මෙම නව සංශෝධන අද (25) සිට ක්‍රියාත්මක වන පරිදි බලාත්මක වන බව මහ බැංකු ආරංචි මාර්ග තහවුරු කරයි.
මහ බැංකුවේ නවතම තීරණයට අනුව, වාණිජ වාහන මිලදී ගැනීම සඳහා මෙතෙක් ලබාදුන් උපරිම ණය සීමාව වාහනයේ වටිනාකමෙන් 70% සිට 60% දක්වා 10%කින් පහත හෙළා ඇත.
එමෙන්ම මෝටර් රථ, එස්.යූ.වී (SUV), වෑන් රථ සහ ත්‍රීරෝද රථ ඇතුළු පුද්ගලික වාහන මිලදී ගැනීමේදී ලබාදිය හැකි උපරිම ණය පහසුකම් සීමාව ද මෙතෙක් පැවැති 50% සිට 40% දක්වා 10%කින් අඩු කිරීමට පියවර ගෙන තිබේ.
මේ හේතුවෙන් මින් ඉදිරියට පුද්ගලික වාහනයක් මිලදී ගැනීමේදී එහි වටිනාකමෙන් 60%ක මුදලක් ගැනුම්කරු විසින් අත්පිට මුදලින් (Down Payment) පියවිය යුතු වෙයි.
වසරක් තුළ සිදුවූ තෙවැනි සංශෝධනය
ආර්ථික විශ්ලේෂකයන් පෙන්වා දෙන්නේ පවතින සාර්ව ආර්ථික තත්ත්වයන් සහ වෙළෙඳපොළ මූල්‍ය ද්‍රවශීලතාව කළමනාකරණය කිරීම වෙනුවෙන් මහ බැංකුව පසුගිය 2025 වසරේ සිට අවස්ථා කිහිපයකදීම මෙම ණය සීමාවන් (LTV) පහත හෙළීමට කටයුතු කළ බවයි.
පසුගිය වසරේ (2025) ජූලි මස 17 වැනි දින පැවැති රෙගුලාසිවලට අනුව වාණිජ වාහන සඳහා 80%ක සහ පුද්ගලික වාහන සඳහා 60%ක ණය සීමාවක් පැවතුණි. පසුව ඇතිවූ ආර්ථික වර්ධනයන් සැලකිල්ලට ගනිමින් 2025 නොවැම්බර් 7 වැනි දින එම අගයන් පිළිවෙළින් වාණිජ වාහන සඳහා 70%ක් සහ පුද්ගලික වාහන සඳහා 50%ක් දක්වා මහ බැංකුව විසින් පහත දමන ලදී. අද දින සිට ක්‍රියාත්මක වන්නේ එම සීමාවන් තවදුරටත් 10%කින් දැඩි කරමින් හඳුන්වා දුන් නව සීමාවන්ය.
රන් ණය සඳහාත් උපරිම සීමාවක්
වාහන ණය සීමා කිරීමට අමතරව, මූල්‍ය ක්ෂේත්‍රයේ පූර්ව ආරක්ෂණ පියවරක් ලෙස රන් ඇපකර මගින් සුරක්ෂිත කරනු ලබන ණය (Gold Loans) සඳහා ද නව උපරිම ණය අනුපාතයක් (Maximum Loan-to-Value Ratio) හඳුන්වා දීමට ශ්‍රී ලංකා මහ බැංකුව කටයුතු කර ඇත. මෑත කාලීනව රන් වෙළෙඳපොළේ සිදුවන මිල උච්චාවචනයන් හේතුවෙන් මූල්‍ය ආයතන මුහුණ දිය හැකි අවදානම අවම කිරීම සහ ගනුදෙනුකරුවන් සුරක්ෂිත කිරීම මෙහි ප්‍රධාන අරමුණ වී තිබේ.
මූල්‍ය අංශයේ ප්‍රවීණයන් පවසන පරිදි, මෙම දැඩි මූල්‍ය ප්‍රතිපත්තීන් හරහා වෙළෙඳපොළේ පවතින අනවශ්‍ය ණය ප්‍රසාරණය පාලනය වන අතර, එමගින් බැංකු නොවන මූල්‍ය ආයතන සහ වාණිජ බැංකුවල ස්ථාවරත්වය දිගුකාලීනව ආරක්ෂා වනු ඇත. කෙසේ වුවද, මෙම තීරණය හේතුවෙන් ඉදිරි කාලසීමාවේදී මෙරට වාහන වෙළෙඳපොළේ ඇති ඉල්ලුම යම් මට්ටමකට පහත වැටෙනු ඇතැයි ද ඔවුහු අපේක්ෂා කරති.
(මුලාශ්‍රය | aruna.lk)
