හිටපු ජනාධිපති රනිල් වික්‍රමසිංහ නිකුත්කළ නිවේදනයේ මෙසේ සඳහන් වේ.
''ජනතා විමුක්ති පෙරමුණ ප්‍රමුඛ මාලිමා රජයේ නියම ස්වරූපය පෙන්වමින් හොරකම්, වංචා, දූෂණ, තර්ජන ගර්ජන මනාව ඔප්පු කළ කාලපරිච්ඡේදයක් ලෙස පසුගිය වසර සැලකිය හැකිය. ගල් අඟුරු වංචාව, මහා භාණ්ඩාගාරයේ ඇමරිකානු ඩොලර් ලක්ෂ 25 ක මංකොල්ලය ඒ අතරින් මෑත කාලයේ සිදුවූ මහා පරිමාණ හොරකම් කිහිපයකි.
ජනතාවට පොරොන්දු වූ සහන කිසිවක් ලබාදීමට අද වන තෙක් මාලිමා රජයට හැකි වී නැත. ජීවන වියදම අහස උසට ගොස්ය. ජනතාව දුක් විඳින අවස්ථාවේදී ආණ්ඩුවේ පාර්ශව සැප විඳිමින් සිටිති.
තවත් පැත්තකින් මේ වනවිට පාර්ලිමේන්තු ප්‍රජාතන්ත්‍රවාදයට මරු පහරක් එල්ල කර පවතී. සමගි ජන බලවේගය ප්‍රමුඛ විපක්ෂ පාර්ලිමේන්තු කණ්ඩායමට ජනතාව වෙනුවෙන් හඬ නැගීමට ඉඩක් නොදීම බරපතල තත්ත්වයකි. හැමවිටම තර්ජනයෙන් සියල්ල පාලනය කිරීමට වෙර දරයි. පවතින වාතාවරණය අනුව විපක්ෂය ජයග්‍රහණය කරනු ඇතැයි බියෙන් පළාත් සභා ඡන්දය පවත්වන්නේ නැත.
ආණ්ඩුක්‍රම ව්‍යවස්ථාව මගින්ම ජනතා මුදල් පාලනය කිරීමේ බලය පාර්ලිමේන්තුවට දී තිබියදීත් මහා භාණ්ඩාගාරයේ ඇමරිකානු ඩොලර් ලක්ෂ 25 ක හොරකම පිළිබඳ පාර්ලිමේන්තු විවාදයක් පැවැත්වීමට මුලින් ඉඩ දුන්නේ නැත. වෙස්ට්මිනිස්ටර් පාර්ලිමේන්තු ක්‍රමය යටතේ මෙවැනි තත්ත්වයක් ඇති වූයේ ප්‍රථම වතාවටය.
මුදල් අමාත්‍යංශ ලේකම්වරයා පාර්ලිමේන්තු කාරක සභාව හමුවට පැමිණීම ද මුලින් ප්‍රතික්ෂේප කළේය. ප්‍රජාතන්ත්‍රවාදයට එරෙහි මේ තීරණ අවසන් මොහොතේ වෙනස් වූයේ දිගින් දිගටම එල්ල වූ ජනතා විරෝධය හේතුවෙනි.
තවත් පැත්තකින් ජනතා විමුක්ති පෙරමුණ ප්‍රමුඛ මාලිමා රජය බෞද්ධ අයිතිවාසිකම් සහමුලින්ම උල්ලංඝනය කරමින් සිටී. කතෝලික පාසල් පිළිබඳව 1962 දී ආණ්ඩුව සහ කතෝලික සභාව අතර ඇතිකරගත් සම්ප්‍රදායන් සියල්ල කඩකරලාය. කිසිඳු ආගමක් ගැන රජයේ සැලකිල්ලක් නැත.
වර්ෂ 1977 සිට ජේ. ආර්. ජයවර්ධන, රණසිංහ ප්‍රේමදාස යන මහත්වරුන්ගේ නායකත්වයෙන් ක්‍රියාත්මක කළ සංවර්ධන වැඩසටහන් සියල්ල මේ වනවිට ඇණ හිට පවතී. අද නව රැකියා බිහි වන්නේ නැත. කර්මාන්ත, සංචාරක, ඉදිකිරීම් ඇතුළු සියලු ක්ෂේත්‍ර කඩාවැටී අවසානය.
මේ පසුබිම යටතේ “පච මදිවට හොරු” පාඨය වර්තමානයේ ඉතාම උචිතම තේමාවයි. සමගි ජන බලවේගය තෝරාගත් ඒ පාඨය බිම් මට්ටමටම ගෙන යනු ඇතැයි අපේක්ෂා කරමි. ප්‍රාදේශීය සභා, නගර සභා සහ මහ නගර සභා ඇතුළත් පළාත් පාලන ආයතන මගින් මේ පාඨය ක්‍රියාවට නැංවීම ඉතාම සුදුසුය.
එසේම එක්සත් ජාතික පක්ෂය සහ සමගි ජන බලවේගය එකට ගමනක් යාම සඳහා සාකච්ඡා කිරීමට පත් කළ කමිටුවේ වැඩකටයුතු ඉදිරියට ගෙන යමු යයි ද යළිත් සිහිපත් කරමි.''
රනිල් ගෙන් සජබ ලේකම් රංජිත් මද්දුම බණ්ඩාරට පෞද්ගලික ලිපියක්
මේ අතර එජාප නායක හිටපු ජනාධිපති රනිල් වික්‍රමසිංහ, සජබ මහ ලේකම් රංජිත් මද්දුම බණ්ඩාර වෙත වෙනම ලිපියක් යොමුකරමින් ඔබගේ සියලු කටයුතු සර්වප්‍රකාරයෙන් සාර්ථක වේවායි ප්‍රාර්ථනා කර ඇත.
එම ලිපියේ මෙසේ සඳහන් වේ.
රංජිත් මද්දුම බණ්ඩාර මහතා, (පා.ම)
මහලේකම්,
සමගි ජන බලවේගය,
හිතවත් රංජිත්,
එක්සත් ජාතීන්ගේ ප්‍රඥප්තිය අනුව මේ වසරේ වෙසක් දිනය සමරනු ලබනුයේ මැයි මස 1 වැනිදාය. ඒ අනුව වෙසක් දිනයට පෙර දින එනම්, අප්‍රේල් 30 වැනිදා ආගමික වතාවත් ආරම්භ කිරීමට කලාපයේ ථෙරවාදී බුදුදහම පවතින රටවල් කිහිපයක්ම පියවර ගනු ලැබීය. ශ්‍රී ලංකාවද මේ තත්ත්වය පිළිගෙන ආගමික වතාවත්වල නිරත විණ.
එක්සත් ජාතික පක්ෂයේ ප්‍රතිපත්ති අනුව පොහොය දිනය යෙදෙන මැයි 1 වැනිදා ආගමික වැඩසටහන් සංවිධානය කිරීමට ආරම්භයේ පටන්ම කටයුතු කළේය. ඒ වැඩසටහන් සැලසුම් කිරීමේදී ගිහි පැවිදි පාර්ශව ගණනාවක් සමග සාකච්ඡා කිරීමටද පක්ෂය පියවර ගනු ලැබීය.
වර්ෂ 2018 මැයි දින සැමරුම 1 වැනිදා සිට 7 දිනය තෙක් කල් දැමීමට එවකට අප රජය පියවර ගත්තේ අප්‍රේල් මස 29 සහ 30 දිනවල පැවැති ජාතික වෙසක් සැමරුම සමග ඇතිවිය හැකි ගැටළු සහගත තත්ත්වය නිරාකරණය කිරීමටය. එතුළින්ද පොහොය යෙදෙන මැයි 1 වැනිදා දේශපාලන කටයුතුවල නොයෙදීමට එක්සත් ජාතික පක්ෂය ගෙන තිබෙන ප්‍රතිපත්තිමය තීරණය පිළිබඳව ඔබ දැනුවත් බවට සැකයක් නැත.
එහෙත් ඔබ පක්ෂයත්, තවත් දේශපාලන බලවේග කිහිපයකුත් මැයි 1 වැනි දින රැලි පැවැත්වීමට තීරණය කරනු ලැබීය. ඔබ පක්ෂයේ මැයි රැලියට සුබ පතන අතරම ඉල්ලා සිටි සුභාශිංසන පණිවුඩය මේ සමග එවමි.
එක්සත් ජාතික පක්ෂයේ සංවත්සර උත්සවයට ඔබ ප්‍රමුඛ පක්ෂයේ නියෝජිත කණ්ඩායම සහභාගීවීම අගය කරන අතර එතුළින් නැගුණු විශ්වාසය හරහා මේ සුභාශිංසන පණිවුඩය ඔබ විසින් මැයි රැලියේදී කියවනු ඇතැයි විශ්වාස කරමි.
රනිල් වික්‍රමසිංහ
viii වැනි විධායක ජනාධිපති
එක්සත් ජාතික පක්ෂ නායක
2026 අප්‍රේල් 30
