* පාර්ශ්වකරුවන් සමඟ විධිමත් සාකච්ඡා පවත්වන තෙක් ආණ්ඩුක්‍රම ව්‍යවස්ථා සංශෝධන ගෙන ඒමෙන් වළකින ලෙසත්, පූර්ණ වාර්තාවක් සඳහා විශේෂ කමිටුවක් පත්කරන ලෙසත් ඉල්ලීමක්
ශ්‍රේෂ්ඨාධිකරණ සහ අභියාචනාධිකරණ විනිසුරුවරුන්ගේ විශ්‍රාම යෑමේ වයස් සීමාවන් ඉහළ නැංවීම සඳහා ආණ්ඩුක්‍රම ව්‍යවස්ථා සංශෝධනයක් ගෙන ඒමට රජය දරන උත්සාහය සම්බන්ධයෙන් ශ්‍රී ලංකා නීතිඥ සංගමය (BASL) සිය දැඩි අප්‍රසාදය සහ කනස්සල්ල පළ කර සිටියි. අදාළ ක්ෂේත්‍රයේ ප්‍රධාන පාර්ශ්වකරුවන් සමඟ විධිමත් සාකච්ඡා පවත්වන තෙක් මේ සම්බන්ධයෙන් ඉදිරි පියවර ගැනීමෙන් වළකින ලෙස ශ්‍රී ලංකා නීතිඥ සංගමය අධිකරණ අමාත්‍ය හර්ෂණ නානායක්කාර ගෙන් ඉල්ලා සිටී.
ශ්‍රී ලංකා නීතිඥ සංගමයේ සභාපති රජීව් අමරසූරිය සහ ලේකම් නලින් ද සිල්වා ගේ අත්සනින් යුතුව අධිකරණ අමාත්‍යවරයා වෙත යොමු කර ඇති ලිපියක් මඟින් පෙන්වා දී ඇත්තේ, මෙම යෝජිත ව්‍යවස්ථා සංශෝධනය මඟින් අධිකරණයේ ස්වාධීනත්වයට, සාධාරණ අධිකරණ පද්ධතියකට මෙන්ම නීතියේ ආධිපත්‍යයට ද බරපතල හානියක් සිදුවිය හැකි බවයි.
දීර්ඝ කාලීන ස්ථාවරය සහ පූර්ව දැනුම්දීම්
1978 ආණ්ඩුක්‍රම ව්‍යවස්ථාව හඳුන්වා දුන් තැන් පටන් අභියාචනාධිකරණ (වසර 63) සහ ශ්‍රේෂ්ඨාධිකරණ (වසර 65) විනිසුරුවරුන්ගේ විශ්‍රාම යෑමේ වයස් සීමාවන් වෙනස් වී නොමැති බව පෙන්වා දෙන නීතිඥ සංගමය, එම ව්‍යවස්ථාපිත ප්‍රතිපාදන වෙනස් කිරීම සඳහා කිසිදු හදිසි හෝ අත්‍යවශ්‍ය ආයතනික අවශ්‍යතාවක් මතුව නොමැති බව සනාථ කරයි. එපමණක් නොව, 2020 වසරේදී මෙම අධිකරණ ද්විත්වයේම විනිසුරු සංඛ්‍යාව (Cadre) ඉහළ නැංවීම මඟින් නඩු තදබදය සහ සේවා ධාරිතාව පිළිබඳ ගැටලුවලට සාර්ථක විසඳුම් ලැබී ඇති බව ද පෙන්වා දෙයි.
මීට පෙර 2026 මාර්තු 30 වැනි දින අධිකරණ අමාත්‍යාංශයෙන් ද, මැයි 25 වැනි දින ජනාධිපතිවරයා වෙත යොමු කළ ලිපියක් මඟින් ද නීතිඥ සංගමය සිය නෛතික ස්ථාවරය පැහැදිලි කර තිබුණ ද, ඒ සඳහා රජයෙන් කිසිදු නිල ප්‍රතිචාරයක් ලැබී නොමැති බව ද අදාළ ලිපියේ සඳහන් වේ.
"Smell Test" හෙවත් මහජන විශ්වාසය පිළිබඳ ප්‍රශ්නාර්ථය
වත්මන් විනිසුරුවරුන්ගේ ධූර කාලය දීර්ඝ කිරීමේ අරමුණින් පමණක් ආණ්ඩුක්‍රම ව්‍යවස්ථා සංශෝධනයක් සිදු කිරීම, එහි යටි අරමුණු පිළිබඳ මහජනතාව තුළ බරපතල සැක සංකා උපදවන්නක් බව නීතිඥ සංගමය අවධාරණය කරයි. අධිකරණයක් ස්වාධීනව පවැතීම පමණක් නොව, එය ස්වාධීනව කටයුතු කරන බවට මහජනතාවට තහවුරු වීම ද ප්‍රජාතන්ත්‍රවාදයක පැවැත්මට අත්‍යවශ්‍ය කරුණකි.
මෙම තත්ත්වය සපථ කරමින් LAWASIA හි හිටපු සභාපති සහ ඉන්දියානු නීතිඥ සංගමයේ උප සභාපති ජ්‍යෙෂ්ඨ නීතිඥ ශ්‍යාම් දිවාන් (Shyam Divan) අදහස් දක්වමින් ප්‍රකාශ කර ඇත්තේ, මෙම යෝජිත සංශෝධනය නීතිඥ සංගමයේ සහ නීති ක්ෂේත්‍රයේ ප්‍රවීණයන්ගේ "Smell Test" (සැකකටයුතු බව මැන බලන පරික්ෂාව) අසමත් වන අතර, එයින් අධිකරණයේ ස්වාධීනත්වයට හානි සිදු වන බව පැහැදිලි වන බවයි.
ඉදිරි පියවර සහ කමිටුවක් පත්කිරීමේ යෝජනාව
පසුගිය ජූලි 14 වැනිදා පැවැති අමාත්‍ය මණ්ඩල තීරණ දැනුම්දීමේ මාධ්‍ය හමුවේදී ප්‍රකාශ වූයේ මේ සම්බන්ධයෙන් අධිකරණ අමාත්‍යාංශයේ නීතිමය නිරීක්ෂණ අමාත්‍ය මණ්ඩලය වෙත ලබා දිය යුතු බවයි.
එබැවින්, අමාත්‍යාංශයේ නිලධාරීන්, විනිසුරුවරුන්, ශ්‍රී ලංකා නීතිඥ සංගමයේ නියෝජිතයන් සහ අනෙකුත් පාර්ශ්වකරුවන්ගෙන් සමන්විත විශේෂ කමිටුවක් පත් කොට මේ පිළිබඳව විධිමත් අධ්‍යයනයක් සිදු කර වාර්තාවක් කැඳවන ලෙස නීතිඥ සංගමය අධිකරණ අමාත්‍යවරයාගෙන් ඉල්ලා සිටී. එමෙන්ම, නීතිඥ සංගමයේ විධායක කමිටුව සහ ජ්‍යෙෂ්ඨ නීතිඥ මණ්ඩලයකට අමාත්‍යවරයා හමු වී කරුණු පැහැදිලි කිරීමට අවස්ථාවක් ලබා දෙන ලෙස ද එම ලිපිය මඟින් වැඩිදුරටත් ඉල්ලා ඇත.
මුලාශ්‍රය :
BASL urges Justice Minister not to amend Constitution to increase retirement ages of superior court judges
