මෙම ජනාධිපතිවරුන් දෙදෙනාගේ මුල් මාස 18 ක පාලන කාලය තුළ පාර්ලිමේන්තුවේ නීති සම්පාදන ක්‍රියාවලිය සැසඳීමේදී සුවිශේෂී වෙනසක් නිරීක්ෂණය වන බව වේරිටේ රිසර්ච් (Verité Research) ආයතනයේ නවතම දත්ත වාර්තාවක් පෙන්වා දෙයි.
පාර්ලිමේන්තු නිල දත්තවලට අනුව, පාලන සමයන් දෙකෙහිම මුල් මාස 6 සලකා බැලීමේදී මෛත්‍රීපාල සිරිසේන ගේ පාලන සමය ඉදිරියෙන් සිටියේය. එම කාලය තුළ MS රජය පනත් කෙටුම්පත් 17ක් ගැසට් කර ඉන් 6ක් නීති බවට පත් කර තිබූ අතර, AKD රජය ගැසට් කර තිබුණේ පනත් 7ක් පමණි. ඉන් නීති බවට පත්ව තිබුණේ පනත් 3ක් පමණි.
කෙසේ වෙතත්, 9 වන මාසයේ සිට මෙම තත්ත්වය උඩුයටිකුරු කරමින් අනුර කුමාර දිසානායක ගේ රජය නීති සම්පාදන වේගය වේගවත් කර ඇත. ඒ අනුව, මාස 18 සීමාව සම්පූර්ණ වන විට (2026 මාර්තු වන විට) AKD රජය විසින් සම්මත කර ඇති මුළු නීති සංඛ්‍යාව 32 කි. එය මෛත්‍රීපාල සිරිසේන ගේ මුල් මාස 18 තුළ සම්මත කළ නීති සංඛ්‍යාවට (20) වඩා පනත් 12 කින් ඉහළ අගයකි.
මෛත්‍රීපාල සිරිසේන ගේ මුල් මාස 18 තුළ වැඩිම පනත් සංඛ්‍යාවක් (54ක්) ගැසට් කරමින් පෙරමුණේ සිටියද, අනුර කුමාර දිසානායක ගේ රජය (පනත් 50ක් ගැසට් කර) ඉන් වැඩිම ප්‍රතිශතයක් සාර්ථකව නීති බවට පරිවර්තනය කිරීමට සමත්ව ඇත.
මෙම කාලසීමාවන් දෙකේදීම පාර්ලිමේන්තුව පිළිවෙලින් දින 126ක් (MS) සහ දින 136ක් (AKD) රැස්වී ඇති අතර, රජයන් දෙකම අතුරු අයවැයක් සහ සම්පූර්ණ වසරක අයවැයක් බැගින් පාර්ලිමේන්තුවට ඉදිරිපත් කර තිබීමද විශේෂත්වයකි.
