2026 මාර්තු 20 දිනැති ජනාධිපති ලේකම් ආචාර්ය නන්දික සනත් කුමානායකගේ අත්සන සහිත ලිපිය මඟින් සියලු‍ම පළාත් ප්‍රධාන ලේකම්වරුන්ට හා දිස්ත්‍රික් ලේකම්වරුන්ට දන්වා ඇත්තේ ‘ක්ලීන් ශ්‍රී ලංකා’ වැඩසටහන සම්බන්ධ තීරණ සහ නියෝග අනුව රජය, මෙම ජාතික වැඩසටහන ක්‍රියාත්මක කිරීම සඳහා නව පරිපාලන හා සම්බන්ධීකරණ ව්‍යුහයක් හඳුන්වා දීමට පියවර ගෙන ඇති බවය.
‘ලස්සන රටක් – ප්‍රීතිමත් ජනතාවක්’ යන දැක්ම යටතේ ක්‍රියාත්මක වන මෙම වැඩසටහන ලංකාවේ පළාත්, දිස්ත්‍රික් සහ ප්‍රාදේශීය මට්ටම් ආවරණය වන පරිදි ක්‍රියාත්මක කිරීමට සැලසුම් කර ඇති අතර ඒ සඳහා සම්බන්ධීකාරකවරුන් පත් කර ඇති බව ලිපියේ සඳහන් කර ඇත.
ඒ අනුව සෑම පළාතකටම, දිස්ත්‍රික්කයකටම සහ ප්‍රාදේශීය ලේකම් කොට්ඨාසයකටම වෙන්ව සම්බන්ධීකාරකවරුන් පත් කර තිබේ. ඔවුන්ට රජයේ වැඩසටහන් ක්‍රියාත්මක කිරීමේ සම්බන්ධීකරණ කාර්යයන් පැවරී ඇත. එමෙන්ම මෙම සම්බන්ධීකාරකවරුන්ගේ රාජකාරි කටයුතු සඳහා දිස්ත්‍රික් ලේකම් කාර්යාල තුළ කාර්යාල කාමර සහ පහසුකම් ලබා දෙන ලෙසත්, ඒ සඳහා කළමනාකරණ සේවා නිලධාරියෙකු හෝ සංවර්ධන නිලධාරියෙකු අනුයුක්ත කරන ලෙසත් උපදෙස් ලබා දී ඇත.
ප්‍රාදේශීය මට්ටමේ සම්බන්ධීකාරකවරුන්ට ප්‍රාදේශීය ලේකම් කාර්යාල තුළ පහසුකම් සලසා දීමටත් උපදෙස් ලබා දී ඇත.
මෙම සම්බන්ධීකාරකවරුන් ස්වේච්ඡාවෙන් ඉදිරිපත් වූ පිරිසක් ලෙස හඳුනාගෙන ඇති බැවින්, ඔවුන්ට පූර්ණ සහාය ලබා දීම රාජ්‍ය නිලධාරීන්ගෙන් අපේක්ෂා කරන බවද ජනාධිපති ලේකම්වරයාගේ ලිපියේ සඳහන් කර ඇත.
ජනාධිපති ලේකම් කාර්යාලය විසින් නිකුත් කළ ලැයිස්තුව අනුව දිවයින පුරා දිස්ත්‍රික් සම්බන්ධීකාරකවරුන් 25 දෙනෙකු සහ ප්‍රාදේශීය මට්ටමේ සම්බන්ධීකාරකවරුන් 300කට අධික පිරිසක් පත් කර ඇත.
කොළඹ දිස්ත්‍රික්කය සඳහා පාර්ලිමේන්තු මන්ත්‍රී වෛද්‍ය නජිත් ඉන්දික දිස්ත්‍රික් සම්බන්ධීකාරක ලෙස පත් කර ඇත. එහි ප්‍රාදේශීය මට්ටමින් 13 දෙනෙකු පත් කර ඇත. ගම්පහ දිස්ත්‍රික්කය සඳහා සඳුන් මුතුමාල යටතේ 13 දෙනෙකු සහ කළුතර දිස්ත්‍රික්කය සඳහා ඩබ්ලිව්.ජී. මහේෂ් වරුණ පෙරේරා යටතේ 14 දෙනෙකු පත් කර ඇත.
මෙම පත්කිරීම් සම්බන්ධයෙන් විරෝධය දක්වමින් 2026 අප්‍රේල් 29 ශ්‍රී ලංකා ප්‍රාදේශීය ලේකම්වරුන්ගේ සහ සහකාර ප්‍රාදේශීය ලේකම්වරුන්ගේ සංගමය ජනාධිපති ලේකම්වරයා වෙත ලිපියක් යොමු කර ඇත. එම ලිපියෙන් ඔවුන් අවධාරණය කරන්නේ ප්‍රාදේශීය ලේකම් කාර්යාල පද්ධතිය දේශපාලන පක්ෂග්‍රාහීත්වයකින් තොරව ක්‍රියාත්මක වන ස්වාධීන රාජ්‍ය යාන්ත්‍රණයක් බවය. එවැනි පද්ධතියක් තුළ දේශපාලන පත්වීම්ලාභීන් ස්ථාපිත කිරීමෙන් රාජ්‍ය සේවයේ මධ්‍යස්ථභාවයට හා ස්වාධීනත්වයට බරපතළ බලපෑමක් ඇතිවිය හැකි බව ඔවුන් පෙන්වා දී ඇත.
රජයේ වැඩසටහන් ක්‍රියාත්මක කිරීමට අවශ්‍ය සම්බන්ධීකරණ හා පරිපාලන යාන්ත්‍රණ දැනටමත් ප්‍රාදේශීය ලේකම් කාර්යාල තුළ පවතින බැවින්, නව සම්බන්ධීකාරකවරුන් පත් කිරීම අනවශ්‍ය බවද ඔවුන් සඳහන් කර ඇත. පද්ධතිය තුළ දේශපාලන පත්වීම්ලාභීන් ලෙස සැලකිය හැකි සම්බන්ධීකාරකවරුන් ස්ථාපිත කිරීමෙන් රාජ්‍ය සේවයේ මධ්‍යස්ථභාවයට හා ස්වාධීනත්වයට බරපතළ බලපෑමක් ඇතිවිය හැකි බවද සංගමය පෙන්වා දෙයි.
දිස්ත්‍රික් සහ ප්‍රාදේශීය සම්බන්ධීකරණ කමිටු, ජාතික සහ ප්‍රාදේශීය මට්ටමේ විගණන පද්ධති, සහ වාර්තාකරණ ක්‍රමවේද හරහා වැඩසටහන් ක්‍රියාත්මක කිරීම සඳහා අවශ්‍ය හැකියාව පවතින බැවින් නව සම්බන්ධීකාරකවරුන් පත් කිරීම අනවශ්‍ය සහ පුනරාවර්තන වියදමක් බව ලිපියේ සඳහන් කර ඇත.
රාජ්‍ය නිලධාරීන් නොවන පුද්ගලයන්ට රාජ්‍ය සම්පත් භාවිත කිරීමට ඉඩ දීම සහ ඔවුන් යටතේ රාජ්‍ය නිලධාරීන් සේවයට යොමු කිරීම නීතිමය වශයෙන් ගැටලු සහගත බව ඔවුහු පෙන්වා දෙති. සංගමය පෙන්වා දී ඇත්තේ මෙවැනි උත්සාහයන් අතීතයේද සිදු වූ නමුත් ඒවා දිගටම පවත්වාගෙන යාමට නොහැකි වූ බවයි. ඒ සඳහා ප්‍රධාන හේතුව ලෙස දක්වන්නේ ප්‍රාදේශීය ලේකම් කාර්යාල පද්ධතිය ජනතාව අතර විශ්වාසය ලබාගෙන ඇති ස්වාධීන ආයතනික ව්‍යුහයක් වීමයි.
( anidda.lk | රේඛා නිලුක්ෂි හේරත්)
