සිදු වූ තාක්ෂණික දෝෂයක් හේතුවෙන් ප්‍රතිලාභීන් පිරිසකට සිදු වූ වැඩිපුර ගෙවීම්, ඔවුන්ගේ මැයි මාසයේ දීමනාවෙන් අයකර ගැනීමට කටයුතු කරන බව සුබසාධක ප්‍රතිලාභ මණ්ඩලය පවසයි.
අස්වැසුම දෙවන අදියරේ අප්‍රේල් දීමනාව සහ අලුත් අවුරුද්ද වෙනුවෙන් ලබාදුන් විශේෂ දීමනාව අප්‍රේල් 10 වන දිනට පෙර ගෙවීමට මණ්ඩලය කටයුතු කර තිබුණි.
ඒකාබද්ධ සුබසාධක ප්‍රතිලාභ තොරතුරු පද්ධතිය (IWMS) මසකට දෙවරක් ගෙවීම් සිදු කිරීමට සකසා නොමැති බැවින්, හදිසි අවශ්‍යතාව මත පද්ධතියෙන් බැහැරව ගොනු උඩුගත කිරීමේදී (Manual SLIP Upload) එක් ගොනුවක් දෙවරක් උඩුගත වීම හේතුවෙන් මෙම ගැටලුව පැන නැගී ඇත.
මෙම දෝෂය හේතුවෙන් ප්‍රතිලාභීන් 90,000 කට පමණ ද්විත්ව ගෙවීම් සිදු වී ඇති බව මණ්ඩලය පවසයි. මින් ප්‍රතිලාභීන් 49,759 දෙනෙකු දැනටමත් එම අතිරික්ත මුදල් බැංකුවලින් ලබාගෙන ඇති අතර, එම මුදලේ සමස්ත වටිනාකම රුපියල් 248,795,000.00 කි.
බැංකු ගිණුම්වලින් මුදල් ලබා නොගත් ප්‍රතිලාභීන්ගේ ද්විත්ව ගෙවීම් වහාම ක්‍රියාත්මක වන පරිදි නැවත මණ්ඩලය වෙත ලබා ගැනීමට කටයුතු කර ඇත. කෙසේ වෙතත්, දැනටමත් මුදල් ලබාගෙන ඇති ප්‍රතිලාභීන්ගෙන් එම මුදල් මැයි මාසයේ අස්වැසුම දීමනාවෙන් අයකර ගැනීමට සැලසුම් කර තිබේ.
මෙම ක්‍රියාවලිය හේතුවෙන් රජයට හෝ මහජනතාවට කිසිදු මූල්‍ය පාඩුවක් සිදු නොවන බව අවධාරණය කරන සුබසාධක ප්‍රතිලාභ මණ්ඩලය, සිදුවූ දෝෂය ඉතා ඉක්මනින් නිවැරදි කර ඇති බවත් මේ පිළිබඳව පැතිර යන වැරදි ප්‍රචාර වලට නොරැවටෙන ලෙසත් මහජනතාවගෙන් ඉල්ලා සිටියි.
දිස්ත්‍රික්ක කිහිපයක අස්වැසුම ප්‍රතිලාභීන් වෙත එලෙස ද්විත්ව ගෙවීමක් සිදුකර ඇති බව පෙන්වා දෙන එම සංවිධානය, ඒ පිළිබඳව පාර්ලිමේන්තුව හරහා විමර්ශනයක් පවත්වන ලෙස කතානායකවරයාගෙන් ඉල්ලීමක් කර තිබේ.
"මහා භාණ්ඩාගාරයේ ඩොලර් මිලියන 2.5ක් අතුරුදන්වීම හා සමාන ආකාරයකට අස්වැසුම ප්‍රතිලාභීන් වෙත දෙවරක්/වැඩිපුර මුදල් ගෙවීම රාජ්‍ය මූල්‍ය කලමනාකර‍ණයේ අද ඇති වී තිබෙන බිඳවැටීම, වියවුල හා වගකීම් විරහිතභාවය මනාව පිළිබිඹු වන්නකි." Free Lawyers සංවිධානය නිකුත් කළ නිවේදනයක දැක්වේ.
2026 අප්‍රේල් මස දාහත් ලක්ෂ තිස් තුන් දහසකට ආසන්න පවුල් සංඛ්‍යාවකට අස්වැසුම ප්‍රතිලාභ ගෙවීමට නියමිතව තිබූ බවත්, ඉන් පිරිසකට අස්වැසුම ප්‍රතිලාභ දෙවරක් ගෙවා ඇති බවත් Free Lawyers සංවිධානය කතානායකවරයා වෙත දැනුම් දී තිබේ.
