කොල්ලකෑමට දරන උත්සාහයක් කෝවිලේ කළමනාකරණ මණ්ඩල සාමාජිකයකු විසින් හෙළි කර තිබේ.
සියවස් ගණනක් පැරණි ත්‍රිකුණාමලයේ තිරුකෝනේෂ්වරම් කෝවිල් කළමනාකරණ මණ්ඩලයේ යාවජීව සාමාජික සී. ජයශංකර් පවසන්නේ රේඩාර් පද්ධතියක් ඉදිකිරීම වෙනුවෙන් නාවික හමුදාව විසින් කෝවිල් ඉඩමෙන් කොටසක් ඉල්ලන බව දැනගන්නට ලැබී ඇති බවයි.
"ගුවන් හමුදාව රේඩාර් පද්ධතියක් ස්ථාපනය කරන්න අපේ ඉඩමෙන් කොටසක් ඉල්ලන බව මට දැනගන්න ලැබුණා. මීට දවස් දෙකකට කලින් මම දැනගත්ත විදිහට, රේඩාර් කියන නවීන උපකරණ එයාලා දැනට ඉන්න චීන වරායේ ස්ථාපනය කරන්න පුළුවන්. දැන් ඒක ඒතරම් පහසුකම් එක්ක නවීකරණය වෙලා තියෙනවා. මෙහෙම තියෙද්දී එයාලා කෝණේෂ්වරම් භූමියට ඇතුළු වීමට උත්සාහ කරන්නේ ඇයි කියලා හොයා බලන කොට, අපේ ඉඩම් සම්පූර්ණයෙන්ම උදුරගන්න බව තමයි අපිට තේරෙන්නේ."
ගුවන් හමුදාවේ මෙම උත්සාහය නිසා කෝවිලට අයත් භුමිය සම්පුර්ණයෙන්ම අහිමි වී යාමේ අවදානමක් ගැන අනතුරු අඟවන සී. ජයශංකර් වැඩි දුරටත් මාධ්‍යවේදීන් හමුවේ අවධාරණය කර තිබුනේ ගුවන් හමුදාවේ මෙම උත්සාහය පරාජය කිරීම සදහා ලෝක වාසි හින්දු බැතිමතුන් සියළු දෙනා ඒකරාශි විය යුතු බවයි.
"ඒ හින්දා මේ ක්‍රියාවට එරෙහිව සමස්ත ත්‍රිකුණාමලය දිස්ත්‍රික්කයේ ජනතාව විතරක් නෙමෙයි, ලෝකෙ පුරා ජීවත්වන හින්දු භක්තිකයෝ සියලුම දෙනා එකතුවෙලා මේකට දැඩි විරෝධය පළ කරන ලෙසත්, මේ උත්සාහය පරද්දන්න සියලු දෙනා ඉදිරිපත් වන ලෙසත් මම ඉතා බැගෑපත්ව සහ කාරුණිකව ඉල්ලා සිටිනවා."
විදේශ විනිමය අද්දවාගැනීමේ මූලික ආදායම් මාර්ගයක් වන සංචාරක කර්මාන්තයට රජයේ ආරක්ෂක අංශ හේතුවෙන් මේ වන විටත් එල්ල වී ඇති තර්ජනය ඔහු මාධ්‍යවේදීන් හමුවේ විස්තර කර තිබුනේ පහත අයුරිනි.
"දැනුත් ගේට්ටුව ළඟ හමුදාව — කේනියඩි ළිඳ පිහිටලා තිබ්බ ප්‍රදේශය වහලා හමුදාව ඉන්නවා. ඊළඟට මැද කොටසේ කොටේජ් — පොලිස් කොටේජ් එක තියෙනවා. ඉන් එහා නන්දිමලේ ප්‍රදේශයේ නාවික හමුදාව ඉන්නවා. ඒ හින්දා සංචාරක කර්මාන්තයට ලොකු බලපෑමක් එල්ල වෙලා තියෙනවා. මේ හරහා අපේ රටේ ආර්ථිකය කඩා වැටෙනවා."
ශ්‍රී ලංකාවේ ආරක්ෂක ලේකම් පදවියට පත්කර සිටින්නේ හිටපු ගුවන් හමුදාපතිවරයකු වන සම්පත් තුයියකොන්තා ය.
පළාත් බද වාර්තාකරුවන් පවසන්නේ බ්‍රිතාන්‍ය පාලන සමයේදී ලබා දුන් ත්‍රිකුණාමලය තිරුකෝණේෂ්වර කෝවිලේ ඔප්පුවට අනුව, එය අක්කර 247 ක භූමි ප්‍රමාණයකින් යුක්ත බන බවයි. මෙම ඉඩමේ හිමිකමට අදාළ තඹ තහඩු ඔප්පුව (CV 217) ඉන්දියාවේ සිද්ධස්ථානයක ආරක්ෂිතව තබා ඇති බව දේවාල පරිපාලනය පවසයි.
බොහෝ ශ්‍රී ලාංකික හින්දු භක්තිකයන් ශිව දෙවියන් නමදින අතර අතීතයේ සිට පැවත එන පංච ඊශ්වරම් ලෙසින් හැඳින්වෙන ශිව දෙවිඳුන් වෙනුවෙන් කැපවූ සිද්ධස්ථාන පහක් ලංකාවේ ස්ථාපිත කර තිබේ. ඒ යාපනයේ කීරිමලේ නගුලේස්වරම්, මන්නාරමේ කේතීස්වරම්, ත්‍රිකුණාමලයේ කෝනේස්වරම්, හලාවත මුන්නේස්වරම් සහ දෙවුන්දර තුඩුවේ තොන්ඩේස්වරම් යන කෝවිල්ය.
