පාස්කු ප්‍රහාරයේ 3 වන සැකකරු ලෙස CID භාරයේ පසුවන, රාජ්‍ය බුද්ධි සේවයේ හිටපු ප්‍රධානී සුරේෂ් සලේ සම්බන්ධයෙන් ඉදිරිපත් වූ JMO වාර්තාවත් සමඟ නීති ක්ෂේත්‍රය උඩුයටිකුරු කරවන අලුත්ම නීතිමය ගැටලුවක් කරළියට පැමිණ තිබේ.
CID පරිශ්‍රයේ වැසිකිළියක් අසල ‘දඬුවම් කූඩුවක’ රඳවා තබමින් සලේට එල්ල කළ අමානුෂික සැලකීම් හේතුවෙන් ඔහු දැඩි මානසික බිඳවැටීමකට ලක්ව ඇති බවත්, ඔහු තුළ ‘සියදිවි නසාගැනීමේ අධි අවදානමක්’ (High Risk of Suicide) පවතින බවත් රහසිගත JMO වාර්තාව මඟින් නිල වශයෙන් තහවුරු කර ඇතැයි වාර්තාවේ.
මේ හේතුවෙන් ඔහුව වහාම වෙනත් ආරක්ෂිත ස්ථානයකට මාරු කරන ලෙස ජනාධිපති නීතිඥ ශවීන්ද්‍ර ප්‍රනාන්දු ඊයේ (03) කළ ඉල්ලීමට අනුව කොටුව මහේස්ත්‍රාත්වරයා අද (04) දින කරුණු දක්වන ලෙස CIDයට හදිසි නොතීසි නිකුත් කළේය.
කෙසේවෙතත්, අද දිනයේ නීති ක්ෂේත්‍රයේ දැඩි අවධානය යොමුව ඇත්තේ වෙනත් බරපතළ කාරණාවක් වෙතය. ජ්‍යෙෂ්ඨ නීතිඥවරුන් පෙන්වා දෙන පරිදි, අත්අඩංගුවේ සිටින සැකකරුවන්ට කෘර වදහිංසා පමුණුවා ඇති බවට JMO වාර්තාවකින් පැහැදිලිවම තහවුරු වන අවස්ථාවලදී, ඊට වගකිවයුතු පොලිස් නිලධාරීන් වෙනුවෙන් අධිකරණය හමුවේ පෙනී නොසිටීම නීතිපති දෙපාර්තමේන්තුව සාමාන්‍යයෙන් අනුගමනය කරන සාම්ප්‍රදායික ප්‍රතිපත්තියයි. වදහිංසා පැමිණවීම රාජකාරි සීමාවට අනුකූල නොවන බැවින්, එවැනි නිලධාරීන්ට පුද්ගලික නීතිඥයන් මඟින් පෙනී සිටීමට සිදු වේ.
ජාත්‍යන්තර අවධානයට ලක්වූ හිටපු බුද්ධි ප්‍රධානියාගේ මෙම සිදුවීමේදී, නීතිපතිවරයා එම සාමාන්‍ය නීතිමය ප්‍රතිපත්තියෙන් බැහැරව වධහිංසා චෝදනා ලැබූ නිලධාරීන් වෙනුවෙන් පෙනී සිටීමට කටයුතු කරනු ඇත්ද? නැතහොත් මානව හිමිකම් සුරැකීමේ සම්ප්‍රදාය තවදුරටත් රක්ෂා කරනු ඇත්ද? යන්න අද කොටුව මහේස්ත්‍රාත් අධිකරණයේදී තීරණය වීමට නියමිතය.
(සටහන | හර්ෂ ගුරුගේ)
සබැඳි පුවතක් :
සලේ සියදිවි නසා ගැනීමේ අවදානමක? JMO වාර්තාවෙන් කරුණු තහවුරුවන බව ජනාධිපති නීතිඥයා කියයි
