඇමෙරිකානු ඩොලර් ලක්ෂ 25ක මුදලක් වංචනිකයන් පිරිසක් අතට පත්වීමේ සිද්ධිය සම්බන්ධයෙන් භාණ්ඩාගාර ලේකම් හර්ෂණ සූරියප්පෙරුම ඇතුළු නිලධාරීන් රජයේ මුදල් පිළිබඳ පාර්ලිමේන්තු කාරක සභාව හමුවට ඊයේ පස්වරුවේ කැඳවා ප්‍රශ්න කිරීමෙන් අනතුරුව මාධ්‍ය වෙත අදහස් දක්වමිනි.
( lankalokaya | අසේල පෙරේරා)
