"විනිසුරු පුරප්පාඩු නොපිරවීම මූලික අයිතිවාසිකම් උල්ලංඝනය කිරීමක්; මින් GSP+ සහ IMF සහායටත් බාධා එල්ල විය හැකියි"
වත්මන් මාලිමා රජය රට තුළ ප්‍රජාතන්ත්‍රවාදී ව්‍යුහය බිඳ දමමින්, විධායකය, ව්‍යවස්ථාදායකය සහ අධිකරණය අතර පවතින සංවරණ සහ තුලන (Checks and Balances) පද්ධතිය අඩාල කර තනි පක්ෂයක ඒකාධිපති ආඥාදායක පාලනයක් ස්ථාපිත කිරීමට උත්සාහ දරන බව විපක්ෂ නායක සජිත් ප්‍රේමදාස චෝදනා කරයි.
සමගි නීතිඥ සම්මේලනය විසින් ශ්‍රී ලංකා පදනම් ආයතනයේදී (SLFI) සංවිධානය කරන ලද ප්‍රජාතන්ත්‍රවාදය, නීතියේ ආධිපත්‍යය සහ අධිකරණයේ ස්වාධීනත්වය ආරක්ෂා කිරීම උදෙසා වූ මහජන කථිකාවත අමතමින් විපක්ෂ නායකවරයා ඊයේ (19) මේ බව කියා සිටියේය.
නීතිමය ඉතිහාසය සහ වත්මන් විනිසුරු පුරප්පාඩු
මෙසපොතේනියානු, ඊජිප්තු, ග්‍රීක සහ රෝම යුගයේ සිට මැග්නා කාටාව (Magna Carta), එංගලන්ත පොදු නීතිය, 1787 ඇමරිකානු ආණ්ඩුක්‍රම ව්‍යවස්ථාව මෙන්ම 1948 මානව හිමිකම් ප්‍රකාශනය සහ 1985 අධිකරණයේ ස්වාධීනත්වය පිළිබඳ මූලික ප්‍රතිපත්ති දක්වා ජාත්‍යන්තරව පිළිගත් සම්මුතීන් රැසක් පවතින බව විපක්ෂ නායකවරයා මෙහිදී පෙන්වා දුන්නේය.
අධිකරණය ස්වාධීන වන තරමටම ප්‍රජාතන්ත්‍රවාදය ශක්තිමත් වන බවත්, ඇතැම් පිරිස්වලට විපක්ෂයේ සිටින විට මෙම ප්‍රතිපත්ති මතක් වුවද බලය ලැබුණු පසු ඒවා අමතක වන බවත් හෙතෙම සඳහන් කළේය. වත්මන් රජය උපරිමාධිකරණවල පුරප්පාඩුව පවතින විනිසුරුවරුන් පත් කිරීම හිතාමතාම මඟහරිමින් සිටින බවත්, මෙම පත්කිරීම් ප්‍රමාද කිරීම මඟින් ජනතාවගේ මූලික අයිතිවාසිකම් උල්ලංඝනය වනවා සේම අධිකරණයට අනිසි බලපෑමක් එල්ල වන බවත් ප්‍රේමදාස ප්‍රකාශ කළේය.
විනිසුරුවරුන්ගේ විශ්‍රාම වයස ඉහළ දැමීමේ ගැටලුව
ශ්‍රේෂ්ඨාධිකරණ විනිසුරුවරුන්ගේ විශ්‍රාම යාමේ වයස අවුරුදු 65 සිට 67 දක්වාත්, අභියාචනාධිකරණ විනිසුරුවරුන්ගේ විශ්‍රාම වයස අවුරුදු 63 සිට 65 දක්වාත් ඉහළ නැංවීමට රජය ව්‍යවස්ථා සංශෝධනයක් මඟින් සූදානම් වන බව විපක්ෂ නායකවරයා මෙහිදී අනාවරණය කළේය. විධායක ජනාධිපති ක්‍රමය අහෝසි කිරීමට ලබාදුන් පොරොන්දු ඉටු නොකර, මෙවැනි කරුණු පමණක් ඉලක්ක කර ගනිමින් ව්‍යවස්ථා සංශෝධන ගෙන එන්නේ කුමන අරමුණකින්දැයි ඔහු ප්‍රශ්න කළේය.
මේ සම්බන්ධයෙන් පාර්ලිමේන්තුවේදී ප්‍රශ්න කළ අවස්ථාවේදී රජය එවැනි සූදානමක් නොමැති බව පැවසුවද, තිරය පිටුපස සිදුවන මෙම ක්‍රියාවලිය හරහා අධිකරණයේ ස්වාධීනත්වය සහ ඒ කෙරෙහි පවතින මහජන විශ්වාසය මුළුමනින්ම විනාශ වන බව මන්ත්‍රීවරයා පෙන්වා දුන්නේය. ජනාධිපති අනුර කුමාර දිසානායක ප්‍රමුඛ වත්මන් රජය තමන් ලැබූ ජනවරම පාගා දමමින් කටයුතු කරන බැවින්, පන්ති පාට පක්ෂ භේදයකින් තොරව මෙම ප්‍රජාතන්ත්‍ර විරෝධී වැඩපිළිවෙළට එරෙහිව ජනතාව පෙළගැසිය යුතු බව හෙතෙම අවධාරණය කළේය.
ජාත්‍යන්තර සහ ආර්ථික ප්‍රතිවිපාක
රාජ්‍ය පාලන ව්‍යුහය තුළ සිදුවන මෙවැනි වෙනස්කම් හේතුවෙන් ජාත්‍යන්තර මූල්‍ය අරමුදල (IMF) වැනි ආයතන සමඟ පවතින එකඟතාවලට මෙන්ම රටේ ආර්ථික ඉදිරි ගමනට ද දැඩි අභියෝග එල්ල විය හැකි බව විපක්ෂ නායකවරයා අනතුරු ඇඟවීය. විශේෂයෙන්ම නීතියේ ආධිපත්‍යය බිඳවැටීම වැනි කරුණු මුල් කරගනිමින් යුරෝපා සංගමය විසින් ශ්‍රී ලංකාවට ලබාදෙන GSP+ බදු සහනය වැනි ජාත්‍යන්තර වෙළඳ අනුග්‍රහයන් පවා අහිමි වීමේ අවදානමක් පවතින බව ප්‍රකාශ විය.
එබැවින්, අධිකරණයේ ස්වාධීනත්වයට බලපෑම් කළ අඳුරු යුගයන් නැවත රට තුළ ඇති වීමට ඉඩ නොතබා ප්‍රජාතන්ත්‍රවාදය සුරක්ෂිත කිරීම වෙනුවෙන් සිවිල් සමාජය සහ පොදු ජනතාව එක්ව කටයුතු කළ යුතු බව පවසමින් සජිත් ප්‍රේමදාස සිය අදහස් දැක්වීම අවසන් කළේය.
