යහපාලන රජය සමයේ නීතිපතිවරයා විසින් ගොනු කරනු ලැබ තිබූ මෙම නඩුව මීට පෙර විභාගයට ගැණුනේ ත්‍රිපුද්ගල විනිසුරු මඩුල්ලක් හමුවේ අලුත් කඩේ අධිකරණ සංකීර්ණයේදීය.
එම නඩු විභාගය අතරමග ඇණ හිට තිබුණේ විනිසුරු මඩුල්ලේ සාමාජික විනිසුරුවරයකු වූ මහේෂ් වීරමන් විශ්‍රාමයාම සහ තවත් විනිසුරුවරයෙකු වූ නාමල් බළල්ලේ විනිසුරුවරයා විනය පරීක්ෂණයක් හේතුවෙන් වැඩ තහනමට ලක්වීම නිසාය.
පසුව අගවිනිසුරු ප්‍රීති පද්මන් සූරසේන එම නඩුව විභාග කිරීමට නයනා සෙනෙවිරත්න, නලින් හේවාවසම් සහ ලක්මාලි හේවාවසම්ගෙන් සමන්විත නව ත්‍රිපුද්ගල මහාධිකරණ විනිසුරු මඩුල්ලක් නම් කර තිබේ.
එම විනිසුරු මඩුල්ල හමුවේ මෙම නඩුව කැඳවනු ලැබුවේ කොළඹ විජේරාම මාවතේ පිහිටි හිටපු ඇමති කෙහෙළිය රඹුක්වැල්ල පදිංචිව සිටි නිල නිවසේ ස්ථාපිත කර තිබෙන මහාධිකරණයේදීය.
එහිදී මෙම නඩුව නඩුව යළි මැයි මස 08 වනදා සිට සතිපතා විභාගයට ගැනීමට ත්‍රී පුද්ගල මහාධිකරණ විනිසුරු මඩුල්ල තීරණය කර තිබේ.
ඒ අනුව සාක්ෂිකරුවන් දෙදෙනෙකුට මීළඟ දින අධිකරණය හමුවේ පෙනී සිට ලෙස දන්වා සිතාසි නිකුත් කරන ලෙසත් නියෝග කළේය.
2010 වසරේ ජනවාරි මස 24 වනදා සිට 27 වනදා අතර කාලයේදී මාධ්‍යවේදී ප්‍රගිත් එක්නැලිගොඩ පැහැරගෙන ගොස් අතුරුදන් කිරීම සම්බන්ධයෙන් මේ වන විට ඇප මත මුදාහැර සිටින ශ්‍රී ලංකා යුද හමුදාවේ ගිරිතලේ යුද හමුදා කඳවුරේ අණදෙන නිලධාරියා වශයෙන් කටයුතු කළ කර්නල් ෂම්මි අර්ජුන කුමාරරත්න ඇතුළු යුද හමුදා බුද්ධි අංශ සාමාජිකයින් නව දෙනෙකුට එරෙහිව මෙම නඩුව පවරා තිබේ.
| නෙල්කා මැදගෙදර
'ද ලීඩර්' අධිකරණ වාර්තාකාරිනී
