ජනතාව හා ආණ්ඩුව එකට එක් වූ පාලනයක් බිහිවූයේ ලංකාවේ පළමු වරට යැයි ද එය රැකගැනීම වැඩ කරන ජනයාගේ වගකීමක් යැයි ද ජනාධිපතිවරයා අවධාරණය කළේය.
නුවරළිය දිස්ත්‍රික්කයේ ආපදාවෙන් විපතට පත් ජනයාට නිවාස ඉදිකිරීමේදී ඉඩම් සොයාගැනීම මූලික ප්‍රශ්නයක් වී ඇතත් මලයහ ජනයාගේ ජීවිතය ගෞරවනීය ලෙස ගොඩනගන ආණ්ඩුව බවට ජාතික ජනබලවේග ආණ්ඩුව පත්වනු ඇතැයිද ජනාධිපතිවරයා සඳහන් කළේය.
ජාතික ජනබලවේගය නුවරඑළිය දිස්ත්‍රික්කයේ මැයි දින රැලියක් පළමු වරට සංවිධානය කරද්දී මෙතෙක් කල් එහි මැයි දින සංවිධානය කළ දේශපාලන කණ්ඩායම් සොයාගැනීමට නැතැයි ද ඔහු කීවේය.
නුවරඑළියේ දෙමළ මාධ්‍ය ගුරු හිඟයක් ඇතැයි ද දැනටමත් අධ්‍යාපන අමාත්‍යංශය සමග සාකච්ඡා කර දෙමළ මාධ්‍ය විද්‍යා පීඨවල සියලු පුරප්පාඩු පිරවීමට කටයුතු කර ඇතැයි ද ඔහු පැවැසීය.
එහිදී ජනාධිපතිවරයා මෙසේ ද කීවේය.
“අපි දිට්වාවලට කෝටි පනස්දාහක් වෙන්කළේ අලුතින් ණයට අරන් නෙවෙයි. රුපියල් කෝටි 10 000ක් මේ යුද්ධයෙන් අසීරුවට පත්වන ජනතාවට වෙන්කළා. ණය අරන් නෙවෙයි. ඉතුරු කරලා. අපි පාරවල් හදනවා පාලම් හදනවා නිවාස හදනවා. සාමාන්‍යයෙන් නිවාසයකට දුන්නේ ඉඩම ගන්න ලක්ෂ 4යි ගේ හදාගන්න ලක්ෂ 12යි. ඒක අපි ලක්ෂ 25 දක්වා වැඩි කළා. නිවාස හැදීමේ වගකීම අපි අරන් තියෙනවා. එක ප්‍රශ්නයක් තියෙනවා. ඉඩම් පිළිබඳ ප්‍රශ්නය. ඉඩමක අයිතිය නිවාසයක හිමිකම අරන් දෙන ආණ්ඩුව ජාජබ ආණ්ඩුව. ඒ වගේම අධ්‍යාපනයේ විශාල ප්‍රතිසංස්කරණයක් කරනවා. දෙමළ මාධ්‍ය ගුරු හිඟයක් තිබෙනවා. අපි දැනටමත් අමාත්‍යංශය සමග සාකච්ඡා කළා දෙමළ මාධ්‍ය විද්‍යා පීඨවල සියලු පුරප්පාඩු පුරවන්න. ඒවාට වැඩියෙන් දෙමළ දුවා දරුවන් ගන්න. මලයගම් ජනයාගේ දරුවන්ට හොඳ අධ්‍යාපනයක් දෙන්න අවශ්‍යයි. ඔවුන්ගේ මාවත අධ්‍යාපනය.”
“ සීයා මව අම්මා දුක් වින්ඳා. හැබැයි දරුවට දුක් විදින්න දෙන්න බෑ. මේ කඳු ඇතුලට ගියාම පාරවල් වැටිලා තියෙන්නේ ප්‍රා සභාවට කියනවා තව වෙලාවක වත්තට අයිති කියනවා. කවුරුවත් හදන්නේ නෑ. අපි විශාල මුදලක් වෙන්කරලා ගමට යන පාර හදනවා. ආදායම් මාර්ග ඕනෑ. ගෞරවයක් ඕනෑ. ශතවර්ෂයකට අධික කාලයක් පීඩාවට පත් වූ ජනයාගේ ජීවිතය ගෞරවය ආර්ථිකය ගොඩනගන ආණ්ඩුව මේක. ආණ්ඩුව හදල අවුරුදු එකහමාරයි. මේ ආණ්ඩුව යළි දශක ගණනාවකට හොල්ලන්න බැරි ආණ්ඩුවක්. මේ ආණ්ඩුව හැදුවෙ මේ රටේ ජනතාව. මා ජනධිපති කළේ මගේ ධනය නෙවෙයි. මගේ පවුල් නෙවෙයි. වැඩ කරන දුක් විඳින ජනයා. ඒනිසා අපි කවුද?”
“ ජනතාවයි ආණ්ඩුවයි එකට ගොඩනැගුණු ආණ්ඩුව මේක. ලංකාවේ පළමු වරට ජනතාව හා ආණ්ඩුව එකට බැඳී ඉන්නවා. මෙතෙක් කල් තිබුණේ ජනතාව පාරට බහිනවා. ආණ්ඩුව පොලු අරන් එනවා. ජනතාව උද්ඝෝෂණ කරනවා. ආණ්ඩුව කඳුළු ගෑස් ගහනවා. අපි සමානයි. එකට මල්ලි අයියේ කියන්න පුළුවන්. අම්මෙ කියන්න පුළුවන්. මේ ආණ්ඩුව රකින්නේ ජනතාව. ඒ නිසා අපි විශ්වාස කරනවා අපි සියලු දෙනා එකතු වෙමු. නුවරඑළියේ අද දහස් ගණනක් ජනයා එකතු වෙලා කියන්නේ මේ රට හදන්න අපි ලෑස්තියි කියන එක. අපි ජයග්‍රහණය වෙනුවෙන් එකතු වෙමු.”
ගිම්හාන් ද සිල්වා
