එමගින් ශ්‍රී ලංකා නීතිඥ සංගමය සඳහන් කර ඇත්තේ එළැඹෙන මැයි 25 වැනිදා ලබා දීමට ඇති අධිකරණ තීන්දුවක් සම්බන්ධයෙන් මැයි දින රැලියේදි සිදුකළ ප්‍රකාශය සම්බන්ධව තමන් දැඩි කනස්සල්ල පළකරන බවය.
එම තීන්දුව ලබාදුන්විට ඒ පිළිබඳව උදම් ඇනීමට ජනතාවට හැකිවන බව ජනාධිපතිවරයා ප්‍රකාශ කිරීම අධිකරණ ක්‍රියාවලියට මැදිහත්වීමක් ලෙස මතයක් ගොඩනගන බවත් එවැනි ප්‍රකාශ මගින් අධිකරණය කෙරෙහි ජනතා විශ්වාසය පළුදුවීමට හේතුවිය හැකි බවත් ශ්‍රී ලංකා නීතිඥ සංගමය සිය නිවේදනය මගින් පෙන්වා දී තිබේ.
අධිකරණයේ ස්වාධීනත්වය සහ සම්පූර්ණතාව සහතික කිරීම සඳහා ශ්‍රී ලංකා නීතිඥ සංගමය කැපවී සිටින බවත් එය ආරක්ෂාකිරීමට හා සුරක්ෂිත කිරීමට අවශ්‍ය සියලු පියවර ගන්නා බවත් නීතිඥ සංගමය නිකුත් කළ එම නිවේදනයේ වැඩිදුරටත් සඳහන් වේ.
එම නිවේදනය මතු පළවේ.
“ජනපති නඩු ගැන කීවේ පබ්ලික් නොලේජ් එකෙන්”- කැබිනට් ප්‍රකාශක
මේ අතර කැබිනට් මාධ්‍ය ප්‍රකාශක ඇමති නලින්ද ජයතිස්ස පවසන්නේ, ජනාධිපතිවරයා නඩු ගැන ප්‍රකාශයක් කළේ පබ්ලික් නොලේජ් එකෙන් බවයි.
ඔහු මේ බව කීවේ, නඩු තීන්දු සම්බන්ධයෙන් මැයි දින වේදිකාවේදී ජනාධිපතිවරයා කළ ප්‍රකාශය ගැන ඊයේ (මැයි 5) කැබිනට් තීරණ දැනුම් දීමේ මාධ්‍ය හමුවේදී මාධ්‍යවේදීන් ප්‍රශ්න කළ අවස්ථාවේය.
ඇමැතිවරයා මෙසේ ද කීය.
“රජයේ වෛද්‍ය නිලධාරින්ගේ නඩුවක තීන්දුව මැයි 8 එනවා. ඔබ දන්නේ නෑ. මම දන්නවා. අලයිඩ් හෙල්ත් සයන්ස් උපාධිධාරින්ගේ නඩුවක් මැයි 15 දෙනවා. ඔබ දන්නෑ මම දන්නවා. සජින් වාස්, චාමර සම්පත්, මර්වින් සිල්වා, යෝෂිත රාජපක්ෂ, චම්පික රණවක ආදී අයගේ ඔබ උනන්දුවක් දක්වනවා නම් හොයාගන්න පුළුවන්. සරණ ගුණවර්ධනගේ නඩුව මැයි 25ට කල් ගියා.”
ප්‍රශ්නය :
නඩු දින ගැන නෙවෙයි ජනාධිපතිවරයා පාක්ෂිකයන්ට කියන්නෙ අත්පුඩි ගහන්න බලන් ඉන්න කියලා. අපි ප්‍රශ්න කරන්නෙ ඒක?
“මම හිතන්නේ නඩු යන විදිය ගැන පබ්ලික් නොලේජ් එකක් තියෙනවානෙ. ඔබත් විවෘත අධිකරණයේ වෙන දේ වාර්තා කරනවා. ඊට වඩා පරස්පර උඩියටුකුරු දෙයක් වුණොත් හැර අපි දන්නවා වෙන දේ. වෙන දේ ගැන ජනාධිපතිතුමාත් කියන්න ඇත්තේ ඒ අනුව යැයි මම හිතනවා. 25, 26, 27 එකක් තියෙනවා. මේවාට බලපෑමක් නෑ. බාධාවක් නෑ. ජනාධිපතිතුමා දන්නවා ජනවරම ඒ ජනවරම අනුව කටයුතු කරනවා කියන එක එයින් ගම්‍ය වෙන්නේ.”
