විදේශීය රාජ්‍ය නායකයෙකු වසර 11කට පසු මෙරට පාර්ලිමේන්තුව ඇමතූ මෙම අවස්ථාව පිළිබඳ අදහස් දක්වමින් පාර්ලිමේන්තු මහලේකම් කුෂානි රෝහණධීර සඳහන් කළේ, මීට පෙර මෙවැනි අවස්ථාවක් වාර්තා වූයේ 2015 වසරේදී ඉන්දීය අග්‍රාමාත්‍ය නරේන්ද්‍ර මෝදි ගේ පැමිණීමත් සමඟ බවයි.
රාජ්‍ය නායකයෙකුට පිරිනමනු ලබන උපරිම ගෞරවාචාර සහිතව ජනාධිපති ටෝලම් පාර්ලිමේන්තු පරිශ්‍රයේදී පිළිගනු ලැබීය. ත්‍රිවිධ හමුදා උත්තමාචාර සහ විශේෂ වීථි පෙළපාලියකින් අනතුරුව කථානායකවරයා විසින් එතුමාව සභා ගර්භය වෙත කැඳවාගෙන යනු ලැබීය. මෙම අවස්ථාවට මැති ඇමතිවරුන්, තානාපතිවරුන් ඇතුළු සම්භාවනීය අමුත්තන් රැසක් එක්ව සිටියහ.
හෝ චී මිං අඩිපාරේ යන මිත්‍රත්වය
සිය දේශනය ආරම්භ කරමින් ජනාධිපතිවරයා සිහිපත් කළේ වියට්නාමයේ අසහාය නායක හෝ චී මිං සිය විප්ලවීය සමයේ තෙවරක් ශ්‍රී ලංකාවට පැමිණ ඇති බවයි. "ජාතික නිදහස ලැබුණද ජනතාවට සතුට සහ නිදහස භුක්ති විඳීමට නොලැබේ නම් එම නිදහසෙන් පලක් නැත" යන හෝ චී මිංගේ ප්‍රකාශය උපුටා දැක්වූ ඒ මහතා, කොළඹ පිහිටි හෝ චී මිං පිළිරුව දෙරටේ නොබිඳෙන සබඳතාවේ සංකේතයක් බව පැවසීය.
"ඩොයි මෝයි" ආර්ථික විප්ලවයේ පාඩම
1986 වසරේදී වියට්නාමය හඳුන්වා දුන් "ඩොයි මෝයි" (Doi Moi) හෙවත් නවීකරණ ක්‍රියාවලිය පිළිබඳ අදහස් දක්වමින් ටෝ ලාම් පෙන්වා දුන්නේ එය හුදෙක් ප්‍රතිපත්තිමය වෙනසක් නොව නිර්භීත නව චින්තනයක් බවයි. පවතින යථාර්ථයට සත්‍යවාදීව මුහුණ දීම සහ නොගැලපෙන ආයතනික ව්‍යුහයන් නිර්භීතව වෙනස් කිරීම හරහා ආහාර හිඟයකින් පෙළුණු වියට්නාමය අද වන විට ලොව ප්‍රමුඛතම සහල් සහ කෘෂි නිෂ්පාදන අපනයනකරුවෙකු වී ඇති ආකාරය ඔහු විස්තර කළේය.
සංවර්ධනය යනු හුදෙක් දළ දේශීය නිෂ්පාදිතයේ සංඛ්‍යාලේඛන මත පමණක් තීරණය වන්නක් නොවන බව ජනාධිපතිවරයා මෙහිදී අවධාරණය කළේය. "සංවර්ධනය යනු ජනතාවට වඩාත් යහපත් ජීවිතයක් හිමිවීම, දරුවන්ට උසස් අධ්‍යාපනයක් ලැබීම සහ සේවකයන්ට ස්ථාවර රැකියා අවස්ථා සහ සුරක්ෂිතභාවය සහතික වීමයි" යනුවෙන් ඔහු පැවසීය. වියට්නාමයේ සාර්ථකත්වයේ රහස ජනතාව වෙනුවෙන්, ජනතාව විසින්ම මෙහෙයවන ප්‍රතිපත්ති බව ඔහු පැහැදිලි කළේය.
බිලියන ඩොලරයේ වෙළෙඳ ඉලක්කය සහ කලාපීය ආරක්ෂාව
ශ්‍රී ලංකාව සහ වියට්නාමය අතර ද්විපාර්ශ්වික වෙළඳාම නුදුරු අනාගතයේදී ඇමෙරිකානු ඩොලර් බිලියනය දක්වා ඉහළ නැංවීමේ ඉලක්කය ජනාධිපතිවරයා මෙහිදී ඉදිරිපත් කළේය. කෘෂිකර්මය, ඩිජිටල් පරිවර්තනය, කෘතිම බුද්ධිය (AI), හරිත බලශක්තිය සහ සංචාරක ක්ෂේත්‍රයේ සහයෝගීතාව වර්ධනය කිරීමේ අවශ්‍යතාව ඔහු පෙන්වා දුන්නේය. එමෙන්ම 1982 එක්සත් ජාතීන්ගේ සමුද්‍රීය නීතිය පිළිබඳ සම්මුතියට (UNCLOS) ගරු කරමින් ඉන්දීය සාගරයේ සහ නැගෙනහිර මුහුදේ ආරක්ෂාව සහ නිදහස තහවුරු කිරීමට දෙරටම එක්ව පෙනී සිටිය යුතු බව ද ඔහු අවධාරණය කළේය.
සාමය අත්තිවාරම බවත්, ජනතාව කේන්ද්‍රය බවත් පවසමින් සිය දේශනය නිමා කළ ජනාධිපති ටෝ ලාම්, දෙරටේ මිත්‍රත්වය අනාගතයේදී වඩාත් සමෘද්ධිමත් හවුල්කාරිත්වයක් කරා ගමන් කරනු ඇති බවට විශ්වාසය පළ කළේය.
