අමාත්‍යවරයා මේ බව කියා සිටියේ ඊයේ (02) කොළඹදී පැවති නිල පත්වීම් ලිපි ප්‍රධානෝත්සවයකින් අනතුරුව මාධ්‍ය වෙත අදහස් දක්වමිනි.
ජල පිරිපහදුව සහ බෙදාහැරීමේ කටයුතු සඳහා වැයවන සමස්ත පිරිවැය කෙරෙහි විදුලි බිල ඉහළ යාම සෘජුවම බලපාන බැවින් ජල සම්පාදන හා ජලාපවහන මණ්ඩලයේ මූල්‍ය ස්ථාවරත්වය ආරක්ෂා කරගැනීම වෙනුවෙන් මෙම පියවර ගන්නා බව අමාත්‍යාංශය පෙන්වා දෙයි.
ගාස්තු සංශෝධනය සිදුවන ආකාරය
ජල බිල ඉහළ යාම සිදුවන ආකාරය පිළිබඳව ගණිතමය පැහැදිලි කිරීමක් කරමින් අමාත්‍යවරයා මෙහිදී පෙන්වා දුන්නේ සමස්ත ජල සැපයුම් පිරිවැය තුළ විදුලිය සඳහා වැයවන්නේ 12% ක ප්‍රතිශතයක් පමණක් බවයි.
"සමස්ත විදුලි බිල ගත්තහම, ජල බිලේ පිරිවැයෙන් ආවරණය වෙන්නේ 12%යි. පසුගිය දිනවල එම 12%ක ප්‍රමාණයෙන් 18%ක් තමයි වැඩි වුණේ. අන්න ඒ කොටස විතරක් ජල ඒකකයකට (Unit) එකතු වෙන්න නියමිතයි. ඒ අනුව බලන විට එය ඉතාමත් සුළු මුදලක්. විදුලි බිලේ සිදුවන උච්චාවචනයන් ජල බිලට බලපාන්නේ අන්න ඒ ප්‍රතිශතයට අනුවයි," යැයි අමාත්‍යවරයා වැඩිදුරටත් සඳහන් කළේය.
ඒ අනුව, විදුලි බිල 18% කින් ඉහළ යාම නිසා ජල සැපයුම සඳහා සිදුවන පිරිවැයමය බලපෑම පමණක් ගණනය කර ජල ඒකකයක මිල ඉදිරියේදී සංශෝධනය වීමට නියමිතය.
