අනතුරින් කිසිවෙකුටත් තුවාල සිදුව නොමැත.
අප වෙත වාර්තා වන පරිදි, අනතුර සිදුවූ වහාම එම ස්ථානයට කඩා වැදුණු ‘සුලක්ෂන්’ සහ ‘සත්තු අනෝසන්’ යන පුද්ගලයින් ප්‍රමුඛ මැර කල්ලියක්, කිසිවෙකුට තුවාල නොවූ බවුසර් රියදුරාට චණ්ඩිකම් පෙන්වමින් අමානුෂික ලෙස පහර දී ඇත.
"අනතුරෙන් පස්සේ මිනිහා බය වෙලා ඉද්දි, සුලක්ෂන්ලගේ සෙට් එක ඇවිත් රියදුරාව අල්ලගෙන ගහන්න ගත්තා. කනට ගැහුවා, පයින් ගැහුවා. මහ අමානුෂික විදියට වධ දුන්නා" යැයි නම හෙළි කිරීමට අකමැති ඇසින් දුටු සාක්ෂිකරුවෙක් අප වෙත පැවසීය.
පොලිසියේ ත්‍රීවීලයට හැප්පෙයි, පොලිසිය බලා සිටියි
වඩාත්ම බරපතල හා හාස්‍යජනක කරුණ වන්නේ, බවුසරය ගැටී ඇත්තේ පොලිස් ත්‍රීරෝද රථයක වීමයි.
එමෙන්ම පහරදීම සිදුවන මුළු කාලය පුරාම පොලිස් නිලධාරීන් පිරිසක් එම ස්ථානයේ සිට ඇතත්, පොලිසියේ ත්‍රීවීලයට අලාභ හානි කර සහ රියදුරුට පහර දෙනවිට බලා සිටියා මිස, පහරදීම නතර කිරීමට කිසිදු උත්සාහයක් නොගත් බවට දැඩි චෝදනාවක් එල්ල වේ.
"පොලිසියේ ත්‍රීවීල් එකටනේ හැප්පුනේ. පොලිසියේ එවුන්ම හිටියා. ඒත් උන් බලාගෙන හිටියා සුලක්ෂන්ලගේ එවුන් වාහනෙයි, රියදුරුවයි කෑලි ගහනකන්. පොලිසියට වඩා මැරයින්ට බලේ තියෙන හැටි" යැයි තවත් ප්‍රදේශවාසියෙක් කෝපයෙන් කියා සිටියේය.
නීතිය කාගේ අතේද?
තමන්ගේම වාහනයකට අනතුරක් වූ විටත්, තමන් ඉදිරිපිටම පුරවැසියෙකුට අමානුෂික ලෙස පහර දෙන විටත් මැදිහත් නොවන පොලිසියකින්, සාමාන්‍ය ජනතාවට කෙසේ සාධාරණයක් ඉටු වේදැයි සමාජ ක්‍රියාකාරීහු ප්‍රශ්න කරති.
මෙම සිදුවීම සම්බන්ධයෙන් රාජකාරි පැහැර හැරිය පොලිස් නිලධාරීන්ට සහ අමානුෂික පහරදීම සිදුකළ ‘සුලක්ෂන්’ හා ‘සත්තු අනෝසන්’ ඇතුළු කල්ලියට එරෙහිව වහාම විනය හා නීතිමය ක්‍රියාමාර්ග ගන්නා මෙන් පොලිස්පතිවරයාගේ සහ මානව හිමිකම් කොමිසමේ වහාම අවධානය යොමු විය යුතු බව ජනතාව ඉල්ලා සිටිති.
(සටහන | මුලතිව් වාර්තාකරු )
