පැරණි බෞද්ධ දැනුම් පද්ධතිය සෙවීමට අනුරාධපුර, තිස්සමහාරාමය සහ යාපහුව කැනීම් ඇරඹෙයි
වාද්දුව මහිගර්ජනාරාම පින්කමේදී ඕමල්පේ සෝභිත හිමි ඇතුළු මහා සංඝරත්නය සමඟ සාකච්ඡාවක්
විහාරස්ථාන ඇතුළු මෙරට සියලුම ආගමික ස්ථාන හුදෙක් ආගමික වත්පිළිවෙත්වලට පමණක් සීමා නොකර, සාරධර්ම වර්ධනය කරන, සමාජයට නිවැරදි මඟ පෙන්වන සහ ජාතික සමගිය ඇතිකරන මධ්‍යස්ථාන බවට පත්කිරීමට අවශ්‍ය ඕනෑම සහයෝගයක් ලබාදීමට වත්මන් රජය සූදානම් බව අග්‍රාමාත්‍ය ආචාර්ය හරිනි අමරසූරිය ප්‍රකාශ කළාය.
ඇය මේ බව කියා සිටියේ වාද්දුව පොහොද්දරමුල්ල ශ්‍රී ලංකා රාමඤ්ඤ මහා නිකායික මහිගර්ජනාරාම විහාරස්ථානයේ අභිනවයෙන් ඉදිකරන ලද චෛත්‍ය රාජයාණන් වහන්සේගේ කොත නිරාවරණය සහ නව සංඝාවාසය විවෘත කිරීමේ මහෝත්සවයට අද (26) දින සහභාගී වෙමිනි.
රටක සැබෑ පුනරුදය සහ දියුණුව තීරණය වන්නේ ආර්ථික වර්ධනයෙන් පමණක් නොව, පුරවැසියන්ගේ සදාචාරාත්මක සහ ආධ්‍යාත්මික සංවර්ධනය මත බව පෙන්වා දෙන අග්‍රාමාත්‍යවරිය, ඒ සඳහා සාම්ප්‍රදායික ආගමික ව්‍යුහයන් සමාජ ප්‍රගතිය සමඟ බද්ධ කිරීමේ රාජ්‍ය ප්‍රතිපත්තිය මෙහිදී අවධාරණය කර සිටියි.
අග්‍රාමාත්‍යවරිය සිය කතාවේදී මතුකළ ප්‍රධාන කරුණු 3ක්
ආගමික ස්ථානවල සැබෑ භූමිකාව:
ආගමික ස්ථාන දියුණු කිරීම යනු ගඩොලින් වැලිවලින් ගොඩනැඟිලි තැනීම පමණක් නොවන බවත්, එය මිනිසුන්ගේ හදවත් එකට යා කරන සහ සාරධර්ම පණගන්වන පරිසරයක් නිර්මාණය කිරීමක් බවත් අග්‍රාමාත්‍යවරිය සඳහන් කළාය. වත්මන් තාක්ෂණික දියුණුව සහ කාර්යබහුලත්වය නිසා සමාජය සහ පන්සල අතර බැඳීම ලිහිල් වී ඇති බවක් පෙනෙන්නට තිබුණද, ආධ්‍යාත්මික අවශ්‍යතාවලදී මිනිසුන් තවමත් ආගමික සරණ පතන බව ඇය පෙන්වා දුන්නාය.
පැරණි බෞද්ධ දැනුම් පද්ධතිය පිළිබඳ පර්යේෂණ:
මෙරට පැවති පැරණි බෞද්ධ දැනුම් පද්ධතිය සහ ඒ හා බැඳුණු සංස්කෘතික උරුමයන් පිළිබඳව විද්‍යාත්මකව සොයා බැලීම සඳහා අනුරාධපුරය, තිස්සමහාරාමය සහ යාපහුව වැනි ඓතිහාසික ප්‍රදේශ කේන්ද්‍ර කරගනිමින් පුරාවිද්‍යාත්මක කැනීම් කටයුතු මේ වන විටත් ආරම්භ කර ඇති බව අග්‍රාමාත්‍යවරිය මෙහිදී අනාවරණය කළාය.
සඟ සමුළුව සහ සමාජයීය ගැටලු සාකච්ඡා කිරීම:
මෙම උත්සවයට වැඩම කර සිටි දක්ෂිණ ලංකාවේ ප්‍රධාන සංඝනායක ආචාර්ය පූජ්‍ය ඕමල්පේ සෝභිත ස්වාමීන් වහන්සේ ඇතුළු මහා සංඝරත්නය බැහැදැකීමට ද අග්‍රාමාත්‍යවරිය පියවර ගත්තාය. එහිදී පාසල් දරුවන්ගේ සදාචාරාත්මක වර්ධනය මෙන්ම වත්මන් සෞඛ්‍ය අභියෝගයක් වන පාසල් තුළ ඩෙංගු මර්දන වැඩසටහන් ක්‍රියාත්මක කිරීම පිළිබඳව ද උන්වහන්සේලා සමඟ අදහස් හුවමාරු කරගෙන තිබේ.
මෙම ආගමික මහෝත්සවය සඳහා මල්වතු මහා විහාර පාර්ශ්වයේ බස්නාහිර පළාතේ ප්‍රධාන සංඝනායක පූජ්‍ය ගෝනදූවේ ගුණානන්ද හිමි, පූජ්‍ය යටවර ඤාණසිරි හිමි, පූජ්‍ය බටදූවේ සිරිවිමල හිමි ඇතුළු මහා සංඝරත්නය ද, කළුතර දිස්ත්‍රික් පාර්ලිමේන්තු මන්ත්‍රීවරුන් වන නිලන්ති කොට්ටහච්චි, නන්දන පත්මකුමාර ඇතුළු දේශපාලන නියෝජිතයන් සහ ප්‍රදේශවාසී දායක දායිකාවන් විශාල පිරිසක් සහභාගී වී සිටියහ.
