බැඳුම්කර වංචාවක් ගැන හෙළිදරව් කළ නිරෝෂන්ට එරෙහිව ශ්‍රී ලංකා ඉන්ෂුවරන්ස් නඩු මගට !

ඒ, ශ්‍රී ලංකා රක්ෂණ සංස්ථාව කිසිදු නිල අනුමැතියකින් තොරව, වෙළඳපොළ පොලී අනුපාතයට වඩා අඩු අනුපාතයකට භාණ්ඩාගාර බැඳුම්කර මිලියන 10,000ක් (බිලියන 10ක්) මිලදී ගැනීම හරහා රක්ෂණ හිමියන්ගේ මුදල් දැවැන්ත මූල්‍ය අවදානමකට ලක් කර ඇති බවට නිරෝෂන් පාදුක්ක පසුගියදා මාධ්‍ය හමුවකදී කළ ප්‍රකාශයක් සම්බන්ධයෙනි. ඔහුගේ එම ප්‍රකාශයට සමාජ මාධ්‍ය ඔස්සේ පුළුල් ප්‍රචාරයක් ලැබී තිබිණ.

නිරෝෂන් පාදුක්ක එම මාධ්‍ය හමුවකදී පෙන්වා දුන්නේ මෙම ක්‍රියාවලිය සැලසුම් සහගත මූල්‍ය අපරාධයක් බවයි.

නිරෝෂන් පාදුක්ක සඳහන් කල පරිදි, වෙළඳපොළේ පොලී අනුපාතය 10.12% සිට 10.15% දක්වා ඉහළ මට්ටමක පවතිද්දී, රක්ෂණ සංස්ථාව මෙම බැඳුම්කර මිලදී ගෙන ඇත්තේ 9.75% ක ඉතා අඩු පොලී අනුපාතයකටය.

රක්ෂණ හිමියන්ගේ රුපියල් මිලියන 16,000ක මුදල් යොදවා සිදු කළ මෙම ගනුදෙනුව හේතුවෙන් දැනටමත් සිදු වී ඇති පාඩුව රුපියල් ලක්ෂ 500 ඉක්මවන බව ඔහු සඳහන් කළේය. ඉදිරි කාලය තුළ පොලී අනුපාත 11.5% දක්වා ඉහළ ගියහොත් රක්ෂණ සංස්ථාවට සිදු වන සමස්ත පාඩුව රුපියල් මිලියන 2000 (බිලියන 2) ඉක්මවනු ඇති බවට ඔහු අනතුරු ඇඟවීය.

මෙම මූල්‍ය අර්බුදයට ජනාධිපති අනුර කුමාර දිසානායක සහ මුදල් අමාත්‍යාංශ ලේකම් හර්ෂණ සූරියප්පෙරුම සෘජුව වගකිව යුතු බව නිරෝෂන් පාදුක්ක එම මාධ්‍ය හමුවේදී අවධාරණය කළේය.

මෙම ගනුදෙනුව පිටුපස සිටින්නේ රක්ෂණ සංස්ථාවේ අධ්‍යක්ෂවරයෙකු වන සෝමදාස පලියවඩන නැමැත්තෙකු බවත්, ඔහු රජයේ බැඳුම්කර ගනුදෙනු කරන පෞද්ගලික සමාගමක (ෂර්වුඩ් කැපිටල්) කළමනාකාර අධ්‍යක්ෂවරයා ලෙස කටයුතු කිරීම බරපතල “ළබැඳියාවන් අතර ගැටුමක් (Conflict of Interest)” බවත් මෙහිදී හෙළි කළේය.

මුදල් අමාත්‍යාංශ ලේකම් හර්ෂණ සූරියප්පෙරුම සිය ධුරයට පත්වී දින හතක් ඇතුළත සිය හිතවතෙකු වන සෝමදාස පලියවඩන මෙම තනතුරට පත් කර ඇති බව ද නිරෝෂන් පාදුක්ක පැවසීය.

මෙම බැඳුම්කර මිලදී ගැනීම රක්ෂණ සංස්ථාවේ ආයෝජන කමිටුවේ හෝ අදාළ විෂය භාර නිලධාරීන්ගේ කිසිදු අනුමැතියකින් තොරව සිදු කර ඇති බවට තොරතුරු අනාවරණය වී ඇතැයි පවසූ නිරෝෂන් පාදුක්ක, නලින් සුබසිංහ සහ සියණි කුලසිංහ යන නිලධාරීන් දෙදෙනාගේ අනුමැතියෙන් පමණක් මෙම මහා පරිමාණ ගනුදෙනුව සිදු කර ඇති බවට චෝදනා කළේය.

මෙම අත්තනෝමතික ක්‍රියාවන් හමුවේ රක්ෂණ සංස්ථාවේ අත්දැකීම් බහුල ජ්‍යෙෂ්ඨ නිලධාරීන් රැසක් ඉල්ලා අස්වෙමින් සිටින බවත් පැවසු නිරෝෂන් පාදුක්ක, ඒ අතර ප්‍රධාන විධායක නිලධාරී චන්දන අලුත්ගම, සමාගම් ලේකම් ශිරෝමි කෝදාගොඩ, තොරතුරු නිලධාරී අශෝක ජයවර්ධන, ප්‍රධාන ව්‍යාපාරික නිලධාරී නාමලී සිල්වා ඇතුළු තවත් නිලධාරීන් රැසක් ද වන බව සඳහන් කළේය.

එසේම, වසර 18ක පමණ පළපුරුද්දක් අවශ්‍ය වන සමාගම් ලේකම් වැනි තනතුරු සඳහා මාස කිහිපයක අත්දැකීම් ඇති පුද්ගලයන් පත් කරමින් ආයතනයේ මූල්‍ය විනය පිරිහෙමින් පවතින බව ඔහු වැඩිදුරටත් පැවසීය.

රක්ෂණ සංස්ථාවේ වත්මන් සභාපති නුසිත් කුමාරතුංග, 'මාලිමාව' නියෝජනය කරමින් මහරගම නගර සභාවට තරඟ කළ අයෙකු බවත්, මෙවැනි අද්දැකීම් අඩු පිරිස් බිලියන ගණනක ලාභ ලැබූ ආයතනයක් විනාශ කරමින් සිටින බවත් ඔහු චෝදනා කළේය.

රක්ෂණ සංස්ථාව බංකොලොත් වීමට පෙර මෙම මූල්‍ය අපරාධය වහාම නතර කරන ලෙසත්, අල්ලස් කොමිසම සහ සී.අයි.ඩී. හරහා මේ පිළිබඳ විමර්ශනයක් ආරම්භ කරන ලෙසත් නිරෝෂන් පාදුක්ක එම මාධ්‍ය හමුවේදී රජයෙන් ඉල්ලා සිටියේය.

ශ්‍රී ලංකා ඉන්ෂුවරන්ස් නිරෝෂාන්ගේ ප්‍රකාශය තරයේ ප්‍රතික්ෂේප කරයි

2026 අප්‍රේල් 9 දින පැවැත්වූ මහා භාණ්ඩාගාර බැඳුම්කර වෙන්දේසිය සම්බන්ධයෙන් ශ්‍රී ලංකා ඉන්ෂුවරන්ස් (SLIC) විසින් කළ ආයෝජනය පිළිබඳව නිරෝෂන් පාදුක්ක මාධ්‍ය සාකච්ඡාවකදී හා සමාජ මාධ්‍ය ඔස්සේ පළ කරනු ලබන ප්‍රකාශ සම්බන්ධයෙන් මුදල් අමාත්‍යංශයේ අවධානය යොමුව ඇත.

ඒ පිළිබඳව  'දිනමිණ' පුවත්පතේ පලවී ඇති වාර්තාවක මෙසේ සඳහන් වේ.

2026 අප්‍රේල් 6 දින, මුදල්, සැලසුම් සහ ආර්ථික සංවර්ධන අමාත්‍යාංශයට අයත් රාජ්‍ය ණය කළමනාකරණ කාර්යාලය (Public Debt Management Office – PDMO) විසින් 2026 අප්‍රේල් 9 දින පැවැත්වීමට නියමිත මහා භාණ්ඩාගාර බැඳුම්කර වෙන්දේසිය පිළිබඳ මහජන නිවේදනයක් නිකුත් කර තිබුණි.

වෙන්දේසිය පැවැත්වීමට පෙර, එම වෙන්දේසියට සහභාගී වීමට අවශ්‍ය නිසි අනුමැතිය ශ්‍රී ලංකා ඉන්ෂුවරන්ස් (SLIC) සහ ශ්‍රී ලංකා ඉන්ෂුවරන්ස් Life (SLIC Life) ආයෝජන කමිටු වෙතින් ලබාගෙන තිබුණි. එබැවින්, නිල අනුමැතියකින් තොරව මෙම ආයෝජනය සිදු කළ බවට ඉදිරිපත් කරනු ලබන චෝදනා SLIC සහ SLIC Life විසින් දැඩිව ප්‍රතික්ෂේප කරයි.

තවද, මාධ්‍ය සාකච්ඡාවේ දී සහ සමාජ මාධ්‍ය ඔස්සේ සඳහන් කර ඇති පරිදි රුපියල් බිලියන 10ක් නොව, SLIC සහ SLIC Life විසින් ආයෝජනය කර ඇත්තේ සමස්ත වශයෙන් රුපියල් බිලියන 6ක් පමණි.