ජනාධිපති අනුර කුමාර දිසානායක වෙත විශේෂ ලිපියක් යොමු කරමින් නීතිඥ සංගමයේ සභාපති රජීව් අමරසූරිය සහ ලේකම් නලින් ද සිල්වා අවධාරණය කරන්නේ, වසර ගණනාවක් තිස්සේ පිළිවෙළින් වසර 63 සහ 65 ලෙස පවතින විනිසුරුවරුන්ගේ විශ්‍රාම වයස අත්තනෝමතික ලෙස වෙනස් කිරීම අනවශ්‍ය මෙන්ම අයෝග්‍ය ක්‍රියාවක් බවයි.
"විනිසුරුවන් වැඩි කරලත් වයස ඉස්සීමට හදන්නේ කාගේ වුවමනාවටද?"
20 වන ව්‍යවස්ථා සංශෝධනය මඟින් දැනටමත් ශ්‍රේෂ්ඨාධිකරණ විනිසුරුවන් සංඛ්‍යාව 17 දක්වාත්, අභියාචනාධිකරණ විනිසුරුවන් සංඛ්‍යාව 20 දක්වාත් ඉහළ නංවා ඇති පසුබිමක, මෙවැනි වයස් සීමා සංශෝධනයක කිසිදු කාර්යමය අවශ්‍යතාවයක් නැති බව දේශපාලන විචාරකයෝ පෙන්වා දෙති.
නීතිඥ සංගමය පවසන්නේ, නිසි දිගුකාලීන සැලසුමකින් තොරව සිදුකරන මෙවැනි 'හදිසි' සංශෝධන, අධිකරණයේ ස්වාධීනත්වයට බලපෑම් කිරීමට සහ බලයේ සිටින පාර්ශ්වයන්ගේ දේශපාලන න්‍යාය පත්‍රයන් සපුරාලීමට දරන උත්සාහයක් ලෙස මහජනතාව අර්ථකථනය කරනු ඇති බවයි.
යහපාලන පොරොන්දුවලට පටහැනි ‘දේශපාලන සෙල්ලමක්’?
නීතියේ ආධිපත්‍යය සහ අධිකරණය කෙරෙහි මහජන විශ්වාසය රැකීමට නම්, අධිකරණය ස්වාධීන වීම පමණක් නොව එය පූර්ණ වශයෙන් අපක්ෂපාතී බව මහජනතාවට "පෙනෙන්නට තිබීමද" අත්‍යවශ්‍ය වේ. වත්මන් රජය පද්ධතිමය වෙනසක් (System Change) වෙනුවෙන් පෙනී සිටින බව ප්‍රකාශ කළද, මෙවැනි පියවරක් මඟින් අනාගත රජයන්ටද තමන්ට රුචි පරිදි ව්‍යවස්ථාව කෙලෙසීමට භයානක පූර්වාදර්ශයක් සැපයෙන බවට BASL අනතුරු අඟවයි. එම නිසා, අධිකරණයේ ගෞරවය පළුදු කරන මෙම යෝජිත ව්‍යවස්ථා සංශෝධනයෙන් වහාම ඉවත් වන ලෙස නීතිඥ සංගමය ජනාධිපතිවරයාගෙන් දැඩිව ඉල්ලා සිටී.
